ជាតិ
អ្នករៀបចំកម្មវិធី អបអរអ្នកគ្រូ នាង ផល្លា ដែលបានការគាំទ្រច្រើនជាងគេពីអ្នកប្រើប្រាស់ហ្វេសប៊ុក
× មូលនិធិ Varkey Foundation ដែលមានទីស្នាក់ការនៅទីក្រុងឌូបៃ ប្រទេសអារ៉ាប់រួម អេមីរ៉េត បានផ្ញើរសារអបអរសាទរអ្នកស្រី នាង ផល្លា និងអង្គការគ្រួសារថ្មី ខណៈគ្រូបង្រៀនកុមារគរថ្លង់ដែលមានបទពិសោធន៍ប្រមាណ២០ឆ្នាំរូប ទទួលបានសំឡេងគាំទ្រដាច់គេសម្រាប់ការបោះឆ្នោតនៅតាមបណ្តាញសង្គមហ្វេសប៊ុក។
អ្នកគ្រូ នាង ផល្លា របស់កម្ពុជា ទទួលបាននូវសំឡេងគាំទ្រសរុបចំនួន១២៧ ១៤៥សំឡេង ក្នុងកម្មវិធី People’s Vote #TeacherPrize។ ក្នុងកម្មវិធីនេះ អ្នកបោះឆ្នោតអាចមើលសកម្មភាពការងាររបស់គ្រូបង្រៀនកំពូល១០នាក់លើលោកតាមរយៈសកម្មភាពវីដេអូឯកសារ។
អ្នករៀបចំកម្មវិធីមិនបានបញ្ជាក់ពីប្រាក់រង្វាន់ទាក់ទងនឹងការឈ្នះការបោះឆ្នោតតាមបណ្តាញសង្គមនោះឡើយ។ លោក Azizullah Royesh គ្រូបង្រៀនរបស់អាហ្វហ្គានីស្ថាន ទទួលបានការគាំទ្រលំដាប់ទីពីរ (៤៥៦៩៩សំឡេង) គ្រូបង្រៀនម៉ាឡេស៊ី លោក Madenjit Singh ស្ថិតនៅលំដាប់ទីបី (១០១៥សំឡេង) ខណៈគ្រូ៧រូបផ្សេងទៀតទទួលបានការគាំទ្រក្រោម១០០០សំឡេង។
អ្នកស្រី Nancie Atwell គ្រូបង្រៀនមកពីសហរដ្ឋអាមេរិក ដែលជាម្ចាស់ពានរង្វាន់ Global Teacher Prize ឆ្នាំ២០១៥ ជាមួយនឹងទឹកប្រាក់១លានរៀននោះ ទទួលបានការគាំទ្រ៨២១សំឡេងពីអ្នកប្រើប្រាស់បណ្តាញសង្គមហ្វេសប៊ុក។
កន្លងមក អង្គការគ្រួសារថ្មី បានសរសេរនៅលើទំព័រហ្វេសប៊ុករបស់ខ្លួនថា ទោះបីជាអ្នកគ្រូ នាង ផល្លាដែលបច្ចុប្បន្នជានាយិកាសាលាកុមារពិការភ្នែកភ្នំពេញថ្មី និងជាប្រធានសម្របសម្រួល កម្មវិធីអប់រំកុមារពិការភ្នែក និងគថ្លង់របស់អង្គការគ្រួសារថ្មី មិនបានជាប់ចំណាត់ថ្នាក់លេខមួយក៏ដោយ ប៉ុន្តែអ្នកស្រីបានទាក់ទាញបេះដូងប្រជាពលរដ្ឋកម្ពុជាជាច្រើនទាំងក្នុង និងក្រៅប្រទេស៕
© រក្សាសិទ្ធិដោយ thmeythmey.com