ជាតិ
បទយកការណ៍ / បទសម្ភាសន៍
នារីសម័យថ្មីប្រើហ្វេសប៊ុកដើម្បីពិសោធន៍ចិត្តគូស្នេហ៍
× ភ្នំពេញ៖ បច្ចុប្បន្ននេះ ហ្វេសប៊ុក គឺជាបណ្តាញទំនាក់ទំនងសង្គមមួយដែលមានឥទ្ធិពលខ្លាំង បំផុតចំពោះយុវជន យុវវតីសម័យថ្មី។ ពួកគេប្រើវាដើម្បី ផ្សព្វផ្សាយពាណិជ្ជកម្មពីមុខជំនួញ បង្ហោះព័ត៌មានផ្សេងៗ វីដេអូកម្សាន្ត បង្ហោះរូបភាពស្អាតៗដើម្បីទាក់ទាញការចាប់អារម្មណ៍ ឬសរសេររៀបរាប់ពីអារម្មណ៍ប្រចាំថ្ងៃប្រាប់ទៅកាន់មិត្តភក្តិជាដើម។ លើសពីនេះទៀតបណ្តាញសង្គមមួយនេះក៏ជាមធ្យោបាយដែលជួយអោយគូសង្សាររឹតចំណងស្នេហ៍អោយកាន់តែស្អិតល្មួត និងពិសោធន៍ចិត្តគ្នាបានយ៉ាងមានប្រសិទ្ធិភាពផងដែរ។
តើនារីសម័យថ្មីពិសោធន៍ចិត្តគូស្នេហ៍តាមរយៈហ្វេសប៊ុកដោយវិធីណា?
កញ្ញា ដារី វ័យ២០ឆ្នាំ បានសារភាពថានាងមានសង្សារម្នាក់ស្រឡាញ់គ្នាបានជាងពីរឆ្នាំមកហើយ។ នាងបានបង្កើតអនុស្សាវរីយ៍យ៉ាងស្អិតល្មួតជាមួយគ្នាជាច្រើន ជាពិសេសគឺការសាសងពាក្យពេចន៍ផ្អែមល្ហែមតាមរយៈបណ្តាញសង្គមហ្វេសប៊ុករៀងរាល់ថ្ងៃ។ ប៉ុន្តែ ដារី បានបង្ហើបអោយដឹងថា នាងនៅមិនទាន់ទុកចិត្តថាគូស្នេហ៍របស់នាង ស្រឡាញ់ស្មោះ ឬយ៉ាងណានោះទេ។
ថ្ងៃមួយយុវតីសម្បុរស សក់ពណ៌ទង់ដែងរូបនេះ បានសាកល្បងពិសោធន៍ចិត្តគូស្នេហ៍របស់ខ្លួនសាកលមើល..! ។ នាងបានរៀបរាប់ពីដំណើររឿងថា ដំបូងនាង និងគូសង្សាររបស់នាង មានគណនីហ្វេសប៊ុកម្នាក់មួយ ក្រោយមកនាងបានបង្កើតគណនីហ្វេសប៊ុកថ្មីមួយទៀត ដោយដាក់រូបនារីស្រស់ស្អាតម្នាក់ជារូប Profile ហើយដាក់ឈ្នោះថ្មីថា លីនដា ក្រោយមកនាងបានទំនាក់ទំនងទៅកាន់សង្សាររបស់នាងសុំធ្វើជាមិត្ត (Add friend) ។ កញ្ញា ដារី ញ្ជាក់ថា«អ្វីដែលគួរអោយហួសចិត្តនោះគឺ ខ្ញុំ Add គាត់មិនទាន់បានមួយនាទីផង គាត់ក៏ Confirm ខ្ញុំភ្លាម ដោយមិនដឹងថាអ្នកកំពុងលេងជាមួយគាត់នោះគឺជាខ្ញុំនោះទេ»។
ក្រោយពីបានក្លាយជាមិត្តគ្នាហើយ បុរសជាគូស្នេហ៍របស់ ដារី មិនបង្អង់យូរឡើង រូបគេ ចាប់ផ្តើមផ្ញើរសារជាបន្តបន្ទាប់ទៅកាន់ កញ្ញា លីនដា សួរនាំពីអាយុ កន្លែងរស់នៅ ការសិក្សា និងសុំលេខទូរសព្ទផងដែរ។
មិនយូរប៉ុន្មាន បុរសដែលជាសង្សាររបស់ ដារី ដាច់ចិត្តសួរទៅកាន់កញ្ញា លីនដា ដែលជាតួអង្គក្លែងក្លាយថា៖«តើមានសង្សារហើយឬនៅ?»។ ក្រោយពី៎ឮសំនួរនេះហើយ លីនដា មិនបានឆ្លើយតបភ្លាមៗនោះទេ នាបានសួរសំនួរនេះត្រឡប់ទៅកាន់បុរសនោះវិញ។ គូស្នេហ៍របស់កញ្ញា ដារី បានឆ្លើយដោយមិនស្ទាក់ស្ទើរប្រាប់ទៅកាន់ លីនដា វិញថា៖«ខ្ញុំមិនទាន់មានសង្សារនោះទេ ហើយក៏កំពុងតែរកសង្សារម្នាក់ដែរ»។ កញ្ញា ដារី បន្តទៀតថា ក្រោយពីបានទទួលចំលើយនេះហើយ ទឹកភ្នែករបស់នាងហូរស្រក់ជាបន្តបន្ទាប់ទប់មិនឈ្នះ ដោយបានដឹងច្បាស់ថា គូស្នេហ៍របស់នាងមិនបានស្រឡាញ់នាងស្មោះឡើយ។
សូមបញ្ជាក់ថា បច្ចុប្បន្ននេះបណ្តាញសង្គមហ្វេសប៊ុក កំពុងមានឥទ្ធិពលខ្លាំងលើស្រទាប់យុវវ័យ ក្នុងការបង្កើតទំនាក់ទំនង និងការបង្កើតចំណងស្នេហាបានយ៉ាងងាយ។ ភាពងាយស្រួលនេះហើយ ដែលជម្រុញអោយគូស្នេហ៍មួយចំនួនមិនទុកចិត្តគ្នា និងឈានដល់ការបែកបាក់៕
© រក្សាសិទ្ធិដោយ thmeythmey.com