ជាតិ
នយោបាយជាតិ
ព្រះអង្គម្ចាស់ រណឬទ្ធិ ជួបមន្ត្រី ហ្វ៊ុនស៊ិនប៉ិច បង្កើនភាពស្អិតល្មួតឡើងវិញមុនសមាជមកដល់
× ព្រះអង្គម្ចាស់នរោត្តម រណឬទ្ធិ បានជួបប្រជុំសំណេះសំណាលជាមួយមន្ត្រីថ្នាក់ដឹកនាំគណបក្សហ្វ៊ុនស៊ិនប៉ិចនៅព្រឹកថ្ងៃសៅរ៍ទី១០មករានេះ ដែលមានសហជីវិន សហជីវិនីចូលរួមជាង២០០នាក់នៅសាលកីឡា ប៊ីឡាញជ្រោយចង្វារ។ នៅក្នុងពិធីជួបជុំសំណេះសំណាលជាថ្មី ក្រោយពីខានជួបគ្នាអស់រយៈពេល៩ឆ្នាំ រវាងព្រះអង្គម្ចាស់នរោត្តម រណឬទ្ធិ ជាមួយក្រុមការងារនិងមន្ត្រីប្រតិបត្តិការរាជធានី -ខេត្តនៅព្រឹកនេះ គឺពោលពេញទៅដោយសំណើចសប្បាយក្អាកក្អាយ ជាមួយនិងបន្ទូលលេងសើចរបស់ព្រះអង្គម្ចាស់ នរោត្តម រណឬទ្ធិ នៅក្នុងពិធីនេះ ។
បើទោះជាមានការសើចសប្បាយយ៉ាងណាក៏ដោយ ប៉ុន្ដែសកម្មភាពរបស់សហជីវិន សហជីវិនីចូលរួមទាំងនោះ ហាក់ដូចជាមានសកម្មភាពស្ពឹក យឺតយ៉ាវ មិនស្រុះគ្នានោះទេ។ សកម្មភាពស្ពឹក មិនស្រុះគ្នានោះ គឺដោយសារពួកគេទាំងនោះ ហាក់ដូចជាមើលតាមបំណាំគ្នា និងរង់ចាំស្ដាប់ត្រាប់តាមព្រះរាជបន្ទូលរបស់ព្រះអង្គម្ចាស់ នរោត្តម រណឬទ្ធិ ក្នុងការបញ្ជាឲ្យពួកគេធ្វើអ្វីមួយ ទាំងការបញ្ជារឲ្យទះដៃ និងលើកដៃជាដើម។
បន្ទូលព្រះអង្គម្ចាស់នរោត្តម រណឬទ្ធិ៖«មើលខ្ញុំសូមឲ្យលើកដៃទាំងអស់គ្នាមើល ម៉េចក៏លើកដៃខ្លះអត់ខ្លះបែបនេះ លើកទាំងអស់គ្នាមក។ បើមានអ្នកនៅតែចង់ហូបសម្លរម្ជូរអំពិល សូមអញ្ជើញចេញទៅហូបសម្លរម្ជូរអំពិលទៅទ្វារនៅខាងនោះ»។
ជាមួយគ្នានោះព្រះអង្គម្ចាស់នរោត្តម រណឬទ្ធិ មានបន្ទូលបញ្ជារឲ្យ ក្រុមការងារ និងមន្ត្រីប្រតិបត្តិការរាជធានី -ខេត្ត ពង្រឹងរាជានិយមឡើងវិញ ដោយចុះប្រមូលអ្នកគាំទ្ររាជានិយម នៅតាមមូលដ្ឋានរបស់ពួកគេនីមួយៗ ដើម្បីក្លាយជាកម្លាំងជាតិ និងរួមគ្នាដោះស្រាយបញ្ហាជាតិ។
នៅថ្ងៃទី១៩ មករាខាងមុខ គណបក្សហ្វ៊ុនស៊ិនប៉ិចនឹងរៀបចំសមាជបោះឆ្នោតគាំទ្រថ្វាយព្រះអង្គម្ចាស់ នរោត្តម រណឬទ្ធិធ្វើជាប្រធានគណបក្សហ្វ៊ុនស៊ិនប៉ិចឡើងវិញ៕
© រក្សាសិទ្ធិដោយ thmeythmey.com