អន្តរជាតិ
នយោបាយអន្តរជាតិ
មេដឹកនាំពិភពលោក៖ លោក លី ក្វាន់យូ ជាមនុស្សប្រវត្តិសាស្ត្រមួយរូបដ៏មានឥទ្ធិពលនៅអាស៊ី
× ក្រោយការទទួលមរណៈភាពភ្លាមៗរបស់បិតាស្ថាបនិកសិង្ហបុរី លោក លី ក្វាន់យូ មេដឹកនាំពិភពលោកបានផ្ញើសាររំលែកមរណៈទុក្ខជាបន្តបន្ទាប់ជាមួយក្រុមគ្រួសាររបស់ លី ស៊ានឡុង នាយករដ្ឋមន្ត្រីសិង្ហបុរី និងជាមួយប្រជាជនសិង្ហបុរី។
ប្រធានាធិបតីអាមេរិក បារ៉ាក់ អូបាម៉ា៖
«ក្នុងនាមប្រជាជនអាមេរិក ក្នុងនាមភរិយា និងរូបខ្ញុំ ខ្ញុំសូមចែករំលែកមរណៈទុក្ខដ៏ក្រៀមក្រំបំផុតជាមួយក្រុមគ្រួសារលោកលី និងសូមចូលរួមជាមួយប្រជាជនសិង្ហបុរីដែលកាន់ទុក្ខចំពោះការបាត់បង់មនុស្សជាទីគោរពរបស់ពួកគេ។ ទស្សនៈទានដ៏ជ្រាលជ្រៅនៃការការគ្រប់គ្រងសេដ្ឋកិច្ចដ៏រស់រវើកនៅអាស៊ី របស់លោកលី បានទទួលការគោរពមនុស្សក្នុងពិភពលោក។ ខ្ញុំផ្ទាល់ខ្លួនបានស្ញប់ស្ញែងបញ្ញាញាណរបស់លោកលី ពិសេសការពិភាក្សារវាងខ្ញុំនិងលោកក្នុងដំណើរទស្សនកិច្ចរបស់ខ្ញុំទៅកាន់សិង្ហបុរីក្នុងឆ្នាំ២០០៩ ដែលបានជួយខ្ញុំច្រើនក្នុងការរៀបចំគោលនយោបាយពង្រឹងតួនាទីអាមេរិកនៅក្នុងតំបន់អាស៊ីប៉ាស៊ីហ្វិក។ លោកលី គឺជាយក្សពិតប្រាកដនៅក្នុងប្រវត្តិសាស្ត្រ ដែលនឹងត្រូវគេចងចាំគ្រប់ជំនាន់»។
អតីតប្រធានាធិបតីអាមេរិក George W Bush ៖
«ឡូរ៉ា និងខ្ញុំ មានទុក្ខដ៏ក្រៀមក្រំ បន្ទាប់ពីបានទទួលដំណឹងអំពីមរណៈភាពរបស់លោក លី ក្វាន់ យូ។ បិតាស្ថាបនិកសិង្ហបុរីបានផ្លាស់ប្តូរប្រទេសរបស់ខ្លួន ហើយបានជួយបើកចំហរតំបន់អាស៊ានទៅក្នុងយុគសម័យទំនើបមួយ។ ប្រទេសសិង្ហបុរី ដែលលោកលីបានរស់នៅពីក្រោយ គឺជាប្រទេសដែលមានកម្លាំងដ៏មានឥទ្ធិពលដើម្បីធានាស្ថិរភាព និងភាពរុងរឿង និងជាមិត្តរបស់សហរដ្ឋអាមេរិក»។
អគ្គលេខាធិការ UN បាន គីមូន៖
«លោក លី ក្វាន់យូ គឺជាមនុស្សក្នុងប្រវត្តិសាស្ត្ររបស់អាស៊ីមួយរូប ដែលត្រូវបានគេគោរពតាមរយៈភាពជាអ្នកដឹកនាំ និងជាភាពជាបុរសរដ្ឋរបស់លោក។ ក្នុងរយៈពេលនៃការដឹកនាំប្រទេស៣ទស្សវត្សរ៍របស់លោក លោកបានជួយសិង្ហបុរីពីប្រទេសកំពុងអភិវឌ្ឍឲ្យក្លាយជាប្រទេសអភិវឌ្ឍខ្លាំងជាងគេក្នុងពិភពលោក តាមរយៈការកែប្រែសិង្ហបុរីឲ្យទៅជាប្រទេសជំនួញលក្ខណៈអន្តរជាតិដ៏រីកចម្រើន។ សិង្ហបុរីកំពុងប្រារព្ធបុណ្យឯករាជ្យឆ្នាំទី៥០របស់ខ្លួននៅក្នុងឆ្នាំនេះ ហើយបិតាស្ថាបនិករបស់ខ្លួននឹងត្រូវគេចងចាំជាមេដឹកនាំដ៏មានឥទ្ធិពលនៅក្នុងអាស៊ី»។
នាយករដ្ឋមន្ត្រីម៉ាឡេស៊ី Najib Razak
« ខ្ញុំពិតជាមានការសោកស្តាយជាខ្លាំងដែលទទួលបានព័ត៌មានពីការបាត់បង់ដ៏ធំធេងរបស់ក្រុមគ្រួសារលោក លី សៀនឡុង។ ខ្ញុំនិងប្រជាជនម៉ាឡេស៊ីសូមបួងសួង និងចូលរួមរំលែកទុក្ខជាមួយក្រុមគ្រួសារលោក និងប្រជាជនសិង្ហបុរីទាំងមូល។ ខ្ញុំដឹងថា សមិទ្ធផលរបស់បីតាស្ថាបនិកសិង្ហបុរីសម្រេចបានពិតជាអស្ចារ្យ ហើយរាល់មរតកដែលលោកបានបន្សល់ទុកនឹងនៅស្ថិតស្ថិរជាអមត»។
នាយករដ្ឋមន្ត្រីឥណ្ឌា Narendra Modi
«លោក លិ ក្វាន់យូ ជាបុរសរដ្ឋមួយរូបដែលមានចក្ខុវិស័យវែងឆ្ងាយ និងជាសត្វតោក្នុងចំណោមមេដឹកនាំកំពូលពិភពលោក។ ខ្សែជិវិតនិងវីរៈភាពរបស់លោកលី ក្វាន់យូ បានបង្រៀនមនុស្សគ្រប់គ្នាពីមេរៀនដ៏មានតម្លៃមិនអាចកាត់ថ្លៃបានឡើយ។ ក្នុងនាមលោកជាមេដឹកនាំមួយរូប ខ្ញុំសូមចូលរួមរំលែកទុក្ខជាមួយក្រុមគ្រួសារនិងប្រជាជនសិង្ហបុរីទាំងមូល ហើយសួមបួងសួងអោយវិញ្ញាណក្ខន្ធលោកលីទៅកាន់សុគតិភព។
© រក្សាសិទ្ធិដោយ thmeythmey.com