ជាតិ
កម្ពុជាធ្វើតាមសំណើរកូរ៉េខាងជើងក្នុងការទប់ស្កាត់ការផ្សព្វផ្សាយរឿង The Interview
× កម្ពុជាក្នុងនាមជាប្រទេសអាស៊ានដែលមានចំណងការទូតយូរជាងគេជាមួយកូរ៉េខាងជើង បានយល់ព្រមតាមសំណើរក្រុងព្យុងយ៉ាងក្នុងការទប់ស្កាត់ការផ្សព្វផ្សាយរឿង The Interview។ The Interview ដែលផលិតដោយក្រុមហ៊ុន Sony Pictures ត្រូវបានចាត់ទុកថា ជាខ្សែភាពយន្តដែលប្រមាថដល់មេដឹកនាំកំពូលកូរ៉េខាងជើង គឺលោក គឹម ជុងអ៊ុន។
ក្រោយទទួលបានកំណត់ទូតតវ៉ាពីស្ថានទូតកូរ៉េខាងជើង កាលពីថ្ងៃទី៨ ខែមករា លោក ឡុង វិសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានសុំកិច្ចសហការពីសំណាក់ក្រសួងព័ត៌មាន និងក្រសួងវប្បធម៌ និងវិចិត្រសិល្បៈ ដើម្បីចាត់វិធានការទប់ស្កាត់ការផ្សព្វផ្សាយរឿង The Interview។
ទោះបីជាយ៉ាងណាក៏ដោយ ពលរដ្ឋខ្មែរមួយចំនួនបានទស្សនារឿងនេះរួចហើយតាមបណ្តាញអ៊ីនធ័រណិត។ បន្ថែមពីលើនេះ គេសង្កេតឃើញមានការថតចម្លងពីអ៊ីនធ័រណិត និងដាក់លក់ចែកចាយនៅទីផ្សាមួយចំនួននៅកម្ពុជា។ ភាគីកូរ៉េចាត់ទុកសកម្មភាពនេះ ជាការឃុបឃិតមួយដោយកម្លាំងអមិត្តនាំឲ្យបែកបាក់ដល់ទំនាក់ទំនងប្រទេសទាំងពីរ។
លោក ឡុង វិសោលា បានសរសេរថា៖ «ស្ថានទូតសាធារណរដ្ឋប្រជាមានិតប្រជាធិបតេយ្យកូរ៉េនៅភ្នំពេញ ស្នើកម្ពុជាចាត់វិធានការបញ្ឈប់ការលក់ខ្សែភាពយន្តនេះ និងស្នើកុំឲ្យមានការចាក់ផ្សាយនៅតាមស្ថានីយ៍ទូរទស្សន៍ ឬការចាក់បញ្ចាំងតាមរោងភាពយន្តនៅកម្ពុជា»៕
© រក្សាសិទ្ធិដោយ thmeythmey.com