ជាតិ
សង្គមជាតិ
ពលរដ្ឋកម្ពុជា នឹងមានអគ្គិសនីប្រើប្រាស់គ្រប់គ្នានៅឆ្នាំ២០២០
× អាជ្ញាធរអគ្គិសនីកម្ពុជា នឹងពង្រីកដែនផ្គត់ផ្គង់អគ្គិសនីទៅទីជនបទដាច់ស្រយាលឲ្យបាន១០០ភាគរយនៅឆ្នាំ២០២។ ការជំរុញការផ្គត់ផ្គត់ថាមពលអគ្គិសនី ទៅកាន់ភូមិផ្សេងៗនៅជនបទនេះ គឺដើម្បីធ្វើឱ្យប្រជាពលរដ្ឋ បានរស់នៅក្នុងស្ថានភាពកាន់តែប្រសើរ និងអាចពន្លឿនកំណើនសេដ្ឋកិច្ចផងដែរ តាមរយៈមានអគ្គិសនីប្រើប្រាស់គ្រប់គ្រាន់ និងមានតម្លៃសមរម្យ។ នេះបើតាមការឲ្យដឹងពី លោក ទី ថានី នាយកប្រតិបត្តិអាជ្ញាធរអគ្គិសនីកម្ពុជា។
ថ្លែងនៅក្នុងសន្និបាតបូកសរុបការងារអគ្គិសនីជនបទ កាលពីថ្ងៃទី២១ ខែមករា នៅសណ្ឋាគារកាំបូឌីយ៉ាណា លោក ទី ថានី បានមានប្រសាសន៍បន្ថែមទៀតថា៖« ដើម្បីឈានទៅសម្រេចបានតាមផែន ការ នៅឆ្នាំ២០១៥នេះ រាជរដ្ឋាភិបាលនឹងជំរុញការពង្រីក ទៅកាន់ភូមិផ្សេងៗទៀត ឱ្យបានចំនួន១៥ភាគរយបន្ថែមទៀត ក្នុងចំណោមភូមិជាង ៣.០០០ភូមិ ដែលកំពុងអភិវឌ្ឍន៍តភ្ជាប់បណ្តាញអគ្គិសនី»។
សូមបញ្ជាក់ថា ប្រជាពលរដ្ឋជាង១,៣លានខ្នងផ្ទះនៅទូទាំងប្រទេស កំពុងប្រើប្រាស់អគ្គិសនី ដោយឡែកភូមិដែលទទួលបានអគ្គិសនីប្រើប្រាស់រួចហើយ គឺមានចំនួន៨.៤៨៩ភូមិ ស្មើនឹងជាង៦០% ភូមិ ដែលកំពុងរៀបចំភ្ជាប់បណ្តាញអគ្គិសនី មានចំនួនជាង៣.០០០ភូមិ ស្មើនឹងជាង២៥% និងភូមិដែលមិនទាន់មានអគ្គិសនីទៅដល់ទាំងស្រុងមាន២.១៦៨ភូមិ ស្មើនឹង១៥%។
យោងតាមបទបង្ហាញរបស់ក្រសួងរ៉ែ និងថាមពល បានឱ្យដឹងថានៅឆ្នាំ២០១៧ កម្ពុជាមិនខ្វះអគ្គិសនីប្រើប្រាស់ទៀតឡើយ ព្រោះបច្ចុប្បន្នកម្ពុជាទទួលបានប្រភពថាមពលអគ្គិសនីពីស្ថានីយវារីអគ្គិសនីជាច្រើនកន្លែង រួមជាមួយនឹងថាមពលអគ្គិសនី បានពីការប្រើប្រាស់ធ្យូងថ្មទៀតផង។ ជាមួយគ្នានោះ រាជរដ្ឋាភិបាលក៏បានចុះកិច្ចព្រមព្រៀង និងកំពុងសិក្សាគម្រោងបង្កើតស្ថានីយវារីអគ្គិសនីជាង២០គម្រោង បន្ថែមទៀត ជាមួយក្រុមហ៊ុនក្នុងស្រុក និងក្រុមហ៊ុនបរទេស៕
© រក្សាសិទ្ធិដោយ thmeythmey.com