ជាតិ
សុខភាព
អាជ្ញាធររាជធានីអំពាវនាវឲ្យចូលរួមបរិច្ចាគឈាមនៅទិវានៃក្តីស្រលាញ់
× ភ្នំពេញ៖ នៅថ្ងៃទី ១៤ ខែកុម្ភៈ ទិវានៃក្តីស្រលាញ់ (Valentine’s day) នេះ អាជ្ញាធររាជធានី ភ្នំពេញបានអំពាវនាវដល់មន្ត្រីរាជការ បុគ្គលិក ទាំងក្នុងវិស័យរដ្ឋ និងឯកជនចូលរួមបរិច្ចាគ ឈាម ដើម្បីជួយសង្គ្រោះអាយុជីវិតអ្នកដែលត្រួវការឈាម។
នៅក្នុងពិធីបរិច្ចាគឈាមក្រោមប្រធានបទ ផ្តល់ឈាម ផ្តល់ក្តីស្រលាញ់ នៅទីលានប្រជាធិប តេយ្យ នាព្រឹកថ្ងៃទី១៤ កុម្ភៈនេះ អភិបាលរាជធានីភ្នំពេញ លោក ប៉ា សុជាតិវង្ស បានអំពាវនាវ ដល់មន្ត្រីរាជការ បុគ្គលិកនៅតាមស្ថាប័នរដ្ឋ និងឯកជននានា ចូលរួមផ្តល់ស្រលាញ់ តាមរយៈការបរិច្ចាគឈាម។
ជាមួយគ្នានេះដែរ នាពិធីបរិច្ចាគឈាមដែលមានការចូលរួមពីសំណាក់ សិស្ស និស្សិត សមាជិកកាកបាទ ក្រហមកម្ពុជា សហភាពសហព័ទ្ធយុវជនកម្ពុជា និងមន្ត្រីមជ្ឈមណ្ឌល ផ្តល់ឈាមកម្ពុជាជាង ២០០នាក់នោះ អភិបាលរាជធានីភ្នំពេញ ក៏បានអំពាវនាវ កុំឲ្យយុវជនគិតខុសពីអត្តន័យ ទិវានៃក្តីស្រលាញ់ផងដែរ។
ទន្ទឹមនឹងការបរិច្ចាគ ឈាមដែលបង្ហាញក្តីស្រឡាញ់ ចំពោះមនុស្សជាទីស្រឡាញ់ក៏ដូចជា ជនរងគ្រោះនេះដែរ លោក ហុក គឹមចេង ប្រធានមជ្ឈមណ្ឌលជាតិផ្តល់ឈាមរំពឹងថា មជ្ឈមណ្ឌលនឹងទទួលបានអំណោយឈាមពីសប្បុរសជនច្រើនជាង៣០០ប្លោកនៅក្នុង យុទ្ធនាការនៅថ្ងៃទី១៤ កុម្ភៈឆ្នាំនេះ ខណៈកាលពីថ្ងៃទី១៤កុម្ភៈឆ្នាំ២០១៤មជ្ឈមណ្ឌលជាតិផ្តល់ឈាមទទួលបានអំណោយ ឈាមចំនួន៣២៩ប្លោក។
នៅក្នុង ឆ្នាំ២០១៤កន្លងទៅមជ្ឈមណ្ឌលជាតិផ្តល់ឈាម(NBTC) ប្រមូលបានឈាមបរិច្ចាគសរុបចំនួន៥២,៨៦៧ប្លោកនៅទូទាំងប្រទេសក្នុងនោះ ឈាមដែលបរិច្ចាគតាមការស្ម័គ្រចិត្តមានចំនួន១៧,៧៩០ប្លោកស្នើ នឹង៣៣.៨ភាគរយនៃឈាមដែលប្រមូលបាន។ដោយឡែកនៅទីក្រុងភ្នំពេញមជ្ឈមណ្ឌល ជាតិផ្តល់ឈាមប្រមូលបានឈាមបរិច្ចាគសរុបចំនួន៣២,៦៤៨ប្លោកក្នុងនោះឈាម ដែលបរិច្ចាគតាមការស្ម័គ្រចិត្តមានចំនួន១២,៣៤៦ប្លោកស្នើនឹង ជាង៣៧.៨ភាគរយនៃឈាមដែលបរិច្ចាគសរុប៕
© រក្សាសិទ្ធិដោយ thmeythmey.com