ជាតិ
សេដ្ឋកិច្ច
ក្រសួងពាណិជ្ជកម្មនឹងកោះប្រជុំដើម្បីពិនិត្យតម្លៃសាំងរៀងរាល់១០ថ្ងៃម្ដង
× ក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ និងតំណាងអ្នកចែកចាយប្រេងឥន្ធនៈធំៗ ដែលធ្វើប្រតិបត្តិការនៅកម្ពុជា បានឯកភាពគ្នាទៅលើសំណើមួយដើម្បីបង្កើតឲ្យមាន ទម្រង់ការនៃប្រជុំពិនិត្យមើលថ្លៃប្រេងឥន្ធនៈ ដែលនឹងត្រូវធ្វើឡើងរៀងរាល់ ១០ ថ្ងៃម្តង នៅទីស្តីការក្រសួងពាណិជ្ជកម្ម។ នេះបើយោងតាមសេចក្ដីប្រកាសព័ត៌មាន ក្នុងគេហទំព័ររបស់ក្រសួងពាណិជ្ជកម្ម។
ទម្រង់ការនៃប្រជុំពិនិត្យមើលថ្លៃប្រេងឥន្ធនៈខាងលើនេះ ត្រូវបានធ្វើឡើងក្រោយពេល កិច្ចប្រជុំមួយ ដឹកនាំដោយ លោក ស៊ុន ចាន់ថុល កាលពីសប្ដាហ៍មុន។ នេះគឺជាកិច្ចប្រជុំលើកទីពីរ ដើម្បីពិភាក្សាអំពី ថ្លៃប្រេងឥន្ធនៈ ដែលជាអ្នកចែកចាយប្រេងនៅកម្ពុជា និងជាកិច្ចប្រជុំតាមដានបន្ទាប់មកពី កិច្ចប្រជុំលើកទីមួយដឹកនាំដោយ លោក គាត ឈន់ កាលពីខែវិច្ឆិកា ឆ្នាំ២០១៤ ដើម្បីបញ្ចុះតម្លៃប្រេងសាំងនោះ។
បើតាមសេចក្ដីប្រកាសព័ត៌មានដដែលនោះ លទ្ធផលនៃកិច្ចប្រជុំពិនិត្យតម្លៃសាំង រៀងរាល់ ១០ ថ្ងៃម្តងនោះ គឺនឹងត្រូវផ្សព្វផ្សាយ ជាសាធារណៈ តាមរយៈ ទូរទស្សន៍ វិទ្យុ សារព័ត៌មាន និងបណ្តាញសង្គម ដើម្បីឲ្យសាធារណៈជន បានដឹងជ្រួតជ្រាបផងដែរ។
នៅក្នុងកិច្ចប្រជុំលើកទី២ នេះដែរ លោក ស៊ុន ចាន់ថុល បានស្នើឲ្យអ្នកចែកចាយ ប្រេងឥន្ធនៈទាំងឡាយ ដែលជាម្ចាស់ស្ថានីយ៍ប្រេងឥន្ធនៈ អ្នកលក់រាយ ពិនិត្យលទ្ធភាព បញ្ចុះថ្លៃលក់រាយ របស់ខ្លួន ឲ្យស្របនឹងថ្លៃប្រេងពិភពលោក។
សូមបញ្ជាក់ថា ក្នុងរយៈពេលចុងឆ្នាំ២០១៤ និងដើមឆ្នាំ២០១៥ នេះ តម្លៃប្រេងនៅក្នុងទីផ្សារពិភពលោក បានដាំក្បាលចុះយ៉ាង ពីតម្លៃជាង ១០០ ដុល្លារក្នុងមួយធុង ចុះមកនៅក្រោម ៥០ ដុល្លារក្នុងមួយធុង។ ដោយឡែកតម្លៃប្រេងសាំងក្នុងប្រទេសកម្ពុជា ក៏បានត្រូវបានគេបញ្ចុះផងដែរ ប៉ុន្តែត្រូវបានគេមើលឃើញថា ការបញ្ចុះតម្លៃប្រេងពីសំណាក់ម្ចាស់ក្រុមហ៊ុនផ្គត់ផ្គង់ប្រេង មានល្បឿនយឺតជាង តម្លៃនៅលើទីផ្សារពិភពលោក។ ការទម្លាក់ថ្លៃបន្តិចម្ដងៗ នេះ គឺដោយសារតែក្រុមហ៊ុនផ្គត់ផ្គង់ប្រេងឥន្ទនៈ អះអាងថា ដើម្បីរង់ចាំលក់ប្រេងដែលនាំចូលកាលពីនៅថ្លៃឲ្យអស់សិន៕
© រក្សាសិទ្ធិដោយ thmeythmey.com