ជាតិ
កម្ពុជាមិនអនុញ្ញាតឲ្យមានបណ្តាញម៉ាហ្វីយ៉ាបរទេស
×
ភ្នំពេញ៖ អគ្គស្នងការនគរបាលជាតិ លោក នេត សាវឿន បាននិយាយថា កម្ពុជាមិនអនុញ្ញាតឲ្យមានជនម៉ាស្យាបរទេសចូលមកប្រព្រឹត្តបទល្មើសខុសច្បាប់ នៅក្នុងទឹកដីកម្ពុជាឡើយ ដោយលោកបានបញ្ជាឲ្យថ្នាក់ដឹកនាំកងកម្លាំងមានសមត្ថកិច្ចទាំងអស់ ត្រូវខិតខំទប់ស្កាត់ និងស្រាវជ្រាវរកជនទាំងនោះ មកផ្តន្ទាទោសទៅតាមផ្លួវច្បាប់ជាដាច់ខាត។ នេះបើតាមការផ្សាយរបស់អគ្គស្នងការដ្ឋាននគរបាលជាតិ។
យោងតាមអគ្គស្នងការដ្ឋាននគរបាលជាតិ នៅក្នុងពិធីផ្សព្វផ្សាយការរៀបចំសេចក្តីព្រាងផែន ការ ការពារសន្តិសុខ សុវត្ថិភាពដល់អ្នកវិនិយោគិន ភ្ញៀវទេសចណ៍ និងតំណាងបណ្តាស្ថាន ទូតបរទេសចំនួន ២៧ប្រទេស កាលពីថ្ងៃ ១៣ មិនាកន្លងមក លោក នេត សាវឿន អគ្គស្នងការនគរបាលជាតិ បានថ្លែងថា កម្ពុជាទទួលស្វាគមន៍តែភ្ញៀវបរទេស ដែលមកធ្វើទេសចរណ៍ និងអាជីវកម្មស្របច្បាប់ត្រឹមត្រូវតែប៉ុណ្ណោះ។ លោកបញ្ជាក់ថា កម្ពុជាមិនអនុញ្ញាតឲ្យម៉ាស្យាបរទេស មកប្រព្រឹត្តបទល្មើសនោះទេ។
ការលើកឡើងរបស់អគ្គស្នងការនគបាលជាតិនោះ បានធ្វើឡើង បន្ទាប់ពីនៅរយៈពេលចុងក្រោយនេះ លោកបានពិនិត្យឃើញថា ជនបរទេសភាគច្រើន បានប្រព្រឹត្តអំពើខុសច្បាប់ នៅលើទឹកដីខេត្តព្រះសីហនុ។
បើតាមប្រភពខាងលើ លោក នេត សាវឿន បានបញ្ជាក់ថា បទល្មើសដែលកើតឡើងច្រើន ដោយជនបរទេស គឺភាពច្រើនមានការគុំកួន តាមបាញ់សំលាប់ បទល្មើសដណើ្តមស្រីកំណាន់ បទល្មើសក្នុងជំលោះការធ្វើអាជីវកម្មជាដើម ។ ក្រៅពីនេះ លោកបន្តថា ជនបរទេសមួយចំនួនទៀត បានប្រពឹត្តបទល្មើសនានា ដែលជាទង្វើខុសច្បាប់ និងប្រពៃណីទាំងស្រុង នៅកម្ពុជា ដូចជា ការជិះម៉ូតូអាក្រាតកាយ នៅខេត្តកណ្តាល ជិះម៉ូតូស្លៀកស្លីប នៅខេត្តព្រះសីហនុ និងការថតរូបអាក្រាតកាយ នៅសៀមរាបជាដើម។
ទន្ទឹមគ្នានោះដែរ លោក នេត សាវឿន បានអះអាង សមត្ថកិច្ចនឹងបង្កើតប៉ុស្តិ៍នគរបាលចល័ត សហការជាមួយអាជ្ញាធរពាក់ព័ន្ធបន្ថែម សំដៅធ្វើយ៉ាងធនារក្សាការពារសន្តិសុខ សុវត្ថិភាព ឲ្យបានល្អប្រសើរជាងមុន នៅថ្ងៃខាងមុខ។
បើតាមការផ្សាយរបស់អគ្គស្នងការរងនគរបាលជាតិ នៅក្នុងឆ្នាំ២០១៤ កម្ពុជាបានទទួលភ្ញៀវទេសចរណ៍បរទេសជាង ៤លាននាក់ និងអ្នកវិនិយោគទុនជាង ២០ម៉ឺននាក់៕
© រក្សាសិទ្ធិដោយ thmeythmey.com