កីឡាអន្តរជាតិ
ជាតិ
ពានរង្វាន់ AFF Suzuki Cup ជុំផ្ដាច់ព្រ័ត្រ ចាប់ផ្ដើមថ្ងៃនេះហើយ
× ពានរង្វាន់បាល់ទាត់ធំប្រចាំតំបន់ប្រជាជាតិអាស៊ីអាគ្នេយ៍ 2014 AFF Championship (ASEAN Football Championship) ដែលគេហៅឈ្មោះជាផ្លូវការថា AFF Suzuki Cup 2014 នឹងចាប់ផ្ដើមប្រកួតនៅល្ងាចថ្ងៃទី ២២ វិច្ឆិកា នេះហើយ ដោយមាន ៨ ក្រុមចូលរួម ដោយវៀតណាម និង សិង្ហបុរី ធ្វើជាសហម្ចាស់ផ្ទះ។
ក្នុងចំណោមប្រទេសដែលចូលរួមទាំង ៨ មាន ៦ ដូចជា វៀតណាម, ថៃ, សិង្ហបុរី, ម៉ាឡេស៊ី, ឥណ្ឌូណេស៊ី, ហ្វីលីពីន មានកៅអីចាំវគ្គនេះជាស្រេច ព្រោះមានចំណាត់ប្រចាំ FIFA ល្អជាង ខណៈក្រុមឡាវ និង មីយ៉ាន់ម៉ា ជាក្រុមខ្លាំងមកវគ្គជម្រុះក្នុងចំណោម ៥ ក្រុម ក្រោយមានរកបានពិន្ទុច្រើនជាង កម្ពុជា, ប្រ៊ុយណេ និង ទីម័រខាងកើត។
ក្រុមទាំង ៨ បានបែងចែកជា ២ ពូល ដោយពូល A មានម្ចាស់ផ្ទះវៀតណាម, ហ្វីលីពីន, ឥណ្ឌូណេស៊ី និង ឡាវ ត្រូវប្រកួតលើទីលានកីឡដ្ឋាន Mỹ Đình National Stadium និង Hàng Đẫy Stadium ក្នុងក្រុងហាណូយ។ ចំណែកពូល B មាន សិង្ហបុរី, ម៉ាឡេស៊ី, ថៃ និង មីយ៉ាន់ម៉ា ប្រកួតនៅកីឡដ្ឋាន Jalan Besar Stadium និង National Stadium នៅប្រទេសសិង្ហបុរី។
សម្រាប់ការប្រកូកដំបូងនៅថ្ងៃទី ២២ វិច្ឆិកា នេះធ្វើឡើងនៅពូល A៖
• ហ្វីលីពីន ប៉ះ ឡាវ នៅម៉ោង ៤ រសៀល
• វៀតណាម ប៉ះ ឥណ្ឌូណេស៊ី នៅម៉ោង ៧ យប់
ពានរង្វាន់នេះបង្កើតឡើងតាំងពីឆ្នាំ ១៩៩៦ ដែលកាលនោះដាក់ឈ្មោះថា Tiger Cup ក្រោមការឧបត្ថម្ភទាំងស្រុងពីក្រុមហ៊ុនមួយនេះ។ តែក្រោយមកដល់ឆ្នាំ ២០០៧ រហូតដល់បច្ចុប្បន្នបានប្ដូរឈ្មោះទៅជា AFF Suzuki Cup ព្រោះប្ដូរម្ចាស់ឧបត្ថម្ភដែរ។ ចំណែកការប្រកួតនៅឆ្នាំនេះចាប់ផ្ដើមពីថ្ងៃទី ២២ វិច្ឆិកា ដល់ ២០ ខែ ធ្នូ ឆ្នាំ ២០១៤។
ក្រុមសិង្ហបុរី បានចារឈ្មោះជាអ្នកគ្រងតំណែងជើងឯកពានរង្វាន់ដែលតែងតែរៀបចំឡើងរាល់ ២ ឆ្នាំម្ដងនេះ ពោលគឺ៤ លើក តាមពីក្រោយដោយថៃ បាន ៣ លើក៕
© រក្សាសិទ្ធិដោយ thmeythmey.com