អន្តរជាតិ
នយោបាយអន្តរជាតិ
អ៊ុយក្រែននិងអាមេរិកចោទរុស្ស៊ីនិងក្រុមបះបោរថាបំពានកិច្ចព្រមព្រៀង
× ការចុះហត្ថលេខាលើកិច្ចព្រមព្រៀងក្រុងមីនស្គ៍ធ្វើមិនបានមួយថ្ងៃផង ថ្ងៃសុក្រម្សិលមិញ ការវាយប្រហារនៅតែបន្តនៅភាគខាងកើតអ៊ុយក្រែន សម្លាប់មនុស្សយ៉ាងហោច២៨នាក់។ ប្រធានាធិបតីអ៊ុយក្រែន ពេត្រូ ប៉ូរ៉ូឆិនកូ បានចោទក្រុមបះបោរភាគខាងកើតនិងរុស្ស៊ី ថាគំរាមលើកិច្ចព្រមព្រៀង។ រីឯសហរដ្ឋអាមេរិកវិញបានចោទរុស្ស៊ីថា នៅតែឆ្លៀតបន្តផ្តល់អាវុធធុនធ្ងន់ដល់ក្រុមបះបោរ មុនពេលកិច្ចព្រមព្រៀងចូលជាធរមាននៅថ្ងៃអាទិត្យ។
ក្នុងចំណោមមនុស្សយ៉ាងហោច២៨នាក់ដែលស្លាប់ក្នុងការវាយប្រហារនៅភាគខាងកើតអ៊ុយក្រែន ម្សិលមិញ គេរាប់ឃើញមានជនស៊ីវិល១៦នាក់។ ក្រសួងការបរទេសអាមេរិកបានចោទរុស្ស៊ីថា នៅតែបន្តបញ្ជូនអាវុធធុនធ្ងន់ទៅភាគខាងកើតអ៊ុយក្រែន មុនពេលកិច្ចព្រមព្រៀងក្រុងមីនស្គ៍ត្រូវចូលជាធរមាន។ អាមេរិកបានទទួលព័ត៌មានថា ប៉ុន្មានថ្ងៃចុងក្រោយនេះ មានរថក្រោះនិងប្រព័ន្ធការពារមីស៊ីលជាច្រើនគ្រឿង ដែលត្រូវបានដឹកពីព្រំដែនរុស្ស៊ីចូលមក។ អ្នកនាំពាក្យក្រសួងការបរទេសអាមេរិកបន្ថែមថា កងកម្លាំងរុស្ស៊ីនៅតាមព្រំដែនជាមួយអ៊ុយក្រែនវិញ កំពុងតែត្រៀមបញ្ជូនសម្ភារៈអោយកងកម្លាំងគាំទ្ររុស្ស៊ីភាគខាងកើត ជាទង្វើដែលផ្ទុយពីកិច្ចព្រមព្រៀងទីក្រុងមីនស្គ៍ ដែលទើបចុះហត្ថលេខា កាលពីថ្ងៃព្រហស្បតិ៍។
ថ្ងៃសុក្រម្សិលមិញដែរ ក្នងជំនួូបជាមួយនាយករដ្ឋមន្ត្រីប្រទេសហុងគ្រី នៅក្រុងគៀវ លោកប្រធានាធិបតីអ៊ុយក្រែន ពេត្រូ ប៉ូរ៉ូឆិនកូ បានចោទរុស្ស៊ីនិងក្រុមបះបោរអ៊ុយក្រែន
ថាបំពានកិច្ចព្រមព្រៀងក្រុងមីនស្គ៍ដែលទើបចុះហត្ថលេខាថ្មីៗកាលពីថ្ងៃព្រហស្បតិ៍។ យោងតាមលោកប៉ូរ៉ូឆិនកូ ក្រុមបះបោរភាគខាងកើតបានទំលាក់គ្រាប់បែកលើជនស៊ីវិល ហើយបើគិតតាំងពីពេលចុះហត្ថលេខាថ្ងៃព្រហស្បតិ៍មក រុស្ស៊ីវិញបានបង្កើនការវាយលុកប្រឆាំងអ៊ុយក្រែនថែមទៀត។ លោកប៉ូរ៉ូឆិនកូចង់សំដៅលើការវាយប្រហារដោយគ្រាប់បែក និងរ៉ុកកែត នៅក្រុងArtemivsk ដែលបានសម្លាប់មនុស្ស៣នាក់ នៅថ្ងៃសុក្រម្សិលមិញ។ ក្រុងនេះស្ថិតនៅ៣០គីឡូម៉ែត្រ ពីបន្ទាត់សមរភូមិ ពោលគឺមិនជាប់ពាក់ព័ន្ធនឹងប្រតិបត្តិការយោធា របស់កងទ័ពអ៊ុយក្រែនបច្ចុប្បន្នទេ។
កិច្ចព្រមព្រៀងក្រុងមីនស្គ៍សំដៅបញ្ចប់ជម្លោះនៅភាគខាងកើតអ៊ុយក្រែន នឹងចូលជាធរមានថ្ងៃអាទិត្យនេះ។ វាមានលក្ខខណ្ឌសំខាន់ៗដូចជាតំរូវអោយដកអាវុធធុនធ្ងន់ពីតំបន់ជម្លោះ រឺក៏បង្កើេតតំបន់គ្មានសកម្មភាពយោធាជាដើម។ ថ្វីបើកិច្ចព្រមព្រៀងបានចុះហត្ថលេខាក៏ពិតមែន បណ្តាមេដឹកនាំអឺរ៉ុបមានការប្រុងប្រយ័ត្នខ្ពស់ ព្រោះថាកិច្ចព្រមព្រៀងនេះងាយផុយស្រួយណាស់៕
© រក្សាសិទ្ធិដោយ thmeythmey.com