ជាតិ
×![]()
ដោយ: ធឿន បញ្ញាឬទិ្ធ
ក្រសួងរ៉ែ និងថាមពល បានកំណត់យកវិធានការចំនួន៧ចំណុច ដើម្បីដោះស្រាយជាបន្ទាន់ភាពមិនប្រក្រតីនៃការធ្វើអាជីវកម្មខ្សាច់ និងអាជីវកម្មរ៉ែផ្សេងៗ ដោយអនាធិបតេយ្យទូទាំងប្រទេស និងមិនត្រឹមត្រូវតាមកិច្ចព្រមព្រៀងរវាងក្រុមហ៊ុន និងក្រសួងរ៉ែ និងថាមពល ។
តាមសេចក្ដីប្រកាសព័ត៌មានចុះថ្ងៃទី២៥មីនានេះ ក្រសួងរ៉ែ និងថាមពលបានឯកភាព និងសម្រេចបានចំណុចមួយចំនួនជាអាទិ៍រួមមាន៖ បន្តពន្យារអាជ្ញាបណ្ណដែលមានស្រាប់នៅក្នុងតំបន់ ដែលបានសិក្សារួចជាស្រេចទៅលើផលប៉ះពាល់សង្គម សេដ្ឋកិច្ច និងបរិស្ថាន។
អាជ្ញាប័ណ្ណថ្មីក្នុងតំបន់ថ្មីត្រូវមានការវាយតម្លៃ និងសិក្សាឲ្យបានច្បាស់លាស់ជាងមុនសិន ទៅលើផលប៉ះពាល់សង្គម សេដ្ឋកិច្ច និងបរិស្ថាន ពីក្រុមជំនាញបច្ចេកទេស ដែលទទួលស្គាល់ដោយក្រសួងបរិស្ថាន និងក្រសួងរ៉ែ និងថាមពល។ ដាក់កងកម្លាំងការពារទន្លេ ប្រឆាំងការទប់ស្កាត់ និងការធ្វើអាជីវកម្មខុសច្បាប់ និងការរៀបចំ និងពិនិត្យឡើងវិញនូវលក្ខខណ្ឌក្នុងការផ្ដល់អាជ្ញាប័ណ្ណ ដើម្បីពង្រឹងការអនុវត្តកាតព្វកិច្ច ក្នុងការទទួលខុសត្រូវផ្នែកសង្គម ការត្រួតពិនិត្យ និងការអនុលោមតាមបទប្បបញ្ញត្តិជាធរមានជាដើម ។
ជាមួយគ្នានេះក្រសួងរ៉ែ និងថាមពល សម្រេចបង្កើតក្រុមការងារអធិការកិច្ចចំនួន៣ក្រុម ដែលដឹកនាំដោយរដ្ឋលេខាធិការមួយរូប និងមន្ត្រីជំនាញមួយក្រុម ដោយក្រុមទីមួយដឹកនាំដោយលោក ម៉េង សក្ដិធារ៉ា រដ្ឋលេខាធិការ ទទួលបន្ទុកចុះត្រួតពិនិត្យនៅបណ្ដាលខេត្តតំបន់ឥសាន ។ ក្រុមទីពីរដឹកនាំដោយ លោក ហូ វិចិត្រ រដ្ឋលេខាធិការ ទទួលបន្ទុកចុះត្រួតពិនិត្យនៅបណ្ដាលខេត្តតំបន់ពាយ័ព្យ និងក្រុមទីបីដឹកនាំដោយលោក ឌិត ទីណា រដ្ឋលេខាធិការ ទទួលបន្ទុកចុះត្រួតពិនិត្យនៅភ្នំពេញ ខេត្តកណ្ដាល និងបណ្ដាលខេត្តនៅតំបន់ភាគនិរតី ។
វិធានការទាំងអស់នេះ ជាកម្មវិធីអាទិភាពរបស់ក្រសួងរ៉ែ និងថាមពល នៅក្នុងការដោះស្រាយបញ្ហាអាជីវកម្មខ្សាច់ខុសច្បាប់ ។
ដើម្បីដោះស្រាយភាពមិនប្រក្រតីនៃការធ្វើអាជីវកម្មខ្សាច់ រាជរដ្ឋាភិបាលបានចេញសេចក្ដីសម្រេចចុះថ្ងៃទី២០ មីនាកន្លងមក ស្ដីពីការកំណត់គោលការណ៍ធ្វើអាជីវកម្មខ្សាច់ ដោយប្រគល់ភារកិច្ចឲ្យក្រសួងរ៉ែ និងថាមពល និងទទួលខុសត្រូវគ្រប់បែបយ៉ាងលើការធ្វើអាជីវកម្មខ្សាច់គ្រប់ប្រភេទ ៕
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
