ជាតិ
លោក សាយ សំអាល់ ជាតួអង្គនៃយុទ្ធនាការសន្សំសំចៃអគ្គិសនី
×
លោកសាយសំអាល់ រដ្ឋមន្ត្រីក្រសួងបរិស្ថាន បានធ្វើជាតួអង្គសំខាន់ម្នាក់នៅក្នុងSpot ផ្សព្វផ្សាយមួយដែលអំពាវនាវឲ្យពលរដ្ឋខ្មែរចូលរួមសន្សំសំចៃថាមពលអគ្គិសនី។ Spot ផ្សព្វផ្សាយនេះត្រូវបានផលិតឡើងដោយក្រសួងបរិស្ថាន ក្នុងក្របខណ្ឌនៃការចូលរួមរបស់កម្ពុជា ទៅក្នុងយុទ្ធនាការទិវា «១ម៉ោងសម្រាប់ភពផែនដី»។
នៅក្នុងវីដេអូពាណិជ្ជកម្មមួយដែលមានរយៈពេល១នាទីកន្លះ គេនឹងឃើញរដ្ឋមន្ត្រីវ័យក្មេងនៃក្រសួងបរិស្ថានរបស់កម្ពុជាថ្លែងសារមួយឃ្លាថា «យើងទាំងអស់គ្នាអាចចូលរួមសន្សំសំចៃថាមពលដើម្បីបរិស្ថាន»។ សារនេះជាការអំពាវនាវដល់ពលរដ្ឋខ្មែរទូទាំងប្រទេស ឲ្យពួកគេសន្សំសំចៃថាមពលអគ្គិសនី គ្រប់ពេល គ្រប់ទីកន្លែងដើម្បីភពផែនដីដែលពួកគេកំពុងរស់នៅ។
នៅក្នុងវីដេអូពាណិជ្ជកម្មនេះ ដែលមានសាររបស់លោក បាន គីមូន អគ្គលេខាធិការអង្គការសហប្រជាជាតិ ដែលនិយាយថា «ពួកគេចង់បានសកម្មភាពរួមគ្នាដើម្បីបញ្ឈប់ការប្រែប្រួលអាកាសធាតុ»នោះ ក៏មានការទូន្មានដល់មនុស្សគ្រប់ស្រទាប់វណ្ណៈ គ្រប់ទីកន្លែង ចូលរួមបិទភ្លើង (អគ្គិសនី) រយៈពេល១ម៉ោង ដើម្បីចូលរួមក្នុងទិវា១ម៉ោងដើម្បីភពផែនដី។
ទិវា១ម៉ោងសម្រាប់ភពផែនដីត្រូវបានរៀបចំឡើងដោយអង្គការWWF តាំងពីឆ្នាំ២០០៧មក។
ទិវា១ម៉ោងសម្រាប់ភពផែនដីនៅឆ្នាំ២០១៥នេះរៀបចំឡើងក្រោមប្រធានបទ«ប្រើថាមពលរបស់អ្នកដើម្បីបញ្ឈប់ការប្រែប្រួលអាកាសធាតុ»។
នៅកម្ពុជា នៅថ្ងៃទី២៨មីនាដែលជាថ្ងៃប្រារព្ធទិវានេះនឹងមានការបិទភ្លើងរយៈពេល១ម៉ោងនៅម៉ោង៨កន្លះដល់ម៉ោង៩កន្លះយប់។
សាធារណជននិងគ្រប់ស្ថាប័ននៅទូទាំងប្រទេស តាមរយៈការបិទសម្ភារឬឧបករណ៍ប្រើប្រាស់ដោយថាមពលណាដែលមិនចាំបាច់ដូចជាម៉ាស៊ីនត្រជាក់ទូទឹកកកទូរទស្សន៍ឬកង្ហារជាដើម។នេះបើតាមការបញ្ជាក់របស់លោកអ៊ុនចក្រី ប្រធានផ្នែកព័ត៌មាន និងកិច្ចការសាធារណៈនៃអង្គការWWF។
លោក អ៊ុនចក្រីធ្លាប់បានប្រាប់សារព័ត៌មានថ្មីៗថាទិវាមួយម៉ោងសម្រាប់ភពផែនដីនេះប្រារព្ធក្នុងគោលបំណងចូលរួមទប់ស្កាត់ការប្រែប្រួលអាកាសធាតុនៅលើ ភពផែនដីទិវានេះក៏សារមួយបង្ហាញឲ្យសាធារណជនដឹងថាពួកគេអាចទប់ស្កាត់ការកើនកំដៅភពផែនដីតាមរយៈការសន្សំសំចៃថាមពលដែលប្រើប្រាស់ប្រចាំថ្ងៃ។
សូមបញ្ជាក់ថានេះគឺឆ្នាំទី៧សម្រាប់ពិភពលោកនិងជាឆ្នាំទី៤នៅកម្ពុជាដែលប្រារព្ធទិវាមួយម៉ោងសម្រាប់ភពផែនដី។ទិវានេះបានចាប់ផ្តើមឡើងដំបូងគេនៅក្រុងស៊ីដនីប្រទេសអូស្ត្រាលីនៅឆ្នាំ២០០៧។មិនត្រឹមតែកម្ពុជានោះទេដែលប្រារព្ធទិវានេះប្រទេសចំនួន១៦២និងក្រុងជាង៧០០០ផ្សេងទៀតនៅលើពិភពលោកក៏ចូលរួមទិវាមួយម៉ោងសម្រាប់ភពផែនដីនេះដែរ៕
ទស្សនាវីដេអូ © រក្សាសិទ្ធិដោយ thmeythmey.com