ជាតិ
នយោបាយជាតិ
គណៈមេធាវី៖ ជនបរទេសភាគច្រើនកំពុងលួចប្រកបវិជ្ជាជីវៈមេធាវី ដោយមិនចុះបញ្ជី
×
ភ្នំពេញ៖ គណៈមេធាវីកម្ពុជាសង្កេតឃើញថា ជនបរទេសភាគច្រើនកំពុងលួចប្រកបវិជ្ជាជីវៈ មេធាវី ដោយមិនបានចុះបញ្ជីស្របច្បាប់ពីគណៈមេធាវី។ សកម្មភាពលួចប្រកបវិជ្ជាជីវៈទាំងនោះរួមមាន ការបើកក្រុមហ៊ុនពិគ្រោះយោបល់ច្បាប់ ការយកការិយាល័យមេធាវីខ្មែរបិទបាំង និងមិនចុះបញ្ជីជាក្រុមហ៊ុន ជាដើម។
នៅក្នុងលិខិតស្នើសុំការអន្តរាគមន៍ពីក្រុមប្រឹក្សាអភិវឌ្ឍន៍កម្ពុជា (Council for the Development of Cambodia) ពាក់ព័ន្ធនឹងករណីប្រកបវិជ្ជាជីវៈមេធាវីខុសច្បាប់របស់ជន បរទេសនៅក្នុងប្រទេសកម្ពុជា គណៈមេធាវីកម្ពុជាបានសរសេរថា ការប្រកបវិជ្ជាជីវៈមេធាវី ដោយមិនបានចុះបញ្ជីនោះ បានធ្វើមេធាវីខ្មែរភាគច្រើនខកចិត្តជាខ្លាំង ដោយសារជនបរទេស ទាំងនោះបានយកឈ្មោះថ្នាក់ដឹកនាំរដ្ឋាភិបាលដើម្បីជាខ្នងបង្អែក។
នៅក្នុងលិខិតចុះថ្ងៃទី១៧ ខែកុម្ភៈ ដែលទើបតែផ្សព្វផ្សាយកាលពីថ្ងៃអង្គារម្សិលមិញ ប្រធានគណៈមេធាវី លោក ប៊ុន ហ៊ុន បានសរសេរ បញ្ជាក់ថា ក្នុងចំណោមជនបរទេសទាំងអស់ ដែលកំពុងប្រកបវិជ្ជាជីវៈមេធាវីក្នុងប្រទេស កម្ពុជានោះ មានតែមេធាវីការពារក្តីនៅអង្គជំនុំជម្រះ វិសាមញ្ញក្នុងតុលាការកម្ពុជា (អ.វ.ត.ក) ប៉ុណ្ណោះ ដែលបានស្នើសុំចុះបញ្ជីស្របតាមនីតិវិធី។
បើតាមលិខិតខាងលើ បច្ចុប្បន្ននេះ ការិយាល័យ និងក្រុមហ៊ុនប្រឹក្សាច្បាប់ជាង ១២កន្លែង កំពុងដំណើការនៅរាជធានីភ្នំពេញ ហើយក្នុងមួយការិយាល័យ ឬក្រុមហ៊ុនទាំងនោះមានជន បរទេសពី ១ ទៅ ១០នាក់។ ជនបរទេសទាំងនោះ រួមមាន សញ្ជាតិ អាមេរិកកាំង បារាំង ជប៉ុន ចិន កូរ៉េ និងសិង្ហបុរី៕
© រក្សាសិទ្ធិដោយ thmeythmey.com