អន្តរជាតិ
លីក្វាន់យូកែប្រែសិង្ហបុរីពីប្រទេសក្របំផុតទៅជាប្រទេសរីកចម្រើនបំផុតលើលោក
×
លោកលីក្វាន់យូនាយករដ្ឋមន្ត្រីទីមួយនិងជាបិតាស្ថាបនិកសិង្ហបុរីដែលទើបតែទទួលមរណៈភាពបានបន្សល់ទុកសមិទ្ធផលប្រវត្តិសាស្ត្រសម្រាប់ប្រជាជាតិសិង្ហបុរីនិងពិភពលោក។លោកបានកែប្រែសិង្ហបុរីពីប្រទេសក្រីក្របំផុតទៅក្លាយជាប្រទេសអភិវឌ្ឍន៍លំដាប់ពិភពលោកនៅក្នុងរយៈពេលត្រឹមតែ៣១ឆ្នាំប៉ុណ្ណោះ។
លោកលីក្វាន់យូគឺជាអតីតនិស្សិតច្បាប់ដែលបានបញ្ចប់ការសិក្សាពីសាកលវិទ្យាល័យ Fitzwilliam នៅក្នុងចក្រភពអង់គ្លេស។លោកបានឡើងកាន់តំណែងជានាយករដ្ឋមន្ត្រីទីមួយរបស់សិង្ហបុរីនៅក្នុងឆ្នាំ១៩៥៩ និងបញ្ចប់តំណែងពីនាយករដ្ឋមន្ត្រីនៅក្នុងឆ្នាំ១៩៩០។
ដោយសារតែស្ថានភាពរបស់ប្រទេសមានលក្ខណៈទន់ខ្សោយពេកលោកលីក្វាន់យូបានសម្រេចដាក់ប្រទេសសិង្ហបុរីឲ្យស្ថិតក្រោមការគ្រប់គ្រងរបស់សហពន្ធ័ម៉ាឡេស៊ីនៅឆ្នាំ១៩៦៣ ។ដោយឡែកនៅក្នុងអំឡុងពេលដែលសិង្ហបុរីជារដ្ឋរបស់ម៉ាឡេស៊ីបញ្ហាវិវាទជាច្រើនបានកើតឡើងធ្វើឲ្យលោកលីក្វាន់យូបានសម្រេចដកខ្លួនចេញពីការគ្រប់គ្រងរបស់ម៉ាឡេស៊ីនៅក្នុងឆ្នាំ១៩៦៥ ។
យ៉ាងណាមិញក្រោយពីផ្តាច់ខ្លួនចេញនិងទទួលបានឯករាជ្យពីម៉ាឡេស៊ីឆ្នាំ១៩៦៥សិង្ហបុរីគឺនៅតែជារដ្ឋដ៏តូចនិងទន់ខ្សោយមួយប៉ុណ្ណោះនៅក្នុងតំបន់អាស៊ី សូម្បីតែទឹកក៏ត្រូវទិញពីគេដែរ។ជាមួយគ្នានោះដែរយោងតាមការដកស្រង់ចេញពីសៀវភៅFrom Third To First World ដែលជាកម្រងសៀវភៅនិយាយសមិទ្ធផលរបស់លោកលីក្វាន់យូសិង្ហបុរីប្រឈមនូវបញ្ហាធំៗចំនួនបីក្នុងឆ្នាំ១៩៦៥រួមមាន៖
+ ទី១បញ្ហាការទទួលស្គាល់អធិបតេយ្យភាពនិងការចូលជាសមាជិកភាពនៅក្នុងអង្គការសហប្រជាជាតិ។
+ ទី២បញ្ហាសន្តិសុខនិងការពារជាតិពោលគឺមានចលនាប្រឆាំងដោយក្រុមមួយចំនួនបានទាមទារឲ្យសិង្ហបុរីចូលជាមួយនឹងម៉ាឡេស៊ីឡើងវិញ។
+ ទី៣ បញ្ហាសេដ្ឋកិច្ចដែលជាបញ្ហាចម្បងព្រោះដោយសារសិង្ហបុរីគឺជាប្រទេសដែលមិនអំណោយផលលើធនធានធម្មជាតិនោះទេ។
ដោយឡែកក្រោមការប្តេជ្ញាចិត្តរបស់លោកលីក្វាន់យូលោកបានព្យាយាមស្រោចស្រង់ស្ថានភាពដ៏លំបាកនេះតាមរយៈការសិក្សាពីគំរូដឹកនាំរបស់ប្រទេសអភិវឌ្ឍន៍មួយចំនួននៅក្នុងតំបន់និងពិភពលោករួមមានអង់គ្លេសចិនហុងកុងម៉ាឡេស៊ី និងកម្ពុជាផងដែរ។ជាចុងក្រោយក្នុងរយៈពេល៣១ឆ្នាំ (១៩៥៩-១៩៩០) នៃការដឹកនាំរបស់លោកលីក្វាន់យូសិង្ហបុរីបានក្លាយជាកូននាគនៅអាស៊ីនិងជាប្រទេសដែលមានសេដ្ឋកិច្ចលំដាប់ទី១របស់ពិភពលោក៕
© រក្សាសិទ្ធិដោយ thmeythmey.com