ជាតិ
វិស័យទេសចរណ៍«ជាមាសបៃតង»ក្នុងការអភិវឌ្ឍន៍សេដ្ឋកិច្ច និងសង្គម
×
វិស័យទេសចរណ៍ជាវិស័យអាទិភាពដែលតួនាទី «ជាមាសបៃតង» រួមចំណែកអភិវឌ្ឍន៍សេដ្ឋកិច្ច-សង្គម តាមរយៈការបង្កើតឱកាសការងារ បង្កើនប្រាក់ចំណូលដល់ប្រជាពលរដ្ឋដោយផ្ទាល់ និងដោយប្រយោល ជំរុញការនាំចេញនៅនឹងកន្លែង ទ្រទ្រង់កំណើនសេដ្ឋកិច្ច បង្កើនចំណូលជាតិ ចូលរួមកាត់បន្ថយភាពក្រីក្រ ពិសេសឆ្លើយតបនឹងបញ្ហាប្រែប្រួលអាកាសធាតុដែលជាប្រឈមជាសាកល។ នេះបើយោងតាមសារលិខិតរបស់លោក នាយករដ្ឋមន្ត្រី ហ៊ុន សែន ក្នុងឱកាសបុណ្យទន្លេលើកទី១ ដែលនឹងប្រារព្ធធ្វើនៅខេត្តក្រចេះ ចាប់ពីថ្ងៃទី១៣-១៥មីនាខាងមុខនេះ។
នៅក្នុងលិខិតដដែលនោះ លោក ហ៊ុន សែន បានលើកឡើងថា ព្រឹត្តិការណ៍បុណ្យទន្លេដែលនឹងរៀបចំធ្វើជាលើកដំបូងនៅក្នុងខេត្តក្រចេះ ក្រោមប្រធានបទ«ទេសចរណ៍តាមដងទន្លសម្រាប់ការអភិវឌ្ឍសហគមន៍» នឹងក្លាយជាព្រឹត្តិការណ៍ប្រវត្តិសាស្ត្រសម្រាប់កម្ពុជា។ ព្រឹត្តិការណ៍នេះ មិនត្រឹមតែចូលរួមចំណែកផ្សព្វផ្សាយសក្តានុពលទេសចរណ៍នៃខេត្តជាប់ដងទន្លេរបស់កម្ពុជាប៉ុណ្ណោះទេ តែចូលរួមគាំទ្រ នយោបាយរបស់រាជរដ្ឋាភិបាល ក្នុងការយកចិត្តទុកដាក់អភិវឌ្ឍន៍តំបន់តាមដងទន្លេប្រកបដោយនិរន្តរភាព និងការទទួលខុសត្រូវ ព្រមទាំងជំរុញសេដ្ឋកិច្ចនៅមូលដ្ឋាន ការពារ និងអភិរក្សធនធានធម្មជាតិ។
លិខិតដដែលបានបន្តថា ព្រឹត្តិការណ៍នេះក៏ជាឱកាសមួយដើម្បីពង្រឹងគុណភាពសេវាកម្ម ការបង្កើត និងច្នៃប្រឌិតផលិតផលទេសចរណ៍ អភិវឌ្ឍន៍សហគមន៍ទេសចរណ៍តាមដងទន្លេ ព្រមទាំងរួមចំណែកជំរុញការតភ្ជាប់ រឹតចំណងមិត្តភាព សាមគ្គីភាពរវាងបណ្តាប្រទេសនៅតំបន់អាស៊ាន ពិសេសពង្រឹងភាពជាដៃគូ ក្នុងក្របខណ្ឌមហាអនុតំបន់មេគង្គ និងមេគង្គ-ជប៉ុនជាដើម។
លោក ហ៊ុន សែន បានបញ្ជាក់នៅ ក្នុងលិខិតនោះថា រាជរដ្ឋាភិបាលកម្ពុជា នឹងប្រារព្ធបុណ្យទន្លេជារៀងរាល់ឆ្នាំនាពេលអនាគត នៅតាមបណ្តាខេត្តជាប់ដងទន្លេរបស់កម្ពុជា។ ជាមួយគ្នានោះដែរ លោក ក៏បានអំពាវនាវ ក្រសួង ស្ថាប័នពាក់ព័ន្ធ អាជ្ញាធរ កងកម្លាំងប្រដាប់ សាធារណជនចូលរួមឲ្យបានផុសផុល នាឱកាសបុណ្យទន្លេនៅឆ្នាំនេះ ព្រមទាំងចូលរួមសហការថែរក្សាអនាម័យ សណ្តាប់ធ្នាប់ និងបរិស្ថាននាឱកាសនោះផងដែរ៕
© រក្សាសិទ្ធិដោយ thmeythmey.com