ជាតិ
សង្គមជាតិ
បទល្មើសសេដ្ឋកិច្ចជាង៥០០ករណី ត្រូវបានបង្ក្រាបនៅឆ្នាំ២០១៤
× នៅក្នុងឆ្នាំ២០១៤ នាយកដ្ឋាននគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ បង្ក្រាបបទល្មើសសេដ្ឋកិច្ចបានជាង៥០០ករណី នៅទូទាំងប្រទេស។ បទល្មើសទាំងនោះ រួមមានបទល្មើសព្រៃឈើ បទល្មើសជលផល បទល្មើសកម្មសិទ្ធិបញ្ញា បទល្មើសគេចពន្ធទំនិញខុសច្បាប់ ដែលមានទំនិញក្លែងក្លាយ ខូចគុណភាព និងហួសកាលបរិច្ឆេទជាដើម។
ដោយឡែក សម្រាប់ឆ្នាំ២០១៥នេះ នាយកដ្ឋាននគរបាលប្រឆាំងបទល្មើសសេដ្ឋកិច្ច នឹងមានផែនការបង្កើនការចុះអនុវត្តកិច្ចសហប្រត្តិការបង្ក្រាប ទប់ស្កាត់បទល្មើសទាំងនេះ ដើម្បីចៀសវាងផលប៉ះពាល់ដល់សុខភាពអ្នកប្រើប្រាស់។ នេះបើតាមការបញ្ជាក់ របស់ លោក នេត សាវឿន អគ្គស្នងការនគរបាលជាតិ។
លោក នេត សារឿន ក៏បានជំរុញឲ្យមន្ត្រីពាក់ព័ន្ធបង្កើនការយកចិត្តទុកដាក់បន្ថែមទៀត ដើម្បីទប់ស្កាត់ការធ្វើចរាចរណ៍នូវទំនិញគេចពន្ធខុសច្បាប់ និងទំនិញក្លែងក្លាយទាំងអស់នេះ ដែលអាចបង្កឲ្យមានអន្តរាយដល់សង្គមជាតិទាំងមូល។
សូមរំលឹកថា កាលពីថ្ងៃទី២០ ខែមករាកន្លងទៅថ្មីៗនេះ សមត្ថកិច្ចក្រសួងមហាផ្ទៃចុះបង្ក្រាបទីតាំងផលិតកាហ្វេក្លែងក្លាយមួយកន្លែងនៅចំណុចភូមិបន្លាស្អិតសង្កាត់ឃ្មួញខណ្ឌសែនសុខរាជធានីភ្នំពេញ។ នៅក្នុងប្រតិបត្តិការនោះ សមត្ថកិច្ចឃាត់ខ្លួន បានជនសង្ស័យចំនួន៤នាក់ និងរឹបអូសបានវត្ថុតាងជាច្រើន រួមមានសារធាតុគីមីចំនួនជិត២០មុខនិងវត្ថុធាតុដើមមានសណ្ដែកសៀងគ្រាប់ពោតអំបិលស្ករសស្ករត្នោតខ្ទិះដូងសរុប ទម្ងន់៣៤,៩៤១តោន។
តែយ៉ាងណាក៏ដោយ ជនសង្ស័យចំនួន៤នាក់នោះ ត្រូវបានតំណាងអយ្យការ លោកតុប ឈុនឡុង ព្រះរាជអាជ្ញារង អមសាលាដំបូងរាជធានីភ្នំពេញបានសម្រេចដោះលែងឲ្យមានសេរីភាពវិញកាលពីពេលថ្មីៗនេះ។ចំពោះការដោះលែងជនសង្ស័យទាំង៤នាក់ខាងលើនេះ នៅមិនទាន់មានការបញ្ជាក់ព័ត៌មានច្បាស់លាស់ណាមួយពីលោកតុប ឈុនឡុង ព្រះរាជអាជ្ញារង អមសាលាដំបូងរាជធានីភ្នំពេញនៅឡើយនោះទេ៕
© រក្សាសិទ្ធិដោយ thmeythmey.com