អន្តរជាតិ
នយោបាយអន្តរជាតិ
ថៃបិទគេហទំព័រដែលរិះគន់ព្រះមហាក្សត្រនិងនាយករដ្ឋមន្ត្រី
× លោកនាយករដ្ឋមន្ត្រីថៃប្រាយុទ្ធចាន់អូចាបានប្រកាសអនុវត្តបិទគេហទំព័រទាំងឡាយណាដែលហ៊ានរិះគន់ព្រះមហាក្សត្រនិងរដ្ឋាភិបាលថៃ។ចំណាត់ការនេះធ្វើឡើងក្រោយពីមានការរិះគន់ច្រើនលើស្ថានប័នព្រះមហាក្សត្រនិងរាជរដ្ឋាភិបាលនៅក្នុងអំឡុងពេលប៉ុន្មានខែចុងក្រោយនេះ។
កាលពីថ្មីៗកន្លងមកនេះនាយករដ្ឋមន្ត្រីថៃរដ្ឋប្រហារលោកប្រាយុទ្ធចាន់អូចាបានប្រកាសអោយគ្រប់បណ្តាគេហទំព័រទាំងឡាយតម្រូវអោយលុបចោលនូវមាតិកាទាំងឡាយណាដែលរិះគន់ និងប្រមាថស្ថាប័នព្រះមហាក្សត្រនិងរាជរដ្ឋាភិបាល។
ក្រោយពីមានរដ្ឋប្រហារយោធាកាលពីខែឧសភាដែលដឹកនាំដោយលោកឧត្តមសេនីយ៍យោធាប្រាយុទ្ធចាន់អូចាស្ថាប័នព្រះមហាក្សត្រនិងរាជរដ្ឋាភិបាលថ្មីបានទទួលរងការរិះគន់ជាច្រើនពីសំណាក់ប្រជាជនថៃជាពិសេសនោះនៅតាមបណ្តាញសង្គមនិងគេហទំព័រនានា។
ជាមួយគ្នានេះដើម្បីទប់ស្កាត់នៃការកើនឡើងនូវសកម្មភាពធ្វើអោយប៉ះពាល់ដល់កិត្តិនាមរបស់ព្រះមហាក្សត្រក្រុមប្រឹក្សាជាតិដើម្បីសន្តិសុខនិងសណ្តាប់ជាតិថៃដែលដឹកនាំដោយលោកនាយករដ្ឋមន្ត្រីប្រាយុទ្ធចាន់អូចាបានផ្លាស់ប្តូរនូវការគ្រប់គ្រងគេហទំព័រដោយបានបញ្ជាអោយលុបចោលរាល់មាតិកាឬទិន្នន័យណាមួយដែលធ្វើប៉ះពាល់ដល់ស្ថាប័នព្រះមហាក្សត្រនិងរាជរដ្ឋាភិបាលនៅតាមគេហទំព័ររបស់ខ្លួន។
យ៉ាងណាមិញចំណាត់ការនេះមិនមែនជាលើកដំបូងនោះទេដែលរដ្ឋាភិបាលថៃបានបិទសិទ្ធិសេរីភាពនៃការរិះគន់របស់ប្រជាជនព្រោះពចាប់តាំងពីពេលដែលលោកប្រាយុទ្ធឡើងកាន់តំណែងភ្នាក់ងារផ្សព្វផ្សាយជាច្រើនត្រូវបានបិទដោយសារផ្សព្វផ្សាយរូបភាពដែលប៉ះពាល់ដល់ព្រះមហាក្សត្រដោយចោទថាល្មើសនឹងប្រការ៤៤នៃរដ្ឋធម្មនុញ្ញរបស់ថៃដែលការពារស្ថាប័នព្រះមហាក្សត្រថៃ។
គួរបញ្ជាក់ផងដែរចាប់តាំងពីរដ្ឋប្រហារយោធាថ្ងៃ២២ឧសភាកសេរីភាពខាងបញ្ចេញមតិរបស់ថៃត្រូវបានរឹតត្បឹតយ៉ាងខ្លាំង។ក្នុងនោះមានអ្នកនយោបាយនិស្សិតនិងប្រជាជនជាច្រើននាក់ត្រូវបានអាជ្ញាធរចាប់និងឃុំខ្លួនដោយសារតែប្រឆាំងរបបគ្រប់គ្រងដោយយោធានិងរិះគន់ស្ថាប័នព្រះមហាក្សត្រ៕
© រក្សាសិទ្ធិដោយ thmeythmey.com