អន្តរជាតិ
នយោបាយអន្តរជាតិ
ជប៉ុនសរសើរលោកប្រាយុទ្ធ ប៉ុន្តែក្រើនរំលឹកឲ្យថៃប្តូររបបទៅប្រជាធិបតេយ្យវិញ
× នាយករដ្ឋមន្ត្រីជប៉ុន លោក ស៊ិនហ្សូ អាបេ បានទទូចអោយនាយករដ្ឋមន្ត្រីរដ្ឋប្រហារថៃកែប្រែរបបគ្រប់គ្រង ប្រទេសថៃអោយវិលត្រលប់ ទៅជាប្រទេសលទ្ធិប្រជាធិបតេយ្យវិញកាន់តែលឿន កាន់តែល្អ នៅក្នុងឳកាសនៃការធ្វើដំណើរទស្សនកិច្ចរបស់លោក ប្រាយុទ្ធ ចាន់ អូ ចា ទៅកាន់ប្រទេសជប៉ុន។
នៅក្នុងឱកាសនៃការធ្វើដំណើរទស្សនកិច្ចរបស់នាយករដ្ឋមន្ត្រីរដ្ឋថៃទៅកាន់ប្រទេសជប៉ុន លោកស៊ិនហ្សូ អេបេបានទទូចអោយថៃផ្លាស់ប្តូរនូវរបបគ្រប់គ្រង់ដែលប្រើច្បាប់អាជ្ញាសឹក ទៅរកលទ្ធិប្រជាធិបតេយ្យវិញ តាមលទ្ធភាពដែលអាចធ្វើបាន។
ក្រោយពីមានការធ្វើរដ្ឋប្រហារយោធាទម្លាក់អតីតនាយករដ្ឋមន្ត្រីថៃ លោកស្រី យីងឡាក់ កាលពីថ្ងៃទី ២២ ឧសភា ឆ្នាំ ២០១៤ កន្លងទៅនេះ ថៃ បានអវត្តមានក្នុងការប្រជុំកំពូលៗជាមួយនឹងប្រទេស G៧ ដែលជាក្រុមប្រទេសឧស្សាហកម្ម ជាច្រើនលើកហើយ។ យ៉ាងណាមិញ ដំណើរទស្សនិកទៅកាន់ប្រទេសជប៉ុនលើកនេះ គឺជាលើកដំបូង ហើយដែលប្រទេសថៃត្រូវបានជប៉ុន ដែលជាប្រទេសក្រុម G៧ អញ្ជើញអោយចូលរួមក្នុងកិច្ចប្រជុំ។
នៅក្នុងដំណើរទស្សនកិច្ចនេះដែរ លោក អេបេ បានសរសើរការប្រឹងប្រែងរបស់លោកប្រាយុទ្ធ ក្នុងការស្តារស្ថានភាពនៃការជាប់គាំងនយោបាយថៃ និងសន្តិសុខថៃអោយមានស្ថេរភាពឡើងវិញ។ ទោះបីយ៉ាងក៏ដោយ លោកនាយករដ្ឋមន្ត្រីអាបេ ក៏បានទទូចអោយនាយករដ្ឋមន្ត្រីយោធាថៃ ប្រាយុទ្ធ ចាន់ អូ ចា គួរតែផ្លាស់ប្តូរនូវរបបគ្រប់គ្រងដែលដឹកនាំដោយយោធា ទៅរកការដឹកនាំដោយរដ្ឋាភិបាលដែលជាប្រជាជនស៊ីវិលវិញ ពោលគឺ វិលត្រលប់ប្រទេសថៃអោយក្លាយជាប្រទេសលទ្ធិប្រជាធិបតេយ្យវិញ។
ឆ្លើយតបជាមួយនឹងសំណើររបស់នាយករដ្ឋមន្ត្រីជប៉ុន លោកប្រាយុទ្ធ ចាន់អូចា ក៏បានសន្យាថាលោកនឹងព្យាយាមពន្លឿន និងបង្កើនយន្តការផ្សេងៗជាពិសេសនោះលើការវិសោធនកម្មរដ្ឋធម្មនុញ្ញថៃ ដែលជាច្បាប់កំពូលក្នុង ការកំណត់ពីនីតិវិធីសំខាន់នៅក្នុងនយោបាយថៃ។ លោកបន្ថែមទៀតថា ក្រោយពីបញ្ចប់នៃការកែប្រែនេះ ថៃ នឹងមានការបោះឆ្នោតជាសកល នៅក្នុងចុងឆ្នាំ ២០១៥ ឬដើមឆ្នាំ ២០១៦ ហើយពេលនោះ លទ្ធិប្រជាធិបតេយ្យ នឹងវិលត្រលប់ទៅរកសភាពដើមវិញ។
ដោយឡែក ក្រោយពីមានការអន់ចិត្តលើការបើកចំហវិនិយោគរាប់លានដុល្លាររវាងប្រទេសចិន និងថៃលើវិស័យ រថភ្លើងនៅក្នុងប្រទេសថៃ ថៃបានអនុញ្ញាតជប៉ុនចូលរួមក្នុងការវិនិយោកគលើគម្រោងនៅក្នុងតំបន់សេដ្ឋកិច្ចពិសេសដែលជាគម្រោង វិនិយោគរវាងថៃ និងប្រទេសមីយ៉ាន់ម៉ាផងដែរ៕
© រក្សាសិទ្ធិដោយ thmeythmey.com