កីឡាជាតិ
ជាតិ
កីឡា១៣ប្រភេទត្រៀមខ្លួនសម្រាប់ព្រឹត្តិការណ៍បុណ្យសមុទ្រនៅខេត្តកោះកុង
×
កីឡាចំនួន១៣ប្រភេទបានត្រៀមខ្លួនរួចជាស្រេចដើម្បីប្រកួតនិងសម្តែងនៅក្នុងពិធីបុណ្យសមុទ្រលើកទីបីដែលរៀបចំនៅក្នុងខេត្តកោះកុងចាប់ពីថ្ងៃទី១២ដល់ថ្ងៃទី១៤ខែធ្នូនេះ។សកម្មភាពកីឡាស្ថិតក្នុងចំណោមសកម្មភាពជាច្រើនទៀតក្នុងព្រឹត្តិការណ៍បុណ្យសមុទ្រដែលរៀបចំឡើងក្នុងគោលបំណងលើកកម្ពស់អេកូទេសចរណ៍តំបន់ឆ្នេរនិងការអភិវឌ្ឍន៍បៃតង។
រយៈពេលបីថ្ងៃនៅចុងសប្តាហ៍នេះខេត្តកោះកុងក្លាយជាម្ចាស់ផ្ទះលើកដំបូងនៃពិធីបុណ្យសមុទ្រលើកទីបីដែលរៀបចំដោយរដ្ឋាភិបាលកម្ពុជាដោយមានក្រសួងទេសចរណ៍ក្រសួងវប្បធម៌និងវិចិត្រសិល្បៈក្រសួងពាណិជ្ជកម្មសាលាខេត្តកោះកុងរួមទាំងគណៈកម្មាធិការជាតិអូឡាំពិកកម្ពុជាជាអ្នកអនុវត្តផ្ទាល់។
នៅឆ្នាំនេះកីឡា១៣ប្រភេទទាំងកីឡាលើទឹកលើឆ្នេរខ្សាច់និងលើអាកាសនឹងចូលរួមក្នុងសកម្មភាពប្រកួតប្រជែងនិងសម្តែងក្នុងចំណោមព្រឹត្តិការណ៍ជាច្រើនទៀតដែលមានដូចជាពិព័រណ៌ម្ហូបអាហារអន្តរជាតិការបង្ហាញគម្រោងអភិវឌ្ឍន៍ទេសចរណ៍តំបន់ឆ្នេរការសម្តែងសិល្បៈការប្រគំតន្ត្រីនិងការបាញ់កាំជ្រួចជាដើម។
ប្រភេទកីឡាដែលមានការចូលរួមពីសំណាក់ភាគីថៃជាពិសេសនៅខេត្តត្រាតជាប់ព្រំដែនដែលកម្ពុជាមានដូចជាប្រដាល់សេរីប្រណាំងកង់វាយកូនគោលកីឡាហោះហើរម៉ូតូទឹកបាល់ទះលើឆ្នេរខ្សាច់និងកីឡាជិះកង់ទេសចរណ៍កំសាន្តជាដើម។
កីឡាផ្សេងទៀតដែលតម្រូវឲ្យមានការចូលរួមពីមហាជនជាពិសេសពលរដ្ឋនៅខេត្តកោះកុងផ្ទាល់នោះរួមមានកីឡាអុកចត្រង្គរត់ប្រណាំងប្រណាំងទូកកីឡាប៉េតង់កីឡាហែលទឹកនិងកីឡាទ្រីយ៉ាត្លុង។បន្ថែមពីលើនេះក៏មានការសម្តែងល្បុក្កតោនិងចំបាប់រួមទាំងតេក្វាន់ដូដែលបង្ហាញដោយកីឡាការិនីម្ចាស់មេដាយមាសអាស៊ីស៊នសៀវម៉ីផងដែរ។
បើតាមលោក ថោង ខុន រដ្ឋមន្ត្រីក្រសួងទេសចរណ៍ ប្រធានគណៈកម្មាធិការជាតិអូឡាំពិកកម្ពុជា និងជាប្រធានគណៈកម្មការបុណ្យសមុទ្រអ្វីៗទាំងអស់មានការត្រៀមលក្ខណៈរួចរាល់ហើយ ដោយមានការបើកទូលាយផងដែរសម្រាប់ភ្ញៀវទេសចរណ៍បរទេសដែលមកទស្សនាបុណ្យ ដែលចូលពីតាមច្រកព្រំដែនថៃ។
សូមបញ្ជាក់ថា នេះជាលើកទីបីហើយដែលរដ្ឋាភិបាលរៀបចំពិធីបុណ្យសមុទ្រ បន្ទាប់ពីកម្ពុជាពីឆ្នេរសមុទ្រកម្ពុជា បានជាប់ជាសមាជិកឆ្នេរស្អាតពិភពលោកកាលពីឆ្នាំ២០១០ ។ ព្រឹត្តិការណ៍លើកដំបូង ត្រូវបានរៀបចំឡើងនៅឆ្នាំ២០១១ នៅខេត្តព្រះសីហនុ និងលើកទី២ រៀបចំឡើងនៅខេត្តកែប នាឆ្នាំ២០១៣ ។ កាលពីឆ្នាំមុន ព្រឹត្តិការណ៍នេះ បានទាក់ទាញភ្ញៀវទេសចរបានប្រមាណ១០ម៉ឺននាក់ ដោយសកម្មភាពកីឡាក៏ជាផ្នែកមួយដែលមានការទាក់ទាញខ្លាំងក្លាផងដែរ៕
© រក្សាសិទ្ធិដោយ thmeythmey.com