ខ្មែរក្រហម
ជាតិ
នយោបាយជាតិ
ជប៉ុនផ្តល់ថវិកាជាង១លាន៣សែនដុល្លារបន្ថែមទៀតដល់សាលាក្តីខ្មែរក្រហម
×
រដ្ឋាភិបាលជប៉ុនបានសម្រេចផ្តល់ជំនួយជាថវិកាថ្មីមួយបន្ថែមទៀត ដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក)។ ទឹកប្រាក់ជំនួយថ្មីនេះ មានចំនួន១,៣៨៥,៥៦៧ដុល្លារ។ នេះបើយោងសេចក្តីប្រកាសព័ត៌មានរបស់សាលាក្តីខ្មែរក្រហម កាលពីថ្ងៃទី១៩ខែមករា។
បើយោងតាមសេចក្តីព័ត៌មានរបស់រដ្ឋាភិបាលជប៉ុនប្រចាំកម្ពុជា កាលពីពេលថ្មីៗនេះបានឲ្យដឹងថា វិភាគទានថ្មីនេះ គឺដើម្បីបន្តទ្រទ្រង់ដំណើរការយុត្តិធម៌របស់សាលាក្តីខ្មែរក្រហម ដែលសម្រេចបាននូវព្រឹត្តិការណ៍ប្រវត្តិសាស្ត្រដ៏សំខាន់ មួយដោយបានចេញសាលក្រម ប្រឆាំងនឹងអតីតមេដឹកនាំជាន់ខ្ពស់ នៃរបបកម្ពុជាប្រជាធិបតេយ្យកាលពីខែសីហាឆ្នាំ២០១៤ និងខណៈពេល ដែលដំណើរការនីតិវិធីនៃបណ្តឹងឧទ្ធរណ៍ និងការជំនុំជម្រះថ្មីទើបនឹងចាប់ផ្តើម។
ប្រទេសជប៉ុនចាត់ទុកថា វាមានសារៈសំខាន់សម្រាប់ អ.វ.ត.ក ដើម្បីបន្តការកាត់ក្តីក្នុងរបៀបមួយមាន ភាពត្រឹមត្រូវ មានប្រសិទ្ធភាព និងឆាប់រហ័ស ដោយហេតុថាជនជាប់ចោទមានវ័យកាន់តែចាស់ជរា និងសុខភាពទន់ខ្សោយ និងដើម្បីសម្រេចបាននូវយុត្តិធម៌ ដែលកំពុងត្រូវបានទន្ទឹងរង់ចាំអស់រយៈពេលយ៉ាងយូរមកហើយសម្រាប់កម្ពុជា។
រដ្ឋាភិបាលជប៉ុនផ្តល់សារៈសំខាន់ទៅលើសាលាក្តីខ្មែរក្រហម ដោយផ្អែកលើទស្សនៈចំនួន៣ គឺទី១. ការកាត់ក្តីខ្មែរក្រហមគឺជាដំណាក់បញ្ចប់នៃដំណើរការស្វែងរកសន្តិភាពនៅកម្ពុជា ដើម្បីបង្ការទប់ស្កាត់ ការកើតមានឡើងវិញនៃអំពើឃោរឃៅ ដែលបានប្រព្រឹត្តឡើងនៅក្នុងរបបខ្មែរក្រហម ។ ទី២.សាលា ក្តីខ្មែរក្រហមនេះនឹងជួយស្វែងរកយុត្តិធម៌ជូនជនរងគ្រោះនៃរបបខ្មែរក្រហម ដែលប្រការនេះនឹងរួមចំ ណែកដល់ការផ្សះផ្សាជាតិឡើងវិញ និងទី៣. សាលាក្តីនេះ នឹងរួមចំណែកដល់ការពង្រឹងនីតិរដ្ឋនៅ កម្ពុជា។
រដ្ឋាភិបាលជប៉ុនជប៉ុន គឺជាប្រទេសផ្តល់ជំនួយធំបំផុតរបស់សាលាក្តីខ្មែរក្រហម ដោយបានផ្តល់ជំនួយប្រមាណជា៨២.៧៣លានដុល្លារ (គិតរួមទាំងវិភាគទានខាងលើ) ស្មើនឹងប្រហែល៣៦% នៃវិភាគទានអន្តរជាតិសរុប។ ប្រទេសជប៉ុនក៏ស្ថិតនៅក្នុងចំណោមប្រទេស ក្នុងឋានៈជាសហប្រធាននៃមិត្តរបស់ (អ.វ.ត.ក) ដែលបានតាមដានដំណើរការរបស់តុលាការនេះយ៉ាងយកចិត្តទុកដាក់ និងយ៉ាងសកម្ម។
សូមរំលឹកថា បើតាមគម្រោងថវិកាដែលបានអនុម័តរួច ដោយក្រុមប្រទេសផ្តល់ជំនួយសំខាន់ៗ នៅឆ្នាំ២០១៥នេះ សាលាក្តីខ្មែរក្រហម ត្រូវការថវិកាចំនួន២៨,៩ លានដុល្លារ ក្នុងនោះភាគីជាតិចំនួន ៦ លានដុល្លារ រីឯភាគីអន្តរជាតិចំនួន ២២,៩ លានដុល្លារ៕
© រក្សាសិទ្ធិដោយ thmeythmey.com