អន្តរជាតិ
នយោបាយអន្តរជាតិ
×![]()
រដ្ឋាភិបាលទីក្រុងព្យុងយ៉ាងបានប្រកាសសម្រេចបញ្ឈប់ការចរចាជាមួយនឹងសហរដ្ឋអាមេរិក ដោយបានចោទថា រដ្ឋាភិបាលក្រុងវ៉ាស៊ីនតោនកំពុង រៀបគម្រោងសម្ងាត់ដើម្បីផ្តួលរំលំរបបខ្លួន ។ សេចក្តីប្រកាសនេះធ្វើឡើងក្រោយពីកូរ៉េខាងជើងបរាជ័យក្នុងការស្នើរចរចាជាមួយនឹង សហរដ្ឋអាមេរិកប្រមាណជាពីរលើកមកហើយ។
រាយការណ៍ព័ត៌មានលម្អិតដោយ រឿន ភារុន
រដ្ឋាភិបាលទីព្យុងយ៉ាងបានប្រកាសជាផ្លូវការថា ខ្លួនបញ្ឈប់ការចរចាជាមួយនឹង«បងធំ» សហរដ្ឋអាមេរិក ដោយបានចោទរដ្ឋាភិបាលទីក្រុងវ៉ាស៊ីនតោនថាកំពុងតែរៀបចំផែនការ សម្ងាត់ដើម្បីផ្តួលរលំរបបគ្រប់គ្រងទីក្រុងព្យុងយ៉ាង នៅថ្ងៃទី៤ ខែកុម្ភៈម្សិលមិញនេះ។
ដូចដែលគេបានរំពឹងទុក វាគ្មានលក្ខខណ្ឌណាមួយដែលសហរដ្ឋអាមេរិកត្រូវបន្ទាបខ្លួនមក ពិភាក្សាជាមួយនឹងកូរ៉េខាងជើងនោះទេ។ ហើយការប្រកាសបញ្ឈប់ចរចារបស់រដ្ឋាភិបាល ទីក្រុងព្យុងយ៉ាងនេះគឺ ធ្វើឡើងបន្ទាប់ពីបរាជ័យក្នុងការស្នើរសុំជួបពិភាក្សា លើការផ្អាកធ្វើ សមយុទ្ធយោធាប្រចាំឆ្នាំដែលរាប់បញ្ចូលទាំងការសាកល្បងអាវុធនុយក្លែអ៊ែររវាងសហរដ្ឋអាមេរិកនិងកូរ៉េខាងត្បូងនាពេលខាងមុខ។
យ៉ាងណាមិញ អគ្គមេបញ្ជាការកងទ័ពកូរ៉េខាងជើងបានបញ្ជាក់ថា មូលហេតុដែលកូរ៉េខាង ជើងសម្រេចបញ្ឈប់ការចរចានោះគឺដោយសារសហរដ្ឋអាមេរិកកំពុងតែបញ្ឆេះនូវភ្លើងសង្គ្រាមម្តងបន្តិចៗ ជាពិសេសនោះរដ្ឋាបាលរបស់លោកប្រធានាធិបតីអាមរិក ប៉ារ៉ាក់ អូប៉ាម៉ា កំពុងតែរៀបចំគម្រោងដើម្បីផ្តួលរំលំរបបរបស់ពួកគេ។
លោកអគ្គមេបញ្ជាការបានបន្ថែមទៀតថា៖« ដោយសារបងធំចក្រពត្តិអាមេរិកកំពុងផ្តួលរំលំ កូរ៉េខាងជើងនោះ ទាហាន និងប្រជាជនរបស់កូរ៉េខាងជើងសូមជូនដំណឹងដល់រដ្ឋបាលរបស់ សហរដ្ឋអាមេរិកថា ពួកយើងពិតជាមិនអាចនិងគ្មានឆន្ទៈជួបពិភាក្សាជាមួយនឹងអាមេរិកទៀត ទេ។
គួរបញ្ជក់ផងដែរ ក្នុងរយៈពេលចុងក្រោយនេះការដំឡើងសាច់ដុំដាក់គ្នារវាងកូរ៉េខាងជើង និងសហរដ្ឋអាមេរិកហាក់ដូចជាមានភាពស្ងប់ស្ងាត់ក្រោយពីមានការប្រឈមមុខគ្នាខ្លាំង លើបញ្ហារឿងហូលីវូដបែបកំប្លែងដែលបង្កប់នូវឈុតឆាកសម្លាប់មេដឹកនាំកូរ៉េខាងជើង។ យ៉ាងណាមិញកំដៅនឹងចាប់ផ្តើមឡើងវិញនៅពេលការចរចារវាងកូរ៉េខាងជើង និងអាមេរិកត្រូវបានបរាជ័យ ជាពិសេសនោះគម្រោងនៃសមយុទ្ធយោធាទ្រង់ទ្រាយធំរវាង កូរ៉េខាងត្បូង និងសហរដ្ឋអាមេរិកនឹងត្រូវប្រព្រឹត្តទៅនៅពេលខាងមុខដែលអាចជាការបង្ហាញ សាច់ដុំដាក់គ្នាសារជាថ្មីរវាងបងប្អូនកូរ៉េទាំងពីរ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 សប្តាហ៍
