ជាតិ
សង្គមជាតិ
NBTC ប្រមូលបានឈាមបរិច្ចាគជាង៥ម៉ឺន២ពាន់ប្លោកនៅឆ្នាំ២០១៤
× នៅក្នុងឆ្នាំ២០១៤កន្លងទៅ មជ្ឈមណ្ឌលជាតិផ្តល់ឈាម(NBTC) ប្រមូលបានឈាមបរិច្ចាគសរុបចំនួន៥២,៨៦៧ប្លោក នៅទូទាំងប្រទេស ក្នុងនោះឈាមដែលបរិច្ចាគតាមការស្ម័គ្រចិត្តមានចំនួន ១៧,៧៩០ប្លោក ស្នើនឹង៣៨ភាគរយ នៃឈាមដែលប្រមូលបាន។ ដោយឡែកនៅទីក្រុងភ្នំពេញ មជ្ឈមណ្ឌលជាតិផ្តល់ឈាម ប្រមូលបានឈាមបរិច្ចាគសរុបចំនួន៣២,៦៤៨ប្លោក ក្នុងនោះឈាមដែលបរិច្ចាគតាមការស្ម័គ្រចិត្តមានចំនួន ១២,៣៤៦ប្លោក ស្នើនឹង៣៤ភាគរយនៃឈាមដែលបរិច្ចាគសរុប។ នេះបើយោងតាម កញ្ញា អ៊ូ បាណុង មន្ត្រីទំនាក់ទំនងសាធារណៈ នៃមជ្ឈមណ្ឌលជាតិផ្តល់ឈាម។
កញ្ញា អ៊ូ បាណុង បានប្រាប់សារព័ត៌មានថ្មីៗឲ្យដឹងទៀតថា នៅឆ្នាំ២០១៥នេះ មជ្ឈមណ្ឌលជាតិផ្តល់ឈាម នឹងប្រមូលបានឈាមដែលជាការបរិច្ចាគដោយស្ម័គ្រចិត្តពីសប្បុរសជន ឲ្យបានច្រើនជាង៥០ភាគរយ នៃឈាមដែលប្រមូលបានសរុប ដើម្បីផ្គត់ផ្គង់តម្រូវការឈាមនៅក្នុងប្រទេស។
បើតាមន្ត្រីទំនាក់ទំនងសាធារណៈ នៃមជ្ឈមណ្ឌលជាតិផ្តល់ឈាមដដែល ដើម្បីឱ្យការប្រមូលឈាមបានតាមផែនការគ្រោងទុក មជ្ឈមណ្ឌលជាតិផ្តល់ឈាម នឹងបង្កើនយុទ្ធនាការអប់រំផ្សព្វផ្សាយ នៅតាមសាកលវិទ្យាល័យ អង្គការ និងនៅតាមមូលដ្ឋាន ដោយជំរុញយុវជនឱ្យមកបរិច្ចាគឈាមដោយស្ម័គ្រចិត្តជាទៀងទាត់ និងច្រើនដង ជាពិសេស មជ្ឈមណ្ឌលជាតិផ្តល់ឈាម ក៏ស្នើសុំទៅដល់ ជាពិសេសក្រសួង និងស្ថាប័នរដ្ឋ ត្រូវចូលរួមបរិច្ចាគឲ្យបានច្រើនជាងនេះបន្ថែមទៀត។
ឈាមដែលប្រមូលបានពីសប្បុរសជន មជ្ឈមណ្ឌលជាតិផ្តល់ឈាម បានធ្វើការបែងចែក ទៅឱ្យមន្ទីរពេទ្យនានា ដើម្បីសង្គ្រោះជីវិតអ្នកជំងឺដែលត្រូវការឈាម ដូចជាការសម្រាលកូន អ្នកគ្រោះថ្នាក់ចរាចរណ៍ និងអ្នកដែលត្រូវការវះកាត់ជាដើម។ បច្ចុប្បន្នការបរិច្ចាគឈាមដោយស្ម័គ្រចិត្តមានចំនួនត្រឹម៣៥ភាគរយ ប៉ុណ្ណោះចំណែក៦៥ភាគរយទៀតជាការដោះដូរអំណោយឈាមតាមរយៈសាច់ញាតិអ្នកជំងឺ ខណៈដែលកម្ពុជាត្រូវការឈាមចំនួន១៥០ប្លោកក្នុងមួយថ្ងៃ ដើម្បីសង្គ្រោះជីវិតមនុស្ស៕
© រក្សាសិទ្ធិដោយ thmeythmey.com