ជាតិ
នយោបាយជាតិ
សង្គមស៊ីវិលថា បញ្ញត្តិថ្មីមិនចូលប្រជុំសភាជាការបោះបង់អាសនៈផ្ទុយពីលទ្ធិប្រជាធិបតេយ្យ
×
ភ្នំពេញ៖ សង្គមស៊ីវិលដែលតាមដានការបោះឆ្នោតនៅកម្ពុជា យល់ឃើញថា បញ្ញត្តិថ្មី ដែលកំណត់ថា បើគណបក្សនយោបាយណាមួយ មិនចូលប្រជុំសភា លើកដំបូងតាមការកោះអញ្ជើញរបស់ព្រះមហាក្សត្រ ចាត់ទុកថា ជាការបោះបង់អាសនៈ នោះ គឺជាបញ្ញត្តិផ្ទុយពីស្មារតីលទ្ធិប្រជាធិបតេយ្យកម្ពុជា ។
ខណៈបញ្ញត្តិថ្មី ស្ដីពីការបោះបង់អាសនៈបើគណបក្សនយោបាយណាមួយ មិនចូលប្រជុំសភា លើកដំបូងដែលក្រុមការងារគណបក្សនយោបាយកំណែទម្រង់ការបោះឆ្នោត កំពុងសិក្សា និងរៀបចំស្នើច្បាប់នៅពេលនេះ ត្រូវបានសង្គមស៊ីវិលតាមដានស្ថានការបោះឆ្នោតកម្ពុជា មើលឃើញថា បញ្ញត្តិថ្មីនេះផ្ទុយពីស្មារតីនៃលទ្ធិប្រជាធិបតេយ្យកម្ពុជា។ នាយកប្រតិបត្តិឃ្លាំមើលការបោះឆ្នោតនៃអង្គការនិចហ្វិច លោក ហង្ស ពុទ្ធា យល់ថា បញ្ញត្តិថ្មីនេះគឺជាចំណុចមួយល្អ ដែលអាចដោះស្រាយភាពជាប់គាំងនយោបាយក្រោយពេលបោះឆ្នោត ។
ប៉ុន្ដែលោកថា បញ្ញត្តិនេះ គឺគ្រាន់តែយុទ្ធសាស្ត្ររបស់គណបក្សកាន់អំណាច ដើម្បីត្រៀមទប់ស្កាត់គណបក្សដទៃទៀតនៅអាណត្តិក្រោយ ។ បើតាមលោក ហង្ស ពុទ្ធា បញ្ញត្តិនេះ គឺអាចធ្វើឲ្យប៉ះពាល់ដល់អាសនៈគណបក្សនយោបាយ និងរំលោភការជឿទុកចិត្តរបស់ប្រជាពលរដ្ឋទៀតផង ។
នាយកប្រតិបត្តិអង្គការ និចហ្វិច រូបនេះពន្យល់យ៉ាងដូច្នេះថា៖ « បញ្ញត្តិថ្មីនេះ គឺគណបក្សកាន់អំណាចបានគិតគូរពីភាពឈ្នះរបស់ខ្លួននៅអាណត្តិក្រោយ ដូច្នេះបញ្ញត្តិនេះ គឺជំរុញឲ្យគណបក្សដទៃត្រូវធ្វើតាមទិសដៅរបស់ខ្លួន ។ ហើយវាក៏អាចប៉ះពាល់គណបក្សនយោបាយដទៃទៀតដែរ ដូចជាការរើសអើង ឬលុបចោលអាសនៈដែលប្រជាពលរដ្ឋរាប់លាននាក់បោះឆ្នោតជូនតំណាងរាស្ត្រគណបក្ស ដែលពួកគេទុកចិត្ត»។
