អន្តរជាតិ
នយោបាយអន្តរជាតិ
ICJ សម្រេចមិនចោទប្រកាន់ទាំងស៊ែរប៊ី ទាំងក្រូអាតលើបទប្រល័យពូជសាសន៍
×
តុលាការជាន់ខ្ពស់យុត្តិធម៌អន្តរជាតិ(ICJ)បានសម្រេចមិនចោទប្រកាន់ទាំងប្រទេសស៊ែប៊ី ទាំងប្រទេសក្រូអាតដែលអតីតរដ្ឋយូហ្គូស្លាវៀពីបទប្រល័យពូជសាសន៍ដែលបានកើតឡើងកាលពីចន្លោះ ឆ្នាំ១៩៩១-១៩៩៥នោះទេ។
រាយការណ៍ព័ត៌មានលម្អិតដោយ លោក រឿន ភារុន
សំណុំរឿងប្រល័យពូជសាសន៍ដែលបានកើតឡើងអំឡុងឆ្នាំ ១៩៩១ ដល់ឆ្នាំ១៩៩៥ នៅក្នុង ប្រទេសស៊ែប៊ី និងក្រូអាត ដែលជាអតីតរដ្ឋរបស់សហព័ន្ធយូហ្គូស្លាវីនោះ ត្រូវបាន តុលាការជាន់ខ្ពស់យុត្តិធម៌អន្តរជាតិសម្រេចច្រានចោលមិនចោទប្រកាន់ភាគីទាំងពីរឡើយ កាលពីថ្ងៃទី៣ ខែកុម្ភៈ ម្សិលមិញនេះ។
ប្រទេសស៊ែប៊ី និងក្រូអាត គឺជារដ្ឋអតីតរដ្ឋរបស់សហព័ន្ធយូហ្គូស្លាវី ដែលបាន ចាប់ផ្តើមប្រកាសឯករាជ្យនៅឆ្នាំ១៩៩០ ។ ក្រោយមកនៅឆ្នាំ ១៩៩១ រហូតដល់ឆ្នាំ ១៩៩៥ ប្រទេសទាំងពីរក៏បានចាប់ផ្តើមផ្ទុះនូវសង្គ្រាម ជាពិសេសនោះនៅតំបន់បាល់កង់ដែលបាន សម្លាប់ប្រជាជនភាគីទាំងសងខាងជាងពីរម៉ឺននាក់។
ជាមួយគ្នានេះផងដែរ សំណុំរឿងនេះបានចាប់ផ្តើមដាក់ពាក្យស្នើរទៅតុលាការនៅឆ្នាំ ១៩៩៩ ។ ពេលនោះ ភាគីសងខាងសុទ្ធតែបានចោទប្រកាន់គ្នាទៅវិញទៅមកថា ជាអ្នកប្រព្រឹត្តបទ ឧក្រិដ្ឋប្រល័យពូជសាសន៍លើប្រជាជាតិរៀងៗខ្លួនក្នុងអំឡុងពេលសង្គ្រាម។
យ៉ាងណាមិញ ក្រោយពីដំណើរការនីតិវិធីជាច្រើនដង តុលាការកំពូលយុត្តិធម៌អន្តរជាតិបាន សម្រេចថា មិនចោទប្រកាន់ទាំងប្រទេសស៊ែប៊ី និងទាំងប្រទេសក្រូអាតពីបទឧក្រិដ្ឋប្រល័យ ពូជសាសន៍នោះទេ ទោះបីជាប្រទេសទាំងពីរពិតជាបានប្រព្រឹត្តនូវអំពើហិង្សាក៏ដោយ។ ហើយភាគីទាំងពីរមិនបានបង្ហាញនូវភស្តុតាងគ្រប់គ្រាន់ ដើម្បីបញ្ជាក់ និងដាក់បន្ទុកទៅលើ ភាគីរៀងៗខ្លួនឡើយ។
បន្ទាប់ពីសេចក្តីសម្រេចតុលាការនេះដែរ រដ្ឋាភិបាលស៊ែបី បានចេញសេចក្តីថ្លែងការណ៍ថា លោកសង្ឃឹមថា សនិ្តភាពភាពរុងរឿងនិងមិត្តភាពរវាងប្រទេសទាំងពីរនឹងផ្តើមកើតមាន ឡើងចាប់ពីពេលនេះតទៅ។ រីឯរដ្ឋាភិបាលក្រូអាតវិញ ក៏បានសំដែងការមិនពេញចិត្តជាមួយ នឹងសេចក្តីសម្រេចនោះទេ។ លោកបានបញ្ជាក់ថា យើងនូវតែទទួលស្គាល់ក្នុងបែបបទ ជាប្រទេសដែលមានអរិយធម៌ខ្ពស់។
គួរបញ្ជាក់ផងដែរថា នេះមិនមែនជាសេចក្តីសម្រេចលើកដំបូងរបស់តុលាការយុត្តិធម៌ អន្តរជាតិលើសំណុំរឿងប្រល័យពូជសាសន៍ប្រទេសស៊ែប៊ីនិងក្រូអាតឡើយ។ តុលាការបាន ដំណើរការ ជាច្រើនដងតែចុងក្រោយបានសម្រេចច្រានចោលដោយមិនចោទប្រកាន់ទៅលើ ភាគីណាមួយនៃវិវាទឡើយ៕
© រក្សាសិទ្ធិដោយ thmeythmey.com