ជាតិ
បទវិភាគ
តើកម្ពុជាគ្មានមធ្យោបាយដោះស្រាយរឿងថៃបាញ់ពលករខ្មែរទេឬ?
× កិច្ចសន្យាជាលាយលក្ខណ៍អក្សរថាឈប់បាញ់ពលករខ្មែរមិនទាន់ទាំងស្ងួតទឹកប៊ិចស្រួលបួលផង ពលរដ្ឋខ្មែរបីនាក់ទៀតត្រូវបានទាហានថៃបាញ់សម្លាប់និងម្នាក់រងរបួសធ្ងន់កាលពីថ្ងៃទី៥កុម្ភៈ ។ ក្រសួងការបរទេសកម្ពុជាបានចេញកំណត់ទូតតវ៉ានិងថ្កោលទោសថៃជាថ្មី។ តើកម្ពុជាពិតជាគ្មានមធ្យោបាយដោះស្រាយការបាញ់សម្លាប់ពលរដ្ឋរបស់ខ្លួនមែនឬ?
នេះមិនមែនជាលើកទី១ទេ ដែលភាគីថៃបានបំពានកិច្ចសន្យាជាមួយកម្ពុជាជាពិសេសកិច្ចសន្យាថាឈប់បាញ់សម្លាប់ពលរដ្ឋខ្មែរឆ្លងដែនខុសច្បាប់ចូលទឹកដីរបស់ខ្លួន។ កិច្ចសន្យាជាលាយលក្ខណ៍អក្សរមិនទាន់ស្ងួតទឹកប៊ិចស្រួលបួលផង ករណីបាញ់សម្លាប់ថ្មីទៀតបានកើតឡើង។
គួររម្លឹកថា ប្រជាពលរដ្ឋខ្មែរដែលឆ្លងដែនខុសច្បាប់ចូលក្នុងទឹកដីថៃដើម្បីរកអនុផលព្រៃឈើ ឬអ្នកខ្លះទៅស៊ីឈ្នួលគេអូសឈើក្រញូងក្នុងព្រៃ និងអ្នកខ្លះទៀតគ្រាន់តែគេសង្ស័យថាចោរលួចម៉ូតូត្រូវបានទាហានថៃបាញ់សម្លាប់ដូចសត្វធាតុ។ នេះជាព្រឹត្តិការណ៍គួរឲ្យព្រឺខ្លាចនិងមិនគួរឲ្យជឿពីព្រោះថា ប្រទេសមួយដែលមានអារិយធម៌គួរសមដែរនៅអាស៊ីបែរជាក្លាយជាប្រទេសប្រើច្បាប់ព្រៃសម្លាប់មនុស្សគ្មានច្បាប់ទម្លាប់បែបនេះទៅវិញ។
ម្តងហើយម្តងទៀត ក្រសួងការបរទេសកម្ពុជាបានផ្ញើកំណត់ទូតតវ៉ាស្ទើរតែរាប់ភ្លេចទៅហើយទៅកាន់ក្រសួងការបរទេសថៃដើម្បីសម្តែងការថ្កោលទោស និងទាមទារឲ្យទាហានថៃបញ្ឈប់អំពើអមនុស្សធម៌នេះ។ កំណត់ទូតទាំងនោះបានធ្វើឡើងដើម្បីប្រឆាំងតវ៉ាចំពោះសកម្មភាពដ៏អមនុស្សធម៌របស់ទាហានថៃតាមព្រំដែនដែលបានបាញ់ប្រហារមកលើពលរដ្ឋខ្មែរ។ ប៉ុន្តែ កំណត់ទូតរបស់ក្រសួងការបរទេសកម្ពុជាមិនបានធ្វើឲ្យភាគីថៃបញ្ឈប់អំពើឃោរឃៅនៃកងទាហានរបស់ខ្លួនឡើយ។
ជាការពិតណាស់ ពលរដ្ឋខ្មែរជាច្រើនបាននាំគ្នាឆ្លងដែនដោយខុសច្បាប់ចូលទៅក្នុងប្រទេសថៃជារៀងរាល់ថ្ងៃ។ ពលរដ្ឋក្រីក្រទាំងនោះមានបំណងត្រឹមស្វែងរកការងារធ្វើដើម្បីបានប្រាក់បន្តិចបន្តួចចិញ្ចឹមគ្រួសារតែប៉ុណ្ណោះ។ ដើម្បីអាចចូលក្នុងប្រទេសថៃបាន មានអ្នកខ្លះបានឆ្លងដែនដោយស្របច្បាប់ អ្នកខ្លះទៀតដោយខុសច្បាប់តាមច្រករបៀងផ្សេង។ ការឆ្លងដែនទៅរកការងារធ្វើជារឿងមួយ តែអ្នកខ្លះបានប្រថុយជីវិតឆ្លងដែនទៅស៊ីឈ្នួលកាប់ឈើឲ្យគេក្នុងព្រៃក្នុងទឹកដីថៃដើម្បីប្រាក់បន្តិចបន្តួច។
ទាំងនេះពិតជាកំហុសរបស់ពលរដ្ឋកម្ពុជាទាំងនោះឬក៏ជាកំហុសរបស់អាជ្ញាធរដែនដីដែលមិនអាចទប់ស្កាត់ពលរដ្ឋរបស់ខ្លួនមិនឲ្យឆ្លងដែនខុសច្បាប់ទៅក្នុងទឹកដីគេបាន។ ប៉ុន្តែ ទោះជាក្នុងលក្ខខណ្ឌណាមួយក៏ដោយចុះ ការបាញ់សម្លាប់មនុស្សជារឿងដែលមិនអាចធ្វើបានឡើយនៅក្នុងប្រទេសនីតិរដ្ឋដែលមិនមែនជាប្រទេសដែលប្រើច្បាប់ព្រៃនោះ។ អាជ្ញាធរថៃមានសិទ្ធិពេញទីក្នុងការចាប់ខ្លួនពលរដ្ឋខ្មែរទាំងនោះទៅផ្តន្ទាទោសតាមច្បាប់របស់ខ្លួន ប៉ុន្តែ មិនមែនជាការបាញ់សម្លាប់។
ប៉ុន្តែ ជីវិតពលរដ្ឋខ្មែរត្រូវបានទាហានថៃប្រមាថម្តងហើយម្តងទៀត។ ចំណែកភាគីកម្ពុជាវិញបានត្រឹមតែធ្វើកំណត់ទូតតវ៉ាដែលគ្មានឥទ្ធិពលអ្វីទាំងអស់ទៅលើភាគីថៃ។ ប្រឈមនឹងបញ្ហានេះ រដ្ឋាភិបាលក្រុងភ្នំពេញត្រូវគេមើលឃើញថា ខ្វះភាពម៉ឺងម៉ាត់ក្នុងការការពារតម្លៃពលរដ្ឋរបស់ខ្លួន។ យ៉ាងណាក៏ដោយ ការលើកយកបញ្ហានេះមកពិភាក្សាក្នុងកិច្ចប្រជុំគណៈកម្មការព្រំដែនរួមរវាងប្រទេសទាំងពីរកាលពីខែមុនអាចចាត់ទុកជាកិច្ចខិតខំប្រឹងប្រែងមួយរបស់រដ្ឋាភិបាលក្រុងភ្នំពេញ។
ប៉ុន្តែ កិច្ចសន្យាជាលាយលក្ខណ៍អក្សរនេះត្រូវបានថៃបំពានជាថ្មីពោលគឺជានិច្ចកាល ថៃតែងប្រើប្រាស់យុទ្ធសាស្ត្រ ចាប់ដៃជាន់ជើង ជារៀងរហូត។ ក្នុងបរិបទនេះ កម្ពុជាគួរតែរិះរកមធ្យោបាយដើម្បីដោះស្រាយបញ្ហាជាបន្ទាន់។ ការបណ្តែតបណ្តោយឲ្យបញ្ហាដដែលៗកើតឡើងជាកំហុសធ្ងន់ណាស់របស់អាជ្ញាធរ។ មធ្យោបាយទី១គឺ អាជ្ញាធរកម្ពុជាត្រូវពង្រឹងការងាររបស់ខ្លួនដែរគឺធ្វើយ៉ាងណាកុំឲ្យពលរដ្ឋរបស់ខ្លួនឆ្លងដែនខុសច្បាប់ចូលទឹកដីរបស់គេជាពិសេសកុំឲ្យមានអ្នកអូសទាញពលរដ្ឋក្រីក្រទៅស៊ីឈ្នួលអូសឈើក្រញូងតទៅទៀត។
ម្យ៉ាងទៀត ក្នុងរណីដែលមានការបាញ់ប្រាហារទៅលើពលរដ្ឋខ្មែរជាថ្មី ការតវ៉ាគួរតែត្រូវបានដំឡើងឲ្យហួសពីកំណត់ទូតដែលធ្លាប់បានធ្វើ។ អ្វីដែលកម្ពុជាត្រូវបង្ហាញគឺមិនមែនភាពអមិត្តជាមួយប្រទេសជិតខាងឡើយតែជាការបង្ហាញភាពម៉ឺងម៉ាត់ក្នុងនាមជាប្រទេសដែលមានសិទ្ធិស្មើមុខមាត់គ្នា និង ជាប្រទេសដែលយកចិត្តទុកដាក់ចំពោះជីវិតនិងសេចក្តីថ្លៃថ្នូរនៃពលរដ្ឋរបស់ខ្លួន។ ការស្ថិតនៅក្នុងសភាពទ័លច្រកចំពោះបញ្ហានេះ ជាការមិនគួរគប្បីសោះឡើយ៕
© រក្សាសិទ្ធិដោយ thmeythmey.com