ជាតិ
រយៈពេល ៨ ខែ កម្ពុជាសុំទិដ្ឋាការការងារជូនពលករធ្វើការនៅប្រទេសថៃបានជិត ៧ ម៉ឺននាក់
×
ក្រោយពីរដ្ឋាភិបាលថៃ បានចាប់បញ្ជូនពលករខ្មែរដែលធ្វើការនៅប្រទេសថៃរាប់សិបម៉ឺននាក់មកកម្ពុជាវិញ កាលខែមិថុនា ឆ្នាំ ២០១៤ កន្លងទៅ ស្ថានទូតកម្ពុជា បានខ្នះខ្នែងស្នើសុំទិដ្ឋាការការងារពីស្ថានទូតថៃឲ្យពលករខ្មែរជាបន្តបន្ទាប់ ។ មកដល់ពេលនេះ កម្ពុជាសុំទិដ្ឋាការដល់ពលករទៅធ្វើការងារស្របច្បាប់នៅថៃ បានជិត ៧ ម៉ឺននាក់ ។
ចាប់ពីខែមិថុនា ឆ្នាំ ២០១៤ ដល់ ខែមីនា ឆ្នាំ ២០១៥ក្រសួងការបរទេសកម្ពុជា បានបញ្ជូនកំណត់ទូតទៅស្ថានទូតថៃប្រចាំនៅកម្ពុជា ដើម្បីស្នើសុំទិដ្ឋាការការងារស្របច្បាប់ ដល់ពលករខ្មែរ បានចំនួន ៦៩៥៩៦ នេះហើយ។ នេះបើតាមអ្នកនាំពាក្យក្រសួងការបរទេសកម្ពុជា លោក កុយ គួង ។
បើតាមលោក កុយ គួយ ការស្នើសុំទិដ្ឋាការការងារនេះ បានធ្វើឡើងចំនួន ២ លើក។ លើកទី ១ ពីខែមិថុនា ដល់ ខែធ្នូ ឆ្នាំ ២០១៤ កម្ពុជាស្នើសុំទិដ្ឋាការងារពីស្ថានទូតថៃប្រចាំនៅកម្ពុជា ដល់ពលករបាន ៥៣៥១៣ នាក់ ហើយលើកទី ២ ពីខែមករា ដល់ខែមីនា ឆ្នាំ ២០១៥ បាន ១៦០៨២ នាក់។
ករណីដាច់ដោយឡែកមួយទៀតដែលទាក់ទងពលករចំណាកស្រុកនេះផងដែរ ក្រោយពីក្រសួងការបរទេសកម្ពុជា បានទទួលដំណឹងថា មានពលករខ្មែរ ៥៨ នាក់ ត្រូវគេជួញដូរយកទៅធ្វើការដោយខុសច្បាប់នៅលើកោះនៃប្រទេសឥណ្ឌូណេស៊ី លោក ហោ ណាំហុង បានបញ្ជាឲ្យស្ថានទូតកម្ពុជាប្រចាំនៅប្រទេសឥណ្ឌូណេស៊ី ឲ្យពិនិត្យមើលករណីនេះ។ លោក កុយ គួង បញ្ជាក់ថា ប្រសិនបើពិតជាមានពលករខ្មែររងគ្រោះចំនួន ៥៨ នាