ជាតិ
នយោបាយជាតិ
អាមេរិក ប្រកាសជួយដោះស្រាយបញ្ហាប្រឈមក្នុងតំបន់ទន្លេមេគង្គក្រោម
× រដ្ឋាភិបាលសហរដ្ឋអាមេរិក និងរដ្ឋាភិបាលឡាវបានប្រកាសរួមគ្នា ចាប់ផ្តើមអនុវត្តគំនិតផ្តួចផ្តើមថាមពលមេគង្គប្រកបដោយចីរភាព នាថ្ងៃទី២កុម្ភៈនៅក្នុងខេត្តប៉ាក់សេ ប្រទេសឡាវ។ នោះគឺជាកិច្ចប្រជុំដំបូងរវាងប្រទេសសមាជិកតំបន់ទន្លេមេគង្គក្រោម និងក្រុមអ្នកសម្របសម្រួលនៃប្រទេសផ្តល់ជំនួយ ដើម្បីពិភាក្សាអំពីពាក់ព័ន្ធគ្នារវាងធនធានទឹក សុវត្ថិភាពអាហារ និងការទាញយកថាមពល។
អ្នកជំនាញរបស់សហរដ្ឋអាមេរិកជាច្រើនបានចូលរួមក្នុងកិច្ចប្រជុំអន្តរជាតិមួយនេះ និងបានអមដំណើរប្រធានប្រតិភូអាមេរិកគឺអនុរដ្ឋមន្ត្រីការបរទេសអាមេរិក លោក Tom Shannon និងទីប្រឹក្សាជាន់ខ្ពស់លោក David Thorne។ នៅក្នុងកិច្ចប្រជុំជាមួយតំណាងប្រទេសសមាជិកទាំង៥នៃតំបន់មេគង្គក្រោមដែលរួមមាន មីយ៉ាន់ម៉ា ថៃ ឡាវ កម្ពុជា និងវៀតណាម ភាគីអាមេរិកបានប្រកាសអំពីគំនិតផ្តួចផ្តើមជាច្រើនដែលមានគោលដៅដោះស្រាយបញ្ហាប្រឈមនានានៃអាងទន្លេមេគង្គ និងអភិវឌ្ឍតំបន់ទន្លេមេគង្គនេះប្រកបដោយចីរភាព។
សេចក្តីប្រកាសព័ត៌មាននៃកិច្ចប្រជុំវិសាមញ្ញនៃ «មិត្តរបស់តំបន់មេគង្គក្រោម» បានសរសេរថា ក្រុមវិស្វករនៃកងយោធាអាមេរិកនិងផ្តល់ជំនួយបច្ចេកទេសលើការគ្រប់គ្រងវារីអគ្គិសនី ហើយគណៈកម្មការទន្លេមីស៊ីស៊ីពី បានសម្រេចបន្តកិច្ចព្រមព្រៀងរយៈពេល៥ឆ្នាំទៀត ជាមួយគណៈកម្មការទន្លេមេគង្គស្តីពីការផ្លាស់ប្តូរព័ត៌មាន។ សេចក្តីប្រកាសព័ត៌មានដដែលបន្តថា៖«អនុរដ្ឋមន្ត្រីការបរទេសលោក Shannon និងលោកឯកអគ្គរដ្ឋទូត Thorne បានប្រកាសថា ក្រសួងការបរទេសសហរដ្ឋអាមេរិក នឹងផ្តល់វិភាគទាន ៥សែនដុល្លារដើម្បីគាំទ្រការសិក្សារបស់គណៈកម្មការទន្លេមេគង្គលើបច្ច័យដែលកើតចេញវារីអគ្គិសនី ទៅលើសហគមន៍ និងបរិស្ថាន»។
យោងតាមសេចក្តីប្រកាសព័ត៌មានដដែល មិត្តរបស់ប្រទេសសមាជិកមេគង្គក្រោម នឹងធ្វើការរួមគ្នាដើម្បីពង្រឹងសមត្ថភាពប្រទេសសមាជិកមេគង្គក្រោមនេះ ដើម្បីអនុវត្តឲ្យកាន់តែមានប្រសិទ្ធភាពដើម្បីការថែរក្សាបរិស្ថាន និងសង្គម៕
© រក្សាសិទ្ធិដោយ thmeythmey.com