ជាតិ
នយោបាយជាតិ
ពលរដ្ឋខ្មែរចាប់ពីអាយុ ៤៥ ឡើងទៅប្រឈមនឹងចាញ់បោកអ្នកនយោបាយខ្ពស់
× ជាញឹកញាប់ពលរដ្ឋខ្មែរមួយចំនួន តែងតែក្លាយជាឧបករណ៍ប្រើប្រាស់ដើម្បីទាក់ទាញផលប្រយោជន៍របស់អ្នកនយោបាយខ្មែរអត្មានិយម ។ នៅកម្ពុជា បើទោះបីជាប្រទេសនេះ ទទួលយករបបលទ្ធិប្រជាធិបតេយ្យជាង ២០ ឆ្នាំកន្លងមកហើយក្តី ក៏ចំនួនពលរដ្ឋដែលត្រូវអ្នកនយោបាយបោកប្រាស់មានកម្រិតគួរឲ្យកត់សម្គាល់។ អ្នកតាមដានស្ថានការណ៍សង្គមកម្ពុជា អះអាងថា ក្នុងចំណោមពលរដ្ឋខ្មែរទាំងអស់ ពលរដ្ឋដែលមានវ័យចំណាស់ ពោលគឺចាប់ពីអាយុ ៤៥ ឡើងទៅប្រឈមមុខនឹងចាញ់បោកអ្នកនយោបាយច្រើន។
« ពលរដ្ឋខ្មែរដែលមានអាយុចាប់ពី ៤៥ ឆ្នាំឡើងទៅ ប្រឈមមុខនឹងការចាញ់បោកអ្នកនយោបាយខ្ពស់ » ។ នេះបើស្តាប់តាមសម្តីរបស់អ្នកអង្កេតស្ថានការណ៍សង្គមជាង ២០ ឆ្នាំ លោក ជាង សុខា នាយកប្រតិបត្តិអង្គការកម្មវិធីអភិវឌ្ឍន៍ធនធានយុវជន។ បើទោះបីជាគ្មានការស្រាវជ្រាវឲ្យច្បាស់លាស់ក៏ពិតមែន តែអ្នកអង្កេតស្ថានការណ៍សង្គមរូបនេះ បញ្ជាក់ថា មានកត្តាពីរសំខាន់ ដែលពលរដ្ឋវ័យចំណាស់ទាំងនោះ ងាយនឹងធ្វើឲ្យអ្នកនយោបាយអាត្មានិយមបោកបាន។ ទី១ គឺដោយសារបញ្ហាសង្គ្រាមស៊ីវិល ធ្វើឲ្យពលរដ្ឋដែលធ្លាប់ឆ្លងកាត់សង្គ្រាមទាំងនោះ ពួកគេភាគច្រើនមានការភ័យខ្លាច ទន់ជ្រាយ ខ្លាចសង្គ្រាមកើតឡើងម្តងទៀត។ ពីព្រោះថា ពលរដ្ឋទាំងនោះ មិនសូវបានយល់ដឹងពីស្ថានការណ៍សង្គម និងការប្រែប្រួលរបស់ពិភពលោក ដែលងាយនឹងឲ្យអ្នកនយោបាយគ្មានមនសិការ បោកប្រាស់បានស្រួល។
ចំណុចទី ២ ដែល ជាង សុខា អះអាងថា ងាយនឹងធ្វើឲ្យពលរដ្ឋចាស់ៗចាញ់បោកអ្នកនយោបាយដែរនោះ គឺដោយសារស្ថានការណ៍សេដ្ឋកិច្ចប្រែប្រួល នៅក្នុងប្រទេសកំពុងអភិវឌ្ឍន៍ដូចជាកម្ពុជាបញ្ហាសម្ភារៈនិយម ធ្វើឲ្យអ្នកនយោបាយខ្លះ ឆ្លៀតយកបញ្ហាទាំងនេះទៅអួតប្រាប់ពលរដ្ឋ ដើម្បីកេញចំណេញផលប្រយោជន៍ ។ លោកថា ត្រង់ចំណុចនេះ មិនមែនតែមនុស្សចាស់ទេ ដែលចាញ់បោកអ្នកនយោបាយ តែយុវជនមួយចំនួនក៏កំពុងតែបណ្តោយខ្លួនឲ្យអ្នកនយោបាយយកធ្វើជាឈ្នាន់តោងយកអំណាចផងដែរ។
ដោយឡែក ចំពោះពលរដ្ឋដែលមានអាយុចាប់ពី ៤៥ ឆ្នាំចុះ អ្នកអង្កេតស្ថានការណ៍សង្គមរូបនេះ ជឿជាក់ថា មានអត្រាចាញ់បោកអ្នកនយោបាយទាបជាងមនុស្សចាស់ ពីព្រោះតែពួគេ ភាគច្រើន បានយល់ដឹងពីស្ថានការណ៍សង្គមជ្រៅជ្រះ តាមដានស្ថានភាពនយោបាយក្នុងប្រទេស និងក្រៅប្រទេស ជាពិសេសគឺមិនធ្លាប់ឆ្លងកាត់សង្គ្រាមស៊ីវិល។
ងាកមកចាប់អារម្មណ៍ពីទស្សនៈរបស់អ្នកស្រាវជ្រាវសង្គម លោក កែម ឡី វិញម្តង ។ អ្នកវិភាគរូបនេះ ក៏ទទួលស្គាល់ថា នៅកម្ពុជាពលរដ្ឋចាស់ៗ ប្រឈមនឹងចាញ់អ្នកនយោបាយខ្ពស់ដែរ ដោយសារតែពួកគាត់ មានគំនិតបាក់ស្បាតលែងចង់ដឹងពីស្ថានការណ៍អ្វីទាំងអស់ ហើយគាំទ្រផ្តាប់មុខ ។ តែលោក កែម ឡី ក៏មិនភ្លេចរិះគន់ពលរដ្ឋជំនាន់ក្រោយមួយចំនួនដែលជាយុវជន និងបញ្ញវន្ត មានចំណេះដឹងហើយ តែមើលមិនឃើញភាពអាក្រក់នៅខាងក្នុងរបស់អ្នកនយោបាយ ដូចជា បញ្ហាគ្រួសារនិយម ពុករលួយ ដោយឃើញតែរូបខាងក្រៅរបស់អ្នកនយោបាយដែលពូកកែនិយាយ ក្លាយហាន ក៏គិតថា អ្នកនិយាយបាយទាំងនោះល្អ ទើបទីបំផុតបានត្រឹមតែជាជនរងគ្រោះសម្រាប់គេប្រើប្រាស់ប៉ុណ្ណោះ។
នៅចំពោះមុខបញ្ហាទាំងអស់នេះ លោក កែម ឡី និងលោក ជាង សុខា មានគំនិតដូចគ្នាថា ប្រសិនបើបញ្ហាទាំងនេះ នៅតែកើតមានទៀត កម្ពុជាគ្មានថ្ងៃរីកចម្រើនឈ្នះ សូម្បីតែប្រទេសនៅក្នុងតំបន់។ ដើម្បីកុំឲ្យចាញ់បោកអ្នកនយោបាយ លោកទាំងពីរ បានឲ្យយោបល់ប្រហាក់ប្រហែលគ្នាថា ពលរដ្ឋគ្រប់រូប ត្រូវយល់ដឹងពីតួនាទី និងសិទ្ធិរបស់ខ្លួន ដែលមានកំណត់នៅក្នុងរដ្ឋធម្មនុញ្ញជាស្រេច ហើយយកតួនាទី និងសិទ្ធិទាំងនោះទៅប្រើប្រាស់ ដើម្បីបោសសម្អាតអ្នកនយោបាយស្មោកគ្រោក ។ ជាងនេះទៅទៀត ការតាមដានសកម្មភាពអ្នកនយោបាយឲ្យបានទៀងទាត់ និងស្តាប់ព័ត៌មាន បង្កើនចំណេះដឹងផ្ទាល់ៗខ្លួន គឺជាអ្វីដែលលោក កែម ឡី និងលោក ជាង សុខា ថា មិនអាចខ្វះបាន៕
© រក្សាសិទ្ធិដោយ thmeythmey.com