ជាតិ
សង្គមជាតិ
អាវពណ៌ខៀវ និងពណ៌ទឹកក្រូច របស់អ្នកជាប់ពន្ធនាគារ ខុសគ្នាដូចម្តេច ?
× ចំពោះលោកអ្នកដែលមិនបម្រើការងារទាក់ទងនឹងវិស័យតុលាការនៅកម្ពុជា លោកអ្នកប្រហែលមានចម្ងល់ខ្លះ ចំពោះអ្នកជាប់ពន្ធនាគារដែលខ្លះស្លៀកសម្លៀកបំពាក់ពណ៌ទឹកក្រូច និងខ្លះទៀត ស្លៀកពាក់ពណ៌ខៀវ។ តើមានន័យខុសគ្នាដូចម្តេច?
“នៅពន្ធនាគារនិងក្នុងតុលាការ អ្នកពាក់ឯកសណ្ឋានព័ណ៌ទឹកក្រូច មានន័យថា ជាពិរុទ្ធជន។ ចំណែកការស្លៀកពាក់ពណ៌ខៀវ មានន័យថា ទណ្ឌិត។ នេះបើតាមអ្នកស្រី នូ សំអន អ្នកគ្រប់គ្រប់គម្រោងពន្ធនាគារនៃអង្គការសិទ្ធិមនុស្ស លីកាដូ ដែលបានប្រាប់អ្នកព័ត៌មាន។ អ្នកស្រីបន្តថា«ឲ្យតែកំពុងស្ថិតក្នុងដំណាក់នីតិវិធីត្រូវបន្តឡើងសវនាវការ ពិរុទ្ធជន គឺត្រូវស្លៀកពាក់ពណ៌ទឹកក្រូចទាំងអស់»។
ចំពោះការស្លៀកពាក់ខោអាវពណ៌ខៀវរបស់ ទណ្ឌិត វិញ គឺមានន័យថា បុគ្គលនោះ ត្រូវបានតុលាការកាត់ទោសនិងបានចេញសាលក្រមស្ថាពររួចហើយ។ ទើបពួកគេតម្រូវឲ្យពាក់អាវពណ៌ខៀវ។
ទោះយ៉ាងណាក្តី រហូតមកដល់បច្ចុប្បន្ននេះ ពន្ធនាគារខ្លះនៅកម្ពុជា មិនទាន់បានផ្គត់ផ្គង់និងផ្តល់សម្លៀកបំពាក់ពណ៌«ទឹកក្រូច»ដល់«ពិរុទ្ធជន»គ្រប់គ្រាន់នៅឡើយទេ។ នេះបើតាមការសង្កេតរបស់មន្ត្រីរបស់អង្គការសម្ព័ន្ធខ្មែរជំរឿននិងការពារសិទ្ធិមនុស្ស ហៅកាត់ថា (LICADHO លីកាដូ) ខាងលើដដែល៕
© រក្សាសិទ្ធិដោយ thmeythmey.com