ទន្ទឹមនឹងនេះ នាយកប្រតិបត្តិឃ្លាំមើលការបោះឆ្នោតខុមហ្វ្រែលលោក គល់ បញ្ញា មានប្រសាសន៍ថា បញ្ញត្តិថ្មីកំណត់គណបក្សនយោបាយណាមិនចូលប្រជុំសភាចាត់ទុកជាការបោះបង់អាសនៈនេះ មិនគួរគំណត់ក្នុងច្បាប់បោះឆ្នោតអណត្តិក្រោយឡើយ ។ លោកបន្ថែមថា ការចូលឬមិនចូលសភាគឺសិទ្ធិតំណាងរាស្ត្រគណបក្សនោះ ព្រោះពួកគេជាប់ឆ្នោតដោយសារឆន្ទៈរបស់ប្រជាពលរដ្ឋ ។
លោកអត្ថាធិប្បាយបន្ថែមទៀតថា៖ « ការប្រជុំសភាដំបូងនោះ គឺគ្រាន់តែជាការប្រកាសសុពលភាពតំណាងរាស្ត្រដោយព្រះមហាក្សត្រប៉ុណ្ណោះ ដូចនេះបើតំណាងរាស្ត្រគណបក្សណាមិនចូលគឺពួកគេមិនបានទទួលប្រាក់ខែ ឬអភ័យឯកសិទ្ធិតំណាងរាស្ត្រខ្លួន ។ ហើយមិនចាំបាច់ចែងច្បាប់បោះបង់អាសនៈ បើមិនចូលប្រជុំនោះទេ ព្រោះផ្ទុយច្បាប់រដ្ឋធម្មនុញ្ញកម្ពុជា» ។ លោក គល់ បញ្ញា បញ្ជាក់ថា៖ « ការលុបចោលអាសនៈរបស់គណបក្សនយោបាយបាន លុះត្រាតែគណបក្សនោះមិនព្រមទទួលស្គាល់ពីអាសនៈរបស់ពួកគេក្នុងរដ្ឋសភា »។
កាលពីថ្ងៃទី០២ មីនា លោក ប៊ិន ឈិន ប្រធានក្រុមការងារគណបក្សប្រជាជនកម្ពុជា បានស្នើដាក់បញ្ញត្តិថ្មីក្នុងច្បាប់បោះឆ្នោត ដោយកំណត់ថា បើគណបក្សនយោបាយណាមួយ មិនចូលប្រជុំសភា លើកដំបូងតាមការកោះអញ្ជើញរបស់ព្រះមហាក្សត្រ ចាត់ទុកជាការបោះបង់អាសនៈ ។ ហើយលោកថា ច្បាប់នេះគឺមិនមែនចាប់បង្ខំគណបក្សណាមួយនោះទេ ។ តែគ្រាន់ឲ្យគណបក្សសង្គ្រោះជាតិ ត្រៀមលក្ខណៈសិក្សាចំពោះចំណុចនេះប៉ុណ្ណោះ ព្រោះថាច្បាប់នេះនឹងត្រូវដាក់បញ្ចូលទៅក្នុងសេចក្ដីព្រាងច្បាប់បោះឆ្នោតថ្មីនេះ។
តែយ៉ាងណាសំណើនេះប្រធានក្រុមការងារគណបក្សសង្គ្រោះជាតិ លោក គួយ ប៊ុនរឿន មិនទាន់ឯកភាពចំណុច ដែលគណបក្សប្រជាជនបានស្នើនោះឡើយ ដោយលោកត្រូវជួបពិភាក្សាជាមួយថ្នាក់ដឹកនាំគណបក្សសង្គ្រោះជាតិសិន ក្នុងការសិក្សាលក្ខណៈ និងចំណុចសំខាន់ក្នុងបញ្ញតិ្តថ្មីនេះ ដើម្បីកុំឲ្យប៉ះពាល់ដល់គោលការណ៍លទ្ធិប្រជាធិបតេយ្យ ការគោរពសិទ្ធិមនុស្ស ឬឆន្ទៈរបស់ប្រជាពលរដ្ឋ ៕
© រក្សាសិទ្ធិដោយ thmeythmey.com