សង្គមអន្តរជាតិ
អន្តរជាតិ
ស្ថាបនិកហ្វេសប៊ុក៖ សូម្បីមនុស្សឆ្លាតបំផុតក៏មិនអាចបើកក្រុមហ៊ុនមួយម្នាក់ឯងដែរ
×
សហស្ថាបនិក និងជានាយកប្រតិបត្តិក្រុមហ៊ុនបណ្ដាញសង្គមហ្វេសប៊ុក លោក MarkZuckerbergដែលបច្ចុប្បន្នមានអ្នកប្រើប្រាស់ជាង ១,៣៥ ពាន់លាននាក់ជារៀងរាល់ខែនោះ បានអះអាងថា មនុស្សម្នាក់មិនគ្រប់គ្រាន់ដើម្បីបើកក្រុមហ៊ុនមួយទេ ទោះបីគេជាមនុស្សនោះឆ្លាតបំផុតយ៉ាងណាក៏ដោយ។ នេះបើយោងតាមគេហទំព័រ businessinsider។
នៅក្នុងវេទិកាសួរនិងឆ្លើយសំណួរមួយនៅទីក្រុង Bogotá ប្រទេសកូឡុំប៊ី មានមនុស្សម្នាក់បានសួរលោក Zuckerberg ពីពេលវេលាជាក់លាក់មួយ ដែលនាំឲ្យលោក និងមិត្តភក្ដិ បង្កើតបណ្ដាញសង្គមហ្វេសប៊ុកនេះឡើង។ លោកបានសើចរួចឆ្លើយថា គំនិតនៃការបង្កើតក្រុមហ៊ុនគឺវាមិនមែនកើតឡើងក្នុងពេលណាមួយនោះទេ គឺវាកើតឡើងតាមរយៈការគិត និងពិភាក្សាគ្នា ដែលពេលខ្លះវាអាចប្រើរយៈពេលយូរទៀតផង។
លោកបានបញ្ជាក់ទៀតថា ការខិតខំប្រឹងប្រែងរបស់មនុស្សម្នាក់គឺមិនទាន់គ្រប់គ្រាន់នោះទេ។ ផ្ទុយទៅវិញ គេត្រូវការមនុស្សមួយក្រុម ដែលធ្វើការលើគំនិតសម្របសម្រួលរួមគ្នាមួយ ក្នុងពេលវេលាដ៏យូរមួយ។អ្នកមិនចាំបាច់ត្រូវតែជាមនុស្សឆ្លាត ដើម្បីចាប់ផ្តើមក្រុមហ៊ុនផ្ទាល់ខ្លួនរបស់អ្នកនោះទេគឺអ្នកគ្រាន់តែត្រូវការតែចំណង់ និងផ្តោតទៅលើវាតែប៉ុណ្ណោះ។
លោក Zuckerbergយល់ឃើញថា ប្រព័ន្ធផ្សព្វផ្សាយគឺបានផ្សាយនូវសកម្មភាពនៃចាប់ផ្ដើមធ្វើអាជីវកម្មរបស់មនុស្សម្នាក់ ដែលវាបានលើកទឹកចិត្តមនុស្សឲ្យចាប់ផ្តើមបង្កើតក្រុមហ៊ុន ដោយការខិតខំប្រឹងប្រែងដោយខ្លួនឯង។ សម្រាប់លោកZuckerbergប្រព័ន្ធផ្សព្វផ្សាយគឺផ្សាយតែរូបភាពដែលមើលទៅ ហាក់ដូចជាមនុស្សដែលពូកែតែម្នាក់ អាចបង្កើតក្រុមហ៊ុនដ៏ល្អមួយ ដោយពួកគេសម្ភាសន៍តែមនុស្សម្នាក់ក្នុងក្រុមហ៊ុនមួយ។ ប៉ុន្តែនៅមានមនុស្សច្រើនទៀត ដែលចូលរួមក្នុងការធ្វើឲ្យអាជីវកម្មមួយបានទទួលជោគជ័យ៕
© រក្សាសិទ្ធិដោយ thmeythmey.com