ជាតិ
×![]()
ដោយ: លីម តុលា
ភ្នំពេញ៖ ទីភ្នាក់ងារអភិវឌ្ឍន៍បារាំងកំពុងក្លាយជាដៃគូផ្តល់ជំនួយទ្វេភាគីធំជាងគេដល់កម្ពុជា ក្នុងចំណោមបណ្តាស្ថាប័នមកពីអឺរ៉ុប។ ចាប់តាំងពីឆ្នាំ១៩៩៣រហូតមកដល់ពេលនេះ ទីភ្នាក់ងារអភិវឌ្ឍន៍បារាំង AFD បានសន្យាផ្តល់ហិរញ្ញប្បទានជិត៤០០លានដុល្លារ ក្នុងនោះ AFD បានផ្តល់ជូនដល់កម្ពុជារួចហើយចំនួន១៧០លានដុល្លារ។
សេចក្តីប្រកាសព័ត៌មានរបស់ស្ថានទូតបារាំងប្រចាំកម្ពុជា បានបញ្ជាក់ថា ឆ្នាំ២០១៤កន្លងមក បានក្លាយទៅជាឆ្នាំប្រវត្តិសាស្ត្រសម្រាប់ប្រតិបត្តិការហិរញ្ញវត្ថុរបស់ទីភ្នាក់ងារ AFD ដែលបានសន្យាផ្តល់ជំនួយជាង១០០លានដុល្លារអាមេរិកដល់កម្ពុជា។ ស្ថានភាពនេះនឹងបន្តនៅឆ្នាំ២០១៥ទៀត ដោយហេតុថា AFD មានគម្រោងបង្កើនការផ្តល់កម្ចីទ្វេដងនៅឆ្នាំ២០១៥នេះ។ ជារួម ចាប់តាំងពីដំណើរការសកម្មភាពរបស់ខ្លួនក្នុងប្រទេសកម្ពុជានៅឆ្នាំ១៩៩៣មក ទីភ្នាក់ងារ AFD បានសន្យាផ្តល់ហិរញ្ញប្បទានជិត៤០០លានដុល្លារ ក្នុងនោះបានផ្តល់ជូនរួចហើយចំនួន១៧០លានដុល្លារ។
កាលពីឆ្នាំកន្លងទៅ ទីភ្នាក់ងារអភិវឌ្ឍន៍បារាំងក៏បានបង្កើនការផ្តល់ប្រាក់កម្ចីគ្មានការធានាពីរដ្ឋផងដែរ ពោលគឺជាកម្ចីដែលផ្តល់អោយផ្នែកឯកជន ស្ថាប័នសាធារណ: ឬពាក់កណ្តាលសាធារណ:ជាដើម។ ជាក់ស្តែងនៅឆ្នាំ២០១៤ ទីភ្នាក់ងារ AFD បានចុះហត្ថលេខាលើកិច្ចព្រមព្រៀងហិរញ្ញប្បទានជាច្រើនជាមួយស្ថាប័នមីក្រូហិរញ្ញវត្ថុនិងធនាគារពាណិជ្ជកម្ម ក្នុងក្របខ័ណ្ឌនៃគម្រោងទទួលបានទឹកស្អាត និងអគ្គិសនីនៅតាមទីជនបទ ដែលមានទឹកប្រាក់សរុបចំនួន២១លានដុល្លារ (ក្នុងនោះឥណទាន១៥លានដុល្លារត្រូវបានផ្តល់អោយធនាគារពាណិជ្ជកម្មក្រៅប្រទេសនៃកម្ពុជា និង៦លានដុល្លារទៀតអោយស្ថាប័នមីក្រូហិរញ្ញវត្ថុក្រេឌីត ធនាគារភូមិ និងវីសិនហ្វាន់)។ គម្រោងទាំងនេះមានលក្ខណ:ថ្មីសម្រាប់កម្ពុជា ដោយសារវាផ្សំបញ្ចូលគ្នានូវឧបករណ៍ហិរញ្ញវត្ថុជាច្រើន មានដូចជាកម្ចី ហិរញ្ញប្បទានសម្បទាន និងការធានា) ព្រមទាំងមានការចូលរួមទាំងពីផ្នែកឯកជន និងសាធារណ:ផងដែរ៕
© រក្សាសិទ្ធិដោយ thmeythmey.com
