ជាតិ
ប្រធានរដ្ឋសភាកម្ពុជា នឹងទៅចូលរួមមហាសន្និបាតលើកទី១៣២នៃIPUនៅវៀតណាម
×
លោក ហេង សំរិន ប្រធានរដ្ឋសភា នឹងដឹកនាំគណ៖ប្រតិភូទៅចូលរួមមហាសន្និបាតលើកទី១៣២នៃសហភាពអន្តរសភា ហៅកាត់ថា IPU នៅក្រុងហាណូយ ប្រទេសវៀតណាម ចាប់ពីថ្ងៃទី២៧មីនាស្អែកនេះ ដល់ថ្ងៃទី១មេសា ឆ្នាំ២១០៥ ។ នេះបើតាមសេចក្តីប្រកាសព័ត៌មានរបស់ អគ្គលេខាធិការដ្ឋានរដ្ឋសភា ។
«គោលដៅអភិវឌ្ឍន៍ប្រកបដោយចីរភាព៖ការប្រែក្លាយទ្រឹស្តីទៅជាសកម្មភាព» គឺជា ប្រធានបទនៃ មហាសន្និបាតនេះ ។
សេចក្តីប្រកាសព័ត៌មានដដែលបានឲ្យដឹងថា របៀបវារៈចំនួន១៤ នឹងលើកយកទៅពិភាក្សានៅក្នុងកិច្ចប្រជុំ រួមមាន៖១. កិច្ចប្រជុំអាស៊ានបូកបី ២. កិច្ចប្រជុំក្រុមអាស៊ី-ប៉ាស៊ីហ្វិក ៣. មហាសន្និបាតលើកទី១៣២នៃសហភាពអន្តរសភា(IPU) ៤. កិច្ចប្រជុំក្រុមប្រឹក្សាភិបាលលើកទ១៩៦ ៥. កិច្ចប្រជុំគណៈកម្មការអចិន្ត្រៃយ៍លើកទី១: សន្តិភាព និងសន្តិសុខអន្តរជាតិ ៦. កិច្ចប្រជុំគណៈកម្មការអចិន្ត្រៃយ៍លើកទី២:ការអភិវឌ្ឍប្រកបដោយចីរភាពហិរញ្ញវត្ថុ និងពាណិជ្ជកម្ម ៧. កិច្ចប្រជុំគណៈកម្មការអចិន្ត្រៃយ៍លើកទី ៣: សិទ្ធិមនុស្ស និងលទ្ធិប្រជាធិបតេយ្យ ៨. កិច្ចប្រជុំគណៈកម្មការអចិន្ត្រៃយ៍លើកទី៤: ស្តីពីកិច្ចការអង្គការសហប្រជាជាតិ ស្តីពីការពិភាក្សារួមពីគម្រប់ខួបលើកទី៧០ របស់អង្គការសហប្រជាជាតិ ៩. កិច្ចប្រជុំគណៈកម្មាធិការសភាជាស្ត្រីលើកទី១៩ ១០. វេទិការសមាជិកសភាវ័យក្មេង ១១. កិច្ចប្រជុំសមាគមអគ្គលេខាធិការសភា ១២. Slide-Event ស្តីពីការធ្វើឲ្យបានសម្រេចទស្សនវិស័យក្រុងប៉េកាំង:ទស្សនរបស់បុរស ១៣. Slide-Event ស្តីពីការផ្តល់យោបល់លើការធ្វើបច្ចុប្បន្នភាពយុទ្ធសាស្ត្រពិភពលោក សម្រាប់សុខភាពស្ត្រី កុមារ និងមនុស្សពេញវ័យ និង១៤. Slide-Event ស្តីពីការលុបបំបាត់ហានិភ័យនៃសង្គ្រាមអាវុធនុយក្លេអ៊ែកើតដោយចៃដន្យ ការវាយប្រហារតាមអ៊ីនធឺណេត ឬកើនពីជម្លោះដែលកើនកាន់តែធំ។
បើតាមសេចក្តី ប្រកាសដដែល លោក ហេង សំរិន និងថ្នាក់ដឹកនាំផ្សេងទៀត ក៏នឹងជួបពិភាក្សាទ្វេភាគីជាមួយមេដឹកនាំបណ្តាប្រទេសជាមិត្តផ្សេងទៀតផងដែរ។
មានទីស្នាក់ការនៅក្រុងហ្សឺណែវ ប្រទេសស្វីស សហភាពអន្តរសភា(IPU) ត្រូវបានបង្កើតឡើងក្នុងឆ្នាំ១៨៨៩ បច្ចុប្បន្នមានសមាជិក១៦៤ប្រទេស និងសមាជិកបម្រុង១០ប្រទេស ។ ប្រទេសកម្ពុជាចូលជាសមាជិក IPU ក្នុងខែមេសា ឆ្នាំ១៩៩៧ ៕
© រក្សាសិទ្ធិដោយ thmeythmey.com