អន្តរជាតិ
អាជ្ញាធរហាណូយបោះបង់ចោលគម្រោងកាប់ដើមឈើ ក្រោយឃើញប្រជាជនខឹងសម្បារខ្លាំង រូបភាព៖ Google
× នៅទីបំផុត អាជ្ញាធរវៀតណាមបានសម្រេចចិត្តលុបចោលគម្រោងកាប់ដើមឈើ៦០០០ដើម នៅទីក្រុងហាណូយវិញ ក្រោយមហាជនតាមបណ្តាញសង្គមវៀតណាមជាច្រើននាក់បានបញ្ចេញមតិខឹងសម្បារ រហូតនាំគ្នាបង្កើតក្រុមហ្វេសប៊ុកដើម្បីប្រឆាំងគម្រោង។
ប្រជាជនវៀតណាមក៏បានធ្វើបាតុកម្មទ្រង់ទ្រាយតូចមួយដែរ ដើម្បីប្រឆាំងគម្រោងកាប់ដើមឈើនៅហាណូយ។ ក្រុមតវ៉ាហ្វេសប៊ុកបានបញ្ចេញកំហឹង និងទាមទារអោយជួយការពារដើមឈើ។ កាលពីថ្ងៃសុក្រ ក្រុមតវ៉ាហ្វេសប៊ុកនេះបានទទួលការចុចLike ដល់ទៅ៣០ ០០០Like។ ចៅហា្វយក្រុងហាណូយបានសុំអោយបញ្ឈប់គម្រោងនេះចោលវិញ។
ដំបូងឡើយ អាជ្ញាធរក្រុងហាណូយមានផែនការកាប់ដើមឈើ៦០០០ដើម ដើម្បីរៀបចំក្រុង ជាមួយថវិកា ៣ ៤០០០ ០០០ ដុល្លារ។ គម្រោងរៀបចំក្រុងមានទិសដៅកែលំអសុវត្ថិភាពសន្តិសុខ តាមដងផ្លូវអោយកាន់តែប្រសើរ។ ប៉ុន្តែ ប្រជាជនសង្ស័យថា អាជ្ញាធរចង់កេងប្រយោជន៍កាប់ដើមឈើក្រុងរាប់ពាន់ដើមនេះ យកទៅលក់យកផលចំណេញវិញ។
ទីក្រុងហាណូយត្រូវបានគេស្គាល់គ្រប់ៗគ្នាថា សំបូរផ្លូវធំៗដែលមានដើមឈើ មានទេសភាពខៀវស្រងាត់ល្អ ហើយក៏មានទីកន្លែងស្អាតៗបន្សល់ទុកតាំងពីជំនាន់អាណានិគមបារាំងផងដែរ។ ដើមឈើក្នុងក្រុងច្រើនជាប្រភេទឈើល្អ ហើយមានអាយុចំណាស់រាប់រយឆ្នាំឯណោះ៕
© រក្សាសិទ្ធិដោយ thmeythmey.com