ជាតិ
សង្គមជាតិ
សាលាឧទ្ធរណ៍បដិសេធសំណើសុំនៅក្រៅឃុំរបស់ឪពុកម្តាយលោក ថោង សារ៉ាត
× ភ្នំពេញ៖ នៅថ្ងៃទី២០ ខែមករានេះ សភាស៊ើបសួរនៃសាលាឧទ្ធរណ៍បានសម្រេចបដិសេដ ការសុំនៅក្រៅឃុំរបស់ឳពុកម្តាយលោក ថោង សារ៉ាត គឺ លោក ថោង ចំរើន និងអ្នកស្រី កែវ សាវី ដែលជាប់ចោទពីបទរក្សាអាវុធទុកខុសច្បាប់ ។ បន្ទាប់ពីសេចក្តីសម្រេចបដិសេធ មេធាវីការពារក្តីឲ្យពួកគេ ក៏នឹងបន្តដាក់ពាក្យបណ្តឹងសាទុក្ខទៅកាន់តុលាការកំពូលផងដែរ។
មានសំឡេង
ការស្នើសុំនៅក្រៅឃុំរបស់ឪពុកម្តាយ លោក ថោង សារ៉ាត ដោយសំអាងលើបញ្ហាសុខភាព ធ្លាក់ចុះនោះ ត្រូវបានសាលាឧទ្ធរណ៍ច្រានចោល នៅព្រឹកថ្ងៃទី២០ មករានេះ។ ប្រធានក្រុម ប្រឹក្សាជំនុំជម្រះសាលាឧទ្ធរណ៍ លោក ឃុន លាងម៉េង បាននិយាយប្រាប់អ្នកសារព័ត៌មាន នាបរិវេណសាលាឧទ្ធណ៍ បន្ទាប់ពីសវនាការនៅព្រឹកថ្ងៃអង្គារនេះ ថា ការច្រានចោលសំណើនៅក្រៅឃុំរបស់សាលាឧទ្ធរណ៍នេះ ដោយសារតែនីតិវិធីរឿងក្តីកំពុងដំណើរការ។
ទាក់ទិននឹងការច្រានចោលនេះដែរ លោក ស៊ី សត្យា ដែលជាមេធាវីការពារក្តីឲ្យឪពុកម្តាយ លោក ថោង សារ៉ាត នោះ អះអាងថា លោកនឹងបន្តដាក់ពាក្យបណ្តឹងសារទុក្ខទៅតុលាការ កំពូលផងដែរ។ មេធាវីរូបនេះ បានចាត់ទុកការបដិសេដ របស់សាលាឧទ្ធរណ៍នេះថា ជារឿងអយុត្តិធម៌ ចំពោះកូនក្តីរបស់លោក ដោយលោកលើកហេតុផលថា ឪពុករបស់លោក ថោង សារ៉ាត កំពុងជួបបញ្ហាសុខភាពមិនអាចបន្តឃុំខ្លួននៅក្នុងពន្ធនាគារព្រៃស ទៀតបានឡើយ។
បន្ទាប់ពីចេញពីសវនាការនាថ្ងៃទី២០នេះដែរ លោកស្រី កែវ សាវី ដែលត្រូវជាម្តាយបង្កើត របស់ លោក ថោង សារ៉ាតនោះ បានបដិសេដមិននិយាយប្រាប់អ្នកសារព័ត៌មាននោះទេ។ ដោយឡែក ឪពុករបស់លោក ថោង សារ៉ាត់ លោក ថោង ចំរើន បាននិយាយយ៉ាងខ្លីថា លោកកំពុងធ្លាក់ខ្លួនឈឺ ហើយអាការៈរបស់លោកមិនងាយជាទេ។
គួររម្លឹកថា កាលពីថ្ងៃទី០៧ខែធ្នូឆ្នាំ២០១៤កន្លងមក ចៅក្រមស៊ើបសួរនៃសាលាដំបូង រាជធានីភ្នំពេញ លោក ស្វាយ តុច បានចេញដីកាឃុំខ្លួនឪពុកម្តាយលោក ថោង សារ៉ាត់ គឺលោក ថោង ចំរើន និង អ្នកស្រី កែវ សាវី បណ្តោះអាសន្ន នៅក្នុងពន្ធនាគារព្រៃស (ម ២១) ក្រោមការចោទប្រកាន់ពីបទ កាន់កាប់អាវុធដោយខុសច្បាប់។ សមត្ថកិច្ចនៃស្នងការដ្ឋាននគរ បាលរាជធានីភ្នំពេញ បានចុះឆែកឆររកឃើញអាវុធនៅក្នុងភូមិគ្រឹះរបស់ពួកគេនៅក្នុងបុរី ៩៩៩ ក្នុងសង្កាត់ចាក់អង្រែលើ។
យោងតាមមាត្រា ៤៩០ នៃក្រមព្រហ្មទណ្ឌ លោក ថោងចំរើន និង អ្នកស្រី កែវ សារី អាចនឹងត្រូវជាប់ពន្ធនាគារពី ៦ខែទៅ ៣ឆ្នាំនិងពិន័យជាប្រាក់ពី ១លានទៅ៦លានរៀល។
ក្រៅតែពី ការចាប់ឃុំខ្លួនឪពុកម្តាយលោក ថោង សារ៉ាតនោះ អង្គរក្ស ៤នាក់ផ្សេងទៀតរបស់លោកក៏ត្រូវចោទប្រកាន់ពីបទប្រព្រឹត្តផ្តើមគំនិត និងសមគំនិតផងដែរ។ ពួកគេត្រូវតុលាការសម្រេចឃុំខ្លួនបណ្តោះអាសន្នក្នុងពន្ធនាគារព្រៃស ហើយប្រសិនបើតុលាការរក ឃើញពិរុទ្ធភាពពិតមែននោះ ពួកគេអាចប្រឈមមុខជាប់ក្នុងពន្ធនាគារអស់មួយជីវិត។
គួរបញ្ជាក់ដែរថា បន្ទាប់ពីកើតមានករណីបាញ់សម្លាប់ ឧកញ៉ា អ៊ឹង ម៉េងជឺកាលពីថ្ងៃទី២២ខែវិច្ឆិកា ឆ្នាំ២០១៤តាមបណ្តោយផ្លូវព្រះសីហនុ ក្នុងសង្កាត់ទួលស្វាយព្រៃ២ខណ្ឌចំការមននោះ សមត្ថកិច្ចបានដាក់ការសង្ស័យលើលោក ថោង សារ៉ាត់ ដែលកំពុងរត់គេចខ្លួនជាមេឃាតក។ កន្លងមក លោក ថោង សារ៉ាត់បានស្នើសុំតាមរយៈវីដេអូក្លីបឲ្យគ្រួសារសព លោក អ៊ឹង ម៉េងជឺ ចេញមុខធ្វើជាសាក្សីចំពោះករណីឃាតកម្មនេះថា តើលោកពិតជាមេខ្លោងនៃការធ្វើឃាតនេះឬយ៉ាងណា? ហើយលោកបានចាត់ទុកករណីរបស់លោកជាការមូលបង្គាច់ទម្លាក់កំហុសទៅលើរូបលោក ម្តាយឪពុក និងអង្គរក្ស៤នាក់ផ្សេងទៀតផង។
តាមរយៈវីឌីអូនោះដែរ លោក ថោង សារ៉ាត បានស្នើឲ្យលោកនាយករដ្ឋមន្ត្រី ហ៊ុន សែននិងភរិយា ជួយអន្តរាគមន៍សើរើរឿងក្តីឡើងវិញ ដោយលោកនឹងចូលខ្លួនមកបំភ្លឺក្នុងតុលាការ ផងដែរ៕
© រក្សាសិទ្ធិដោយ thmeythmey.com