ជាតិ
សង្គមជាតិ
កម្ពុជាត្រូវការមនុស្សឆ្កួតច្រើនជាងនេះទៀត !
× ខ្ញុំតែងសាកសួរខ្លួនឯងដែរ ថាខ្ញុំឆ្កួតដល់កម្រិតណាហើយ? តែខ្ញុំនៅតែរកចម្លើយមិនឃើញថា ខ្ញុំឆ្គួតកម្រិតណានៅឡើយទេ។ ក្រៅពីដេកហួច ដើរហួច និងជិះក្របីហួច ខ្ញុំដូចជានៅមិនទាន់ចេះធ្វើអីទេ។
កាលនៅសាលាប្រក់ស្បូវ និងមិនទាន់មកឃ្វាលគោអាជីព ខ្ញុំនៅចាំ អាញស្ដាញ និយាយថា៖«សំណួរមួយដែលធ្វើឲ្យខ្ញុំស្ទើរឆ្កួតម្ដងៗគឺ តើអ្នកឯងឆ្កួតឬ? តែតាមពិតអំពើឆ្កួតលីលា គឺការធ្វើតែរឿងដដែលៗ តែបែរជារំពឹងផលថ្មីប្រសើរជាងមុន»។
ខ្ញុំចាំទៀតថា កាលីឡេ ត្រូវគេចោទថាឆ្គួត និងត្រូវគេសម្លាប់ចោល ព្រោះតែគាត់ឆ្កួតតែម្នាក់ឯង ដែលអះអាងថាផែនដីមានរាងមូល ដូចក្រូច ឬពងក្រពើ។ ខុសពីអ្នកសាសនាធំសម័យនោះដែលថាផែនដីរាបស្មើ និងមានព្រះជាអ្នកបង្កើត។
កាលពីមហាត្មៈគន្ធីទាមទារឯករាជ្យឲ្យប្រទេសឥណ្ឌា ក៏គាត់ត្រូវគេថាឆ្កួតដែរ។ ប៉ុន្តែ គាត់បានតបទៅវិញយ៉ាងខ្លីថា «ក្នុងកាលៈទេសៈនេះ ប្រទេសឥណ្ឌាត្រូវការមនុស្សឆ្កួតដូចជារូបខ្ញុំ»។
នៅប្រទេសកម្ពុជាវិញ ក្នុងពេលកែទម្រង់ការអប់រំ ពេលប្រឡងបាក់ឌុប រដ្ឋមន្ត្រីសិក្សាធិការ ក៏ត្រូវគេប្រមាថថាមិនប្រក្រតីដែរ។ រួចហើយនៅពេលថ្មីៗនេះ ប្រធានចលនាមាតាធម្មជាតិ លោក អាឡិច ហ្គនហ្សាឡេដេវីដសិន ក៏ទើបតែត្រូវគេថាជាមនុស្សឆ្គួតដែរ ដោយសារតែគាត់ជាជនបរទេសតែម្នាក់គត់ ដែលឈ្លក់នឹងសម្រស់ធម្មជាតិតំបន់អារ៉ែង និងបានប្រកាសចង់ការពារព្រៃឈើចុងក្រោយនៅតំបន់នោះ។ មានជនខ្លះតាំងខ្លួនជាមនុស្សថ្លៃថ្នូរ មានសីលធម៌ក្នុងការងារ មិនចេះស៊ីសំណូក តែត្រូវគេថាជាមនុស្សឆ្កួត ព្រោះធ្វើការជាងម្ភៃឆ្នាំហើយ នៅតែមិនមានបានស្តុកស្តម្ភ។ ប្តីខ្លះស្មោះត្រង់នឹងប្រពន្ធ មិនវៀចវេរមានស្រីញីខាងក្រៅ ត្រូវគេថាជាមនុស្សឆ្គួតដែរ ព្រោះតែគេគិតថាក្នុងលោកនេះគ្មានមនុស្សប្រុសបែបនេះទេ។ ឲ្យតែមនុស្សប្រុសសុទ្ធតែធ្លាប់សៅគ្រី ហើយប្រុសណាក៏ដូចប្រុសណាដែរ។
ក្មេងៗឃ្វាលគោស្របាលៗគ្នានៅស្រុកខ្ញុំ ឧស្សាហ៍និយាយចំអកឲ្យគ្នាណាស់ថា យើងឃើញមានមនុស្សដែលត្រូវបានគេហៅថាជាមនុស្សឆ្កួតច្រើនទៀត។ ក្នុងនោះមនុស្សឆ្កួតបែបខាងលើនេះ មាននៅគ្រប់កន្លែងក្នុងប្រទេសកម្ពុជាដែរ ទាំងនៅក្នុងជំរំទេវតា (CPP), ជំរំព្រះអាទិត្យ (CNRP), ជំរំជួង (គណបក្សសម្ព័ន្ធដើម្បីប្រជាធិបតេយ្យ LDP), ហ្វ៊ុនស៊ីនប៉ិច (FUNCINPEC) និង ខ្មែរដើម្បីខ្មែរ ។ល។
តែខ្ញុំនឹងរង់ចាំមើល បើខ្ញុំមិនទាន់ឡប់សតិ និងមិនទាន់ឈប់ឃ្វាលក្របីទេ ថាតើទីណានឹងសម្បូរមនុស្សឆ្កួតច្រើនជាងគេ៕
ជំនិត អាប្រុញ, ក្មេងឃ្វាលក្របី
នៅស្រុកបន្ទាយស្រី ខេត្តសៀមរាប
© រក្សាសិទ្ធិដោយ thmeythmey.com