ជាតិ
អ្នកគ្រូ នាង ផល្លា៖ « នៅពេលដែលគេឮឈ្មោះខ្ញុំ មិនចាំបាច់ប្រាប់គេថា មកពីកម្ពុជាទេ »
×
គ្រាន់តែចុះពីយន្តហោះភ្លាម អ្នកគ្រូ នាង ផល្លា បានថ្លែងថា ខ្លួនមានមោទកភាពក្រៃលែង ដែលបានឲ្យពិភពលោកស្គាល់កម្ពុជាកាន់តែច្រើនឡើយ បើទោះបីជាអ្នកគ្រូ មិនបានជាប់ជ័យលាភីGlobal Teacher prize ក៏ដោយ។
អ្នកគ្រូ នាង ផល្លា បានបញ្ជាក់ដូច្នេះថា៖« អ្វីដែលខ្ញុំមានមោទកភាពបំផុត គឺនៅក្នុងវេទិកាGlobal Education and Skills Forum នៅទីក្រុងឌូបៃ នៅពេលដែលគេឃើញខ្ញំ់ និងឮឈ្មោះខ្ញុំ ខ្ញុំមិនបាច់ណែនាំខ្លួនថា ខ្ញុំមកពីកម្ពុជាទេ ព្រោះគេស្គាល់រួចទៅហើយ» ។
ដំណើរត្រឡប់មកកម្ពុជារបស់អ្នកគ្រូ នាង ផល្លា នៅព្រឹកនេះ បានទទួលការស្វាគមន៍ពីមនុស្សជាច្រើនរយនាក់ ក្នុងនោះមានលោករដ្ឋមន្ត្រីក្រសួងអប់រំ ហង់ ជួន ណារ៉ុន និងលោក ហ៊ុន ម៉ានី នៅព្រលានយន្តហោះអន្តរជាតិភ្នំពេញ។ អ្នកចូលរួមភាគច្រើន បានលើកបដា ដែលសរសេរសរសើរអ្នកគ្រូ នាង ផល្លា ថា ជាគ្រាប់ពេជ្រនៃស្ត្រីកម្ពុជា ដែលធ្វើឲ្យកម្ពុជាមានកិត្តិយសនៅលើឆាកអន្តរជាតិ។
ថ្លែងនៅក្នុងពិធីនោះ លោក ហង់ ជួន ណារ៉ុន បានប្រាប់អ្នកកាសែតយ៉ាងខ្លីថា៖ «ក្នុងនាមលោកជារដ្ឋមន្ត្រីក្រសួងអប់រំ លោក មានមោទកភាពណាស់ចំពោះអ្នកគ្រូ នាង ផល្លា »។
បើទោះបីជាប្រាក់រង្វាន់១លានដុល្លារអាមេរិកនៃកម្មវិធី Global Teacher Prize បានធ្លាក់ទៅអ្នកស្រី Nancie Atwell គ្រូបង្រៀនមកពីសហរដ្ឋអាមេរិកក៏ដោយ ប៉ុន្តែអ្នកស្រី នាង ផល្លា គ្រូបង្រៀនរបស់កម្ពុជានៅមានឱកាសឈ្នះរង្វាន់គ្រូមានប្រជាប្រិយភាពជាងគេនៅលើបណ្តាញសង្គមហ្វេសប៊ុក (Most Popular Teacher on Facebook)។ ការបោះឆ្នោតដំណើរការរហូតដល់វេលាម៉ោង១២ និង៥៩នាទី យប់ថ្ងៃអង្គារ ទី១៧ ខែមីនា។
ជាមួយគ្នានេះដែរ លោកនាយករដ្ឋមន្ត្រី ហ៊ុន សែន នឹងផ្តល់ប្រាក់រង្វាន់១០០លានរៀល ព្រមទាំងបំពាក់គ្រឿងឥស្សរិយយសដល់គ្រូឆ្នើមរូបនេះផងដែរ៕
© រក្សាសិទ្ធិដោយ thmeythmey.com