ជាតិ
បទវិភាគ
នយោបាយជាតិ
ការបោះឆ្នោតអាណត្តិក្រោយ CNRP ហាមបដិសេធលទ្ធផលបោះឆ្នោតទៀត!
×
មេដឹកនាំគណបក្សសង្គ្រោះជាតិ សុទ្ធតែសាទរច្បាប់រៀបចំស្ថាប័នគណៈកម្មាធិការរៀបចំការបោះឆ្នោតថ្មី និងច្បាប់បោះឆ្នោតជ្រើសតាំងតំណាងរាស្ត្រថ្មី ខណៈដែលសង្គមស៊ីវិលជាច្រើនតិះដៀលគ្មានប្រណី។ មេបក្សនេះ និយាយចេញពីមាត់ថា ការបោះឆ្នោតលើកក្រោយនឹងអាចទទួលយកបាន បន្ទាប់ពីមានការកែទម្រង់ក្នុងអាណត្តិនេះ។ បើមេបក្សប្រឆាំងពេញចិត្តបែបនេះ ការបោះឆ្នោតអាណត្តិក្រោយគណបក្សនេះចាញ់ឆ្នោត លោក សម រង្ស៊ី ហាមនិយាយថា គ.ជ.ប អយុត្តិធម៌ ហើយបដិសេធលទ្ធផលបោះឆ្នោតដូចលើកមុនៗទៀត។
ស្ទើររាល់អាណត្តិគណបក្សប្រឆាំងតែងមិនសុខចិត្តឡើយនៅពេលដែលខ្លួនមិនអាចទទួលជ័យជំនះលើការបោះឆ្នោតជ្រើសតាំងតំណាងរាស្ត្រ។ គណបក្សនេះ តែងចោទប្រកាន់គណៈកម្មាធិការជាតិរៀបចំការបោះឆ្នោតថា ស្ថិតនៅក្រោមបញ្ជារបស់គណបក្សប្រជាជនកម្ពុជា ហើយបក្សនេះចាត់ទុកការបោះឆ្នោតថា គ្មានភាពសេរី និងយុត្តិធម៌ត្រឹមត្រូវឡើយ។ ការបោះឆ្នោតអាណត្តិទី ៥ កន្លងទៅនេះ គណបក្សសង្គ្រោះជាតិ ក៏បានច្រានចោលលទ្ធផលបោះឆ្នោតដែរ ក្រោមហេតុផលថា គ.ជ.ប មិនឯករាជ្យ លួចបន្លំសន្លឹកឆ្នោតឲ្យគណបក្សប្រជាជនកម្ពុជា។ ក៏ប៉ុន្តែក្រោយពីមានកិច្ចព្រមព្រៀងនយោបាយ និងទទួលយកលទ្ធផល និងចូលរដ្ឋសភាមក គណបក្សនេះ បានចូលរួមកែទម្រង់ការបោះឆ្នោតជាមួយគណបក្សប្រជាជនកម្ពុជាយ៉ាងសកម្មហើយមេដឹកនាំបក្សនេះសុទ្ធតែពេញចិត្តច្បាប់ថ្មីនេះ។
ក្នុងចំណោមតំណាងរាស្ត្រគណបក្សសង្គ្រោះជាតិ ដែលបានចូលរួមក្នុងការអនុម័តច្បាប់បោះឆ្នោតជ្រើសតាំងតំណាងរាស្ត្រថ្មី និងច្បាប់រៀបចំស្ថាប័នរៀបចំការបោះឆ្នោតថ្មីកាលពីកន្លងទៅ គ្មានតំណាងរាស្ត្រគណបក្សប្រឆាំងណាមួយ មិនលើកដៃគាំទ្រច្បាប់ទាំងពីរនេះជាមួយតំណាងរាស្ត្រគណបក្សប្រជាជនកម្ពុជានោះទេ។ មេដឹកនាំគណបក្សសង្គ្រោះជាតិ លោក សម រង្ស៊ី ថែមទាំងបានថ្លែងសាទរច្បាប់ថ្មីនេះថា មានភាពល្អប្រសើរ ដែលនឹងអាចធ្វើឲ្យការបោះឆ្នោតលើកក្រោយប្រព្រឹត្តទៅដោយសេរី ត្រឹមត្រូវ និងយុត្តិធម៌ ស្របពេលដែលសង្គមស៊ីវិលជាតិ និងអន្តរជាតិ រិះគន់ច្បាប់ថ្មីនេះមិនសំចៃ។ គណបក្សប្រឆាំង ដែលនាពេលកន្លងមកធា្លប់តែស្តាប់មតិសង្គមស៊ីវិលច្រើននោះ តែការបង្កើតច្បាប់ថ្មីនេះ បក្សនេះ មិនចាប់អារម្មណ៍ឡើយចំពោះមតិរិះគន់សង្គមស៊ីវិល។
ដូច្នេះបើបំណាច់នឹងមេដឹកនាំគណបក្សសង្គ្រោះជាតិ ពិតជាពេញចិត្តនឹងលទ្ធផលនៃការកែទម្រង់ការបោះឆ្នោតរបស់ខ្លួនជាមួយគណបក្សប្រជាជនកម្ពុជាយ៉ាងនេះទៅហើយនោះ ការបោះឆ្នោតលើកក្រោយបើគណបក្សសង្គ្រោះជាតិចាញ់ឆ្នោត មេដឹកនាំគណបក្សនេះ ឈប់និយាយថា «អយុធម៌ណាស់! គ.ជ.ប មិនឯករាជ្យ ស្ថិតក្រោមគណបក្សប្រជាជនកម្ពុជា ហើយបដិសេធលទ្ធផលបោះឆ្នោត ព្រមទាំងដឹកនាំពលរដ្ឋធ្វើបាតុកម្មដូចលើកមុនៗទៀត» ៕
© រក្សាសិទ្ធិដោយ thmeythmey.com