អន្តរជាតិ
នយោបាយអន្តរជាតិ
×![]()
នៅថ្ងៃពុធម្សិលមិញ ព្រះមហាក្សត្រថៃបានសម្រេចអោយលើកចេញនូវច្បាប់សឹកដែលបាន ដាក់ប្រើក្នុងស្រុក ជិត១ឆ្នាំមកនេះ។ ជំនួសច្បាប់សឹកនេះ ថៃនឹងប្រើក្រឹត្យលេខ៤៤ ផ្តល់អំណាច ពេញទីដល់កងទ័ពដដែល។
ម្សិលមិញ ព្រះមហាក្សត្រថៃ ព្រះចៅភូមិបុល បានយល់ព្រមតាមសំណើរបស់លោកប្រាយុទ្ធ ចាន់អូចា ដែលបានសុំអោយព្រះអង្គអនុញ្ញាតអោយលើកចេញនូវច្បាប់សឹកដែលដាក់ប្រើ ក្នុងប្រទេសជិតមួយឆ្នាំមកនេះ។ ថៃបានប្រកាសប្រើច្បាប់សឹកនេះ កាលពីថ្ងៃ២០ឧសភា គឺ២ថ្ងៃមុនមានរដ្ឋប្រហារទំលាក់រដ្ឋាភិបាលលោកស្រីយីងឡាក់។
កាលពីថ្ងៃអង្គារ លោកប្រាយុទ្ធ ចាន់អូចា បានប្រកាសថា ជំនួសអោយច្បាប់សឹកនេះ ថៃនឹងប្រើក្រឹត្យលេខ៤៤វិញ។ ជាក្រឹត្យអនុញ្ញាតអោយលោកប្រាយុទ្ធមានសិទ្ធិសម្រេចក្នុងផ្នែក ការពារជាតិ ដោយមិនចាំបាច់ឆ្លងកាត់សភាទេ។ ហើយចាប់ពីពេលនេះទៅ គឺកងទ័ពថៃជាអ្នកជ្រើសរើសសមាជិកសភាវិញម្តង។ លោកប្រាយុទ្ទប្រាប់ថា មិនអាចទុកអោយមនុស្សឆ្លៀតកេងចំណេញពីគោលការណ៍នៃពាក្យថាសេរីភាពទេ បើមិនដូច្នោះ ថៃនឹងរងបាតុកម្ម ហើយរដ្ឋាភិបាលមិនអាចធ្វើការបានឡើយ។
ក្រុមសិទ្ធិមនុស្សក្នុងស្រុកបារម្ភខ្លាំងចំពោះក្រឹត្យលេខ៤៤នេះ។ ពួកគេបារម្ភខ្លាច ថៃធ្លាក់ចូលក្នុងរបបផ្តាច់ការ។ សមាគមចំនួន៧គិតថា ក្រឹត្យលេខ៤៤នេះអាចនឹងអោយលោកប្រាយុទ្ធ មានអំណាចពេញទី ទាំងក្នុងផ្លូវច្បាប់ ទាំងរដ្ឋបាល និងតុលាការ។ គួររំលឹកឡើងវិញថា កងទ័ពបានកាន់អំណាចក្នុងខែឧសភាឆ្នាំ២០១៤ ក្រោយថៃធ្លាក់ក្នុងវិបត្តិបាតុកម្មរាប់ខែ មានទាំងបាតុកម្មប្រឆាំង និងបាតុកម្មគាំទ្ររដ្ឋាភិបាលលោកស្រីយីងឡាក់។ កងទ័ពបានដាក់ប្រើច្បាប់សឹក ហាមឃាត់ការជួបជុំគ្នាលើសពី៥នាក់ឡើងទៅ។ ច្បាប់សឹកនេះមានទិសដៅរៀបចំសណ្តាប់ធ្នាប់ក្នុងស្រុកឡើងវិញ ជាច្បាប់តឹងតែងខ្លាំងចំពោះសារព័ត៌មាន។ ច្បាប់នេះក៏បានអនុញ្ញាតអោយកងទ័ពចាប់ខ្លួន និងបញ្ជូនមនុស្សឡើងតុលាការផងដែរ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 សប្តាហ៍
