អន្តរជាតិ
នយោបាយអន្តរជាតិ
ក្រុមរដ្ឋឥស្លាមដណ្តើមបានតំបន់មួយចំនួនក្បែរមូលដ្ឋានទ័ពអាមេរិកនៅអ៊ីរ៉ាក់
×
ក្រុមសកម្មប្រយុទ្ធរដ្ឋឥស្លាមបានដណ្តើមកាន់កាប់តំបន់មួយចំនួននៅទីក្រុងដែលស្ថិតនៅភាគខាងលិចប្រទេសអ៊ីរ៉ាក់នៅថ្ងៃព្រហស្បតិ៍ម្សិលមិញនេះ។ តំបន់ដែលក្រុមភេរវជនរដ្ឋឥស្លាមកាន់កាប់បានថ្មីៗនេះ ស្ថិតមិនឆ្ងាយប៉ុន្មានពីទីតាំងមូលដ្ឋានយោធាជើងអាកាសរបស់អ៊ីរ៉ាក់ដែលមានកងទ័ពអាមេរិកជាច្រើននាក់កំពុងផ្តល់ការហ្វឹកហាត់ដល់ក្រុមទាហានអ៊ីរ៉ាក់ថែមទៀតផង។
លោក មុំ ពិទូរ្យ លម្អិតព័ត៌មាននេះ
ទឹកដី៩០ភាគរយនៃស្រុកមួយដែលជាទឹកដីដើមកំណើតរបស់មេដឹកនាំក្រុមរដ្ឋឥស្លាមត្រូវបានធ្លាក់ចូលក្រោមកណ្តាប់ដៃក្រុមភេរវជនរដ្ឋឥស្លាមកាលពីថ្មីៗនេះ។ ហើយក្រុមសកម្មប្រយុទ្ធទាំងនោះបានបន្តវាយដណ្តើមកាន់កាប់តំបន់ភាគខាងលិចប្រទេសអ៊ីរ៉ាក់បានច្រើនផងដែរកាលពីម្សិលមិញនេះ ដែលវាស្ថិតនៅមិនឆ្ងាយប៉ុន្មានពីមូលដ្ឋានទ័ពអាកាសអ៊ីរ៉ាក់នោះឡើយ។
គេដឹងថា កងទ័ពជើងទឹកអាមេរិកជាច្រើននាក់កំពុងស្ថិតក្នុងមូលដ្ឋានយោធាខាងលើផងដែរ ដោយពួកគេកំពុងផ្តល់ការហ្វឹកហាត់ដល់កងកម្លាំងអ៊ីរ៉ាក់ដើម្បីត្រៀមប្រយុទ្ធទប់ទល់នឹងក្រុមរដ្ឋឥស្លាម។ អ្នកនាំពាក្យក្រសួងការពារជាតិអាមេរិកបានទទួលស្គាល់ព័ត៌មាននៃការប្រយុទ្ធគ្នាទ្រង់ទ្រាយធំកាលពីម្សិលមិញនេះ ដែលកើតឡើងនៅក្បែរមូលដ្ឋានយោធាអ៊ីរ៉ាក់ ប៉ុន្តែអ្នកនាំពាក្យបានបង្វែរសំណួរស្តីពីការវាយប្រហារនិងកាន់កាប់ទីក្រុងភាគខាងលិចទៅអោយរដ្ឋាភិបាលអ៊ីរ៉ាក់ជាអ្នកឆ្លើយវិញ។
យ៉ាងណាក៏ដោយ មិនមានករណីវាយប្រហារណាមួយកើតឡើងលើមូលដ្ឋានទ័ពអ៊ីរ៉ាក់ឡើយ ប៉ុន្តែបើតាមការអោយដឹងពីសំណាក់មន្ត្រីយោធាអ៊ីរ៉ាក់ កងទ័ពអាមេរិកបច្ចុប្បន្នដែលនៅក្នុងមូលដ្ឋានទ័ពក្បែរកន្លែងដែលក្រុមភេរវជនរដ្ឋឥស្លាមដណ្តើមកាន់កាប់បាននោះមានរហូតដល់ ៣២០នាក់ឯណោះ។
បើគិតទៅពីមូលដ្ឋានយោធានេះទៅកាន់ទីក្រុងដែលជាទីកន្លែងកំណើតរបស់មេដឹកនាំក្រុមរដ្ឋឥស្លាមគេចំណាយត្រឹមតែ ១៣នាទីប៉ុណ្ណោះ។ គេភ័យខ្លាចថា ក្រុមភេរវជនរដ្ឋឥស្លាមនឹងប្រើប្រាស់ការវាយប្រហារទ្រង់ទ្រាយធំ ដោយវាយបំបែកមូលដ្ឋានយោធាខាងលើ ប៉ុន្តែមន្ត្រីជាន់ខ្ពស់អាមេរិកបានអះអាងថាក្រុមភេរវជនរដ្ឋឥស្លាមនេះកាន់តែអន់ខ្សោយទៅហើយ។ ពួកគេមិនមានលទ្ធភាពវាយប្រហារទ្រង់ទ្រាយធំនោះឡើយ ប៉ុន្តែអាមេរិកនឹងបន្តគាំទ្រក្រុមកងកម្លាំងសន្តិសុខអ៊ីរ៉ាក់ និងបន្តទម្លាក់គ្រាប់បែកប្រឆាំងពួកគេដរដែល។
ទាក់ទិនការកម្ចាត់ក្រុមភេរវជនរដ្ឋឥស្លាម លោកប្រធានាធិបតីអាមេរិក បារ៉ាក់ អូបាម៉ា ទើបតែដាក់ស្នើសុំទៅសភា ដើម្បីធ្វើសង្គ្រាមប្រឆាំងក្រុមរដ្ឋឥស្លាមរយៈពេលបីឆ្នាំ។ សង្គ្រាមមានកំណត់ និងមានរយៈពេលខ្លីនេះ ជាយុទ្ធសាស្ត្រថ្មីរបស់ប្រធានាធិបតីអាមេរិក ហើយលោករំពឹងថាការស្នើសុំរបស់លោកនឹងត្រូវអនុញ្ញាតដោយសភា។ ប៉ុន្តែគេសន្និដ្ឋាថា វាមិនមែនជារឿងងាយស្រួលឡើយ ដើម្បីអោយសមាជិកសភាសម្រេចផ្តល់ភ្លើងខៀវដល់លោកក្នុងការបញ្ជូនទ័ពតាមប្រមាញ់ក្រុមរដ្ឋឥស្លាមនោះ។ សមាជិកសភាគណបក្សសាធារណរដ្ឋកំពុងកាន់កាប់សភាជាន់ខ្ពស់ ហើយពួកគេបានរិះគន់ចេតនារបស់លោក អូបាម៉ា ថែមទៀតផង៕
© រក្សាសិទ្ធិដោយ thmeythmey.com