អន្តរជាតិ
នយោបាយអន្តរជាតិ
វេណេហ្ស៊ុយអេឡា រត់រកចិនជួយដោះស្រាយបញ្ហាតម្លៃប្រេងឆៅធ្លាក់ចុះ
× ក្រុងប៉េកាំងបានព្រមព្រៀងជាមួយរដ្ឋាភិបាលវេណេហ្ស៊ុយអេឡាលើគម្រោងវិនិយោគដ៏ធំមានទំហំទឹកប្រាក់ច្រើនជាង ២០ពាន់លានដុល្លារអាមេរិកឯណោះ។ គម្រោងវិនិយោគរបស់ចិនផ្តោតសំខាន់លើផ្នែកសង្គម សេដ្ឋកិច្ច និងគម្រោងបូមប្រេងនៅប្រទេសអាមេរិកឡាទីននេះ ហើយគម្រោងនេះអាចជួយវេណហ្ស៊ុយអេឡាអោយរួចផុតពីបញ្ហាប្រឈមសេដ្ឋកិច្ចដែលបណ្តាលមកពីទណ្ឌកម្មអាមេរិកនិងការធ្លាក់ចុះនៃប្រេងឆៅលើទីផ្សាអន្តរជាតិ។
លោក សៅ ផលនិស្ស័យ លម្អិតព័ត៌មាននេះ!
រដ្ឋាភិបាលក្រុងប៉េកាំងនិងរដ្ឋាភិបាលក្រុង Caracas បានព្រមព្រៀងគ្នាលើគម្រោងវិនិយោគដ៏ធំសម្បើមមួយដែលមានទំហំទឹកប្រាក់ច្រើនជាង ២០ពាន់លានដុល្លារអាមេរិកនៅក្នុងប្រទេសវេណេហ្ស៊ុយអេឡា។ គម្រោងវិនិយោគរបស់ប្រទេសចិននៅពេលនេះផ្តោតសំខាន់លើ វិស័យសង្គម សេដ្ឋកិច្ច និងវិស័យថាមពលជាពិសេសជំនួញប្រេងកាតតែម្តង។ ការចុះកិច្ចព្រមព្រៀងលើគម្រោងវិនិយោគរបស់រដ្ឋាភិបាលទាំងពីរនេះ កើតមានឡើងក្រោយពេលដែលប្រធានាធិបតីវេណេហ្ស៊ុយអេឡាលោក នីកូឡា ម៉ាឌុយរូ ធ្វើដំណើរទស្សនកិច្ចទៅកាន់ប្រទេសចិនកាលពីថ្ងៃពុធ។
ប្រធានាធិបតីវេណេហ្ស៊ុយអេឡាខាងលើបានធ្វើដំណើរទស្សនកិច្ចទៅកាន់ប្រទេសចិន ដោយជួបពិភាក្សាជាមួយសមភាគីលោកគឺប្រធានាធិបតី ស៊ី ជិនពីង ហើយគោលបំណងរបស់វេណេហ្ស៊ុយឡាគឺការពង្រឹងទំនាក់ទំនងសេដ្ឋកិច្ចជាមួយចិន ដោយរំពឹងថាចិននឹងជួយវេណេហ្ស៊ុយអេឡាអោយរួចផុតពីវិបត្តិសេដ្ឋកិច្ចបច្ចុប្បន្ន។ មេដឹកនាំរដ្ឋាភិបាលក្រុង Caracas រត់ទៅប្រទេសចិនដើម្បីពង្រឹងទំនាក់ទំនងសេដ្ឋកិច្ចជាមួយក្រុងប៉េកាំង មួយសប្តាហ៍ក្រោយពេលដែលរដ្ឋាភិបាលនេះប្រកាសថាសេដ្ឋកិច្ចរបស់ខ្លួនកំពុងធ្លាក់ចុះនិងប្រឈមមុខនឹងវិបត្តិថែមទៀតផង។
សេដ្ឋកិច្ចវេណេហ្ស៊ុយអេឡា កំពុងស្ថិតក្នុងវិបត្តិដោយសារបញ្ហាទណ្ឌកម្មសេដ្ឋកិច្ច និង ការបន្តធ្លាក់ចុះខ្លាំងនៃតម្លៃប្រេងឆៅនៅលើទីផ្សារអន្តរជាតិ ព្រោះវេណេហ្ស៊ុយអេឡាជាប្រទេសមួយក្នុងចំណោមប្រទេសដែលផលិតនិងនាំប្រេងចេញច្រើនផងដែរ។ បើតាមការអោយដឹងពីអ្នកជំនាញសេដ្ឋកិច្ច ៩៦ភាគរយនៃផលទុនសរុបក្នុងស្រុករបស់ប្រទេសវេណេហ្ស៊យអេឡាពឹងផ្អែកសំខាន់លើការនាំប្រេងចេញ ដែលនេះទើបបានជាវេណេហ្ស៊ុយអេឡាត្រូវជួបវិបត្តិនៅពេលតម្លៃប្រេងធ្លាក់ចុះយ៉ាងគំហុកបែបនេះ។ ដោយឡែក ក្រោយបញ្ចប់ការពិភាក្សានិងជំនួបទ្វេភាគីរវាងប្រទេសទាំង រដ្ឋាភិបាលវេណេហ្ស៊ុយអេឡាបានប្រកាសថា គម្រោងវិនិយោគថ្មីគ្របដណ្តប់វិស័យជាច្រើនរួមទាំងបច្ចេកវិទ្យា ហេដ្ឋារចនាសម្ព័ន្ធ គម្រោងនគរូបនីយកម្ម ជាដើមផងដែរ។
ប្រទេសចិនបានផ្តល់ប្រាក់កម្ចីរយៈពេលវែងដល់ប្រទេសវេណេហ្ស៊ុយអេឡាក្នុងទំហំប្រមាណ ៤២ពាន់លានដុល្លារអាមេរិក ប៉ុន្តែវេណេហ្ស៊ុយអេឡាបានសងប្រាក់កម្ចីនេះទៅចិនវិញអស់ចំនួន ២៤ពាន់លានដុល្លារហើយ។ ប្រទេសមហាអំណាចសេដ្ឋកិច្ចទីពីរពិភពលោក ចិននេះបានខិតខំពង្រីកការវិនិយោគរបស់ខ្លួននៅក្នុងតំបន់អាមេរិកឡាទីន និងពង្រឹងចំណងទំនាក់ទំនងការទូតជាមួយបណ្តាប្រទេសទាំងនោះ ដោយសម្លឹងឃើញប្រយោជន៍ច្រើនជាពិសេសប្រេងកាត។ យ៉ាងណាក៏ដោយក្នុងរយៈពេលប៉ុន្មានឆ្នាំចុងក្រោយនេះប្រទេសចិនបានបោះលុយអោយបណ្តាប្រទេសអាមេរិកខាងត្បូងខ្ចីក្នុងទំហំប្រមាណ ១០០ពាន់លានដុល្លារអាមេរិក ហើយថ្មីៗនេះមេដឹកនាំចិនប្រកាសបង្កើនប្រាក់កម្ចីអោយដល់២៥០ពាន់លានដុល្លារត្រឹមឆ្នាំ២០២៥ ។ ក្រៅពផ្តល់ប្រាក់កម្ចីដល់ប្រទេសវេណេហ្ស៊ុយអេឡាដើម្បីដោះស្រាយបញ្ហាសេដ្ឋកិច្ច ក្រុងប៉េកាំងបានផ្តល់កម្ចីដល់ប្រទេសEcuador ក្នុងទំហំ ៧.៥ ពាន់លានដុល្លារអាមេរិកផងដែរ ដ្បិដប្រទេសមួយនេះក៏រងគ្រោះដោយសារតម្លៃប្រេងឆៅធ្លាក់ចុះដូចគ្នា ៕
© រក្សាសិទ្ធិដោយ thmeythmey.com