អន្តរជាតិ
នយោបាយអន្តរជាតិ
បេក្ខជនបក្សប្រឆាំងនីហ្សេរីយ៉ាបានសំឡេងនាំមុខក្នុងការបោះឆ្នោតប្រធានាធិបតី
×
យោងតាមការរាប់សំឡេងឆ្នោតបណ្តោះអាសន្នបេក្ខជនប្រធានាធិបតីបក្សប្រឆាំងនីហ្សេរីយ៉ាបានទទួលសំឡេងគាំទ្រនាំមុខលោកGoodluck Jonathan ។ប៉ុន្តែយ៉ាងណាក៏ដោយសន្លឹកឆ្នោតនៅសល់ត្រូវបានចាប់ផ្តើមរាប់បន្តទៀតនៅថ្ងៃអង្គារនេះដូច្នេះគេរំពឹងថាលទ្ធផលអាចនឹងផ្លាស់ប្តូរ។ការបោះឆ្នោតប្រធានាធិបតីនៅនីហ្សេរីយ៉ាលើកនេះជាការបោះឆ្នោតមួយដ៏តានតឹងនិងប្រកៀកប្រកិតបំផុតមិនធ្លាប់មានចាប់តាំងរបបយោធាដួលរលំឆ្នាំ១៩៩៩។
មុំ ពិទូរ្យ លម្អិតព័ត៌មាននេះ
គណកម្មការរៀបចំការបោះឆ្នោតឯករាជ្យនីហ្សេរីយ៉ាបានសម្រេចផ្អាកការរាប់សន្ធឹកឆ្នោតសិននៅយប់ថ្ងៃចន្ទម្សិលមិញនេះ។យោងតាមសន្លឹកឆ្នោតត្រូវបានគេរាប់ហើយបេក្ខជនប្រធានាធិបតីដែលមកពីគណបក្សប្រឆាំងលោកMuhammaduBuhariបានទទួលសំឡេងគាំទ្រនាំមុខបេក្ខជនប្រធានាធិបតីបក្សកាន់អំណាចលោកGoodluck Jonathan ក្នុងការបោះឆ្នោតកាលពីថ្ងៃអាទិត្យ។
យ៉ាងណាក៏ដោយនៅថ្ងៃអង្គារនេះគណកម្មការខាងលើនេះនឹងចាប់ផ្តើមរាប់សន្លឹកឆ្នោតបន្តនទៀតដូច្នេះលទ្ធផលអាចនឹងផ្លាស់ប្តូរជាក់ជាមិនខាន។បើតាមលទ្ធផលបណ្តោះអាសន្នការបោះឆ្នោតលើកនេះជាការបោះឆ្នោតមួយដែលតឹងតែងនិងមានលក្ខណៈប្រកៀកប្រកិតបំផុតរវាងបេក្ខជនប្រធានាធិបតីទាំងពីរចាប់តាំងពីរបបយោធាដួលរលំនៅក្នុងឆ្នាំ១៩៩៩មក។
ក្នុងការបោះឆ្នោតលើកនេះគេសង្កេតឃើញមានវត្តមានអ្នកសង្កេតការណ៍របស់សហភាពអឺរ៉ុប សហភាពអាហ្វ្រិក និងអង្គការសហប្រជាជាតិដែលពួកគេជាអ្នកឃ្លាំមើលនិងធានាថាការបោះឆ្នោតមានលក្ខណៈត្រឹមត្រូវសេរីនិងយុត្តិធម៌ផងដែរ។ប៉ុន្តែនៅតំបន់ខ្លះប្រជាជនបានចេញមុខបាតុកម្មតវ៉ាថាការបោះឆ្នោតពោរពេញដោយការកេងបន្លំសន្លឹកឆ្នោតនិងមិនមានភាពត្រឹមត្រូវនោះឡើយ។
ត្រលប់មកផ្តោតលើបេក្ខជនវិញប្រធានាធិបតីដែលផុតអាណត្តិGoodluck Jonathan មានវ័យ៥៧ឆ្នាំខណៈពេលដែលដៃគូប្រជែងរបស់លោកជាអតីតមេដឹកនាំយោធាលោកMuhammaduBuhariមានវ័យ៧២ឆ្នាំទៅហើយ។ដើម្បីឈ្នះការបោះឆ្នោតជាប្រធានាធិបតីបេក្ខជនត្រូវតែរកសំឡេងគាំទ្រទូទាំងប្រទេសប្រទេសអោយបានយ៉ាងតិច៥០ភាគរយនៃសំឡេងឆ្នោតទាំងអស់រួមជាមួយសំឡេងគាំទ្រ២៥ភាគរយផ្សេងទៀតនៃសំឡេងឆ្នោតសរុបក្នុងចំណោម២ភាគ៣នៃរដ្ឋទាំងអស់។
យ៉ាងណាក៏ដោយប្រធានាធិបតីដែលជិតផុតអាណត្តិរបស់នីហ្សេរីយ៉ាប្រឈមមុខនឹងបញ្ហាដោយសារតែរបបដឹកនាំរបស់លោកមិនអាចដោះស្រាយបញ្ហាសន្តិសុខបង្កឡើងដោយភេរវជនបូកូហារ៉ាមបានក្នុងពេលកន្លងមក។ប្រជាជននីហ្សេរីយ៉ាត្រូវការមេដឹកនាំដែលអាចមានសមត្ថភាពដោះស្រាយបញ្ហាសន្តិសុខដែលគំរាមកំហែងសុវត្ថិភាពនិងអាយុជីវិតប្រជាជនស្លូតត្រង់បាន។
បើទោះជាការបោះឆ្នោតមានភាពតឹងតែងបន្តិចក្តីមុនការបោះឆ្នោតបេក្ខជនទាំងពីរនាក់បានព្រមព្រៀងគ្នាថានឹងមិនមានការប្រឆាំងតវ៉ានឹងលទ្ធផលបោះឆ្នោតឡើយហើយពួកគេនឹងព្យាយាមទប់ស្កាត់មិនអោយអំពើហិង្សាកើតឡើងឡើយទោះជាលទ្ធផលចេញមកបែបណាក៏ដោយ៕
© រក្សាសិទ្ធិដោយ thmeythmey.com