ជាតិ
សង្គមជាតិ
ក្រសួងមហាផ្ទៃ និងសុខាភិបាលប្រកាសប្រឆាំងសេវាពេទ្យខុសច្បាប់ ខណៈផ្ទុះជំងឺអេដស៍
× ភ្នំពេញ៖ នៅថ្ងៃទី០២ ខែកុម្ភៈម្សិលមិញនេះ ក្រសួងមហាផ្ទៃ និងក្រសួងសុខាភិបាល បានប្រកាសរួមនិងផែនការអនុវត្តន៍រួមស្តីពីការគ្រប់គ្រងគុណភាពសេវាកម្មនិងវិធានការទាប់ស្កាត់ការធ្វើចរាចរណ៍ផលិតផលសុខាភិបាលខុសច្បាប់និងសេវាសុខាភិបាលឯកជនខុសច្បាប់ ដើម្បីសុខភាព និងសុវត្ថិភាពសង្គមរវាងក្រសួងមហាផ្ទៃ និងក្រសួងសុខាភិបាល។ នេះបើយោងតាមការផ្សាយរបស់អគ្គស្នងការដ្ឋាននគរបាលជាតិ។
យោងតាមអគ្គស្នងការដ្ឋាននគរបាលជាតិពិធីប្រកាសរួមនេះធ្វើឡើង បន្ទាប់ពីមានពលរដ្ឋ ជាង ២០០នាក់ក្នុងឃុំរកា ខេត្តបាត់ដំបងបានឆ្លងជំងឺអេដស៍។ ថ្លែងនៅក្នុងពិធីនោះ លោក ឯម សំអាន រដ្ឋមន្ត្រីស្តីទីនៃក្រសួងមហាផ្ទៃបានចាត់ទុកការផ្តល់សេវាសុខាភិបាលខុសច្បាប់ ការចរាចរណ៍ការចែកចាយផលិតផលសុខាភិបាលខុសច្បាប់ និងការផ្សំគំនិតគឺជាអំពើអមនុស្សធម៌ដែលតែងតែធ្វើឲ្យសុខភាពនិងជីវិតរបស់នៅរបស់ប្រជាពលរដ្ឋទទួលរងនូវការគ្រោះថ្នាក់ធ្ងន់ធ្ងរ។
មន្ត្រីជាន់ខ្ពស់ប៉ូលីសរូបនេះ បានស្នើឲ្យសមត្ថកិច្ចគ្រប់លំដាប់ថ្នាក់ចាត់វិធានការប្រឆាំងនឹងការផ្តល់សេវាសុខាភិបាលខុសច្បាប់ដើម្បីពង្រឹងសេវាថែទាំសុខភាពជូនប្រជាពលរដ្ឋនៅទូទាំងប្រទេសកម្ពុជា។
ជាមួយគ្នានេះដែរ លោក ម៉ម ហេង រដ្ឋមន្ត្រីក្រសួងសុខាភិបាលទើបតែបានដាក់ចេញនូវវិធានការពង្រឹងការត្រួតពិនិត្យរបស់មន្ទីរសុខាភិបាលរាជធានី ខេត្ដក្នុងការតាមដាន និងការអនុវត្ដ ឱ្យបានត្រឹមត្រូវដល់ការបើកសេវាសុខាភិបាល គ្លីនិកឯកជន និងកន្លែងព្យាបាលជំងឺផ្សេងទៀតផងដែរ។
គួររម្លឹកថា កាលពីខែធ្នូ ឆ្នាំ២០១៤ កន្លងមកនេះពលរដ្ឋឃុំរកា ខេត្តបាត់ដំបងជាង២០០នាក់បានរកឃើញឆ្លងមេរោគអេដស៍ ក្នុងចំណោមពលរដ្ឋជាង ២ពាន់នាក់ ដែលបានធ្វើតេស្ដឈាមរកមេរោគអេដស៍។ ក្រសួងសុខាភិបាល បានរកឃើញថា ពលរដ្ឋទាំងនោះឆ្លងមេរោគ អេដស៍ តាមរយៈការប្រើប្រាស់ម្ជុលចាក់ថ្នាំ និងសេរ៉ូមរួមគ្នា៕
© រក្សាសិទ្ធិដោយ thmeythmey.com