ជាតិ
នយោបាយជាតិ
សេចក្តីព្រាងច្បាប់គ្រប់គ្រង NGO នឹងឆ្លងគណៈរដ្ឋមន្ត្រីនៅខែឧសភាខាងមុខ
× លោក ហ៊ុន សែន បានប្រកាសថា នៅពេលរដ្ឋាភិបាលរបស់លោក បានធ្វើសេចក្តីព្រាងច្បាប់ស្តីពីការគ្រប់គ្រងអង្គការក្រៅរដ្ឋាភិបាលរួចរាល់ហើយ ។ លោកនាយករដ្ឋមន្ត្រីបន្ថែមថា សេចក្តីព្រាងច្បាប់នេះ នឹងត្រូវបញ្ជូនទៅទីស្តីការគណៈរដ្ឋមន្ត្រីដើម្បីអនុម័តនៅខែឧសភា ឆ្នាំ ២០១៥ ខាងមុខនេះ។ « បន្ទាប់មកយើងនឹងបញ្ជូនទៅសភាអនុម័ត…។ ចង់អ្នកណា គាំទ្រ ឬមិនគាំទ្រក្តី សំឡេងសភា ៥០ បូក១ ដែលមានសិទ្ធិអនុម័ត ក៏អាចអនុម័តច្បាប់នេះ បានដែរ» ។ នេះជាការបញ្ជាក់របស់លោក ហ៊ុន សែន ពីក្នុងពិធីជួបជាមួយកុមារពិការនៅអង្គការគ្រួសារថ្មីនៅថ្ងៃនេះ។
ជាមួយគ្នានេះដែរលោក ហ៊ុន សែន ក៏បានរិះគន់ដល់មន្ត្រីអង្គការស៊ីវិល និងអ្នកវិភាគមួយចំនួន ដែលរារាំងមិនចង់ឲ្យរដ្ឋាភិបាលបង្កើតច្បាប់នេះឡើយ។ លោក អំពាវនាវឲ្យមន្ត្រីអង្គការស៊ីវិល និងអ្នកវិភាគទាំងនោះ កុំឲ្យធ្វើជ្រុលហួសហេតុពេកលើសពីសិទ្ធិរបស់ខ្លួន។ លោក ហ៊ុន សែន រដ្ឋាភិបាលធ្វើច្បាប់គ្រប់គ្រងអង្គការនេះ ស្របតាមច្បាប់រដ្ឋធម្មនុញ្ញមាត្រា ៤២ ។
ស្តាប់សំឡេង លោក ហ៊ុន សែន
ទាក់ទងនឹងច្បាប់នេះ លោកសឿង សារឿនប្រធានគណៈកម្មាធិការសហប្រតិបត្តិការដើម្បីកម្ពុជា (CCC) ដែលតែងតែទាមទារឲ្យច្បាប់គ្រប់គ្រងដាក់ពិគ្រោះយ៉ាងទូលាយតាំងពីឆ្នាំ ២០១០មកនោះ បាននិយាយថា ច្បាប់នេះ ធ្វើប៉ះពាល់ដល់ការងារអនុវត្តការងាររបស់ NGO យ៉ាងខ្លាំង។ «មាត្រាមួយចំនួននៃច្បាប់នេះ បានរារាំងក្នុងចុះបញ្ជីរបស់ NGO ជាពិសេសបើកទូលាយឲ្យអាជ្ញាធរធ្វើអធិការកិច្ចយ៉ាងទូលាយក្នុង NGO ដែលនេះជាការបន្តរឹតត្បិតក្នុងការបង្កើតសមាគម និងសិទ្ធិសេរីភាពបញ្ចេញមតិពលរដ្ឋ ដែលផ្ទុយពីមាត្រា៣៥ និង៣៦នៃរដ្ឋធម្មនុញ្ញ»។ នេះជាការបញ្ជាក់របស់លោក សឿង សារឿន៕ © រក្សាសិទ្ធិដោយ thmeythmey.com