ជាតិ
នយោបាយជាតិ
មេបក្សប្រឆាំងជំរុញឲ្យបន្ដវែកមុខជនល្មើសជូនលោកជា វិជ្ជា
× លោក សម រង្ស៊ី និង លោក កឹម សុខា ប្រធាននិង អនុប្រធានបក្សប្រឆាំង នៅតែជំរុញទាមទារឲ្យតុលាការបន្ដការស្វែងរកឃាតករសម្លាប់លោក ជា វិជា្ជ ដើម្បីរកយុត្តិធម៌ជូនរូបលោក និងគ្រួសារ។ ការជំរុញនេះ គឺធ្វើឡើងនៅក្នុងពិធីបង្សុកូលគម្រប់ខួប១១ឆ្នាំ នៃការស្លាប់របស់លោក ជា វិជ្ជា នៅថ្ងៃទី ២២ មករានេះ ។
ប្រធានបក្សប្រឆាំង លោក សម រង្ស៊ី បានជំរុញឲ្យមានបើកការស៊ើបអង្កេត និងចាត់វិធានការដោយតុលាការឯករាជ្យមួយ ដើម្បីរកជនដៃដល់ដែលសម្លាប់លោក ជា វិជ្ជា ស្វែងរកយុត្តិធម៌ជូនរូបលោក។ លោកបន្ថែមថា ៖«យើងជំរុញឲ្យមានការស្វែងរកយុត្តិធម៌ជូនជនរងគ្រោះ។ បើទោះមានការសម្លាប់យូរឆ្នាំមកហើយ យើងមិនអាចបំភ្លេចភាពឃោរឃៅអមនុស្សធម៌មកលើជនរងគ្រោះស្លូតត្រង់។ ដូច្នេះយើងត្រូវតែជំរុញឲ្យមានការស៊ើបអង្កេត ចាត់ការពីសំណាក់តុលាការឯករាជ្យ។ ថ្ងៃណាមួយយុត្តិធម៌ នឹងមានដល់ជនរងគ្រោះយកមកផ្ដន្ទាទោសតាមផ្លូវច្បាប់»។
លោក កឹម សុខា អនុប្រធានបក្សប្រឆាំង ក៏ជំរុញឲ្យមានការបន្ដរកយុត្តិធម៌ជូនការស្លាប់របស់លោក ជា វិជ្ជាផងដែរ ដោយលោកថាភាពយុត្តិធម៌នឹងកើតមានចំពោះលោក ជា វិជ្ជា និងគ្រួសារលោកនៅថ្ងៃណាមួយជាក់ជាមិនខាន។ «យើងជឿជាក់ថាភាពយុត្តិធម៌ជូនលោក ជា វិជ្ជា នៅថ្ងៃណាមួយយើងនឹងរកបានមិនខាន ដូច្នេះសូមបងប្អូនទាំងអស់បន្ដជាមួយយើងខ្ញុំ បន្តតាមដានរកយុត្តិធម៌ជូនលោក ជា វិជ្ជា ឲ្យបានជាដាច់ខាត»។ នេះជាការអះអាងរបស់លោក កឹម សុខា។
លោក ជា មុន្នី ប្រធានសហជីពសេរីកម្មករនិងត្រូវជាប្អូនបង្កើតរបស់លោក ជា វិជ្ជាបានប្រកាសថា រូបលោកនៅតែទាមទាឲ្យតុលាការបន្ដស្វែងរកឃាតករសម្លាប់លោក ជា វិជ្ជា ដើម្បីរកយុត្តិធម៌ជូនបងប្រុសលោកដដែល។ ប្រធានសហជីពរូបនេះបន្ថែមថា៖«ខ្ញុំមិនទម្លាក់ចោលការទាមទានោះទេ។ ខ្ញុំនៅតែទាមទារឲ្យតុលាការស្វែងអ្នកសម្លាប់បងខ្ញុំ ដើម្បីរកយុត្តិធម៌ជូនគាត់។ ខ្ញុំនឹងព្យាយាមទាមទារដដែល»។
អ្នកចូលរួមនៅក្នុងពិធីបង្សុកូលគម្រប់ខួប១១ឆ្នាំ នៃការស្លាប់របស់លោក ជា វិជ្ជា នៅព្រឹកថ្ងៃព្រហស្បតិ៍នេះ មានចំនួនជាង២០០នាក់ ក្នុងនោះមានថ្នាក់ដឹកនាំសហជីព អ្នកនយោបាយ សកម្មជនសិទ្ធិមនុស្ស និងប្រជាពលរដ្ឋផងដែរ។លោក ជា វិជ្ជា ត្រូវបានខ្មាំងកាំភ្លើងបាញ់សម្លាប់នៅក្បែរតូបលក់កាសែតមួយកន្លែង ស្ថិតនៅម្ដុំក្បែរវត្តលង្ការ កាលពីថ្ងៃទី២២ មករា ឆ្នាំ២០០៤ កន្លងទៅ ខណៈដែលរូបលោកកំពុងអង្គុយអានកាសែតនៅទីនោះ៕
© រក្សាសិទ្ធិដោយ thmeythmey.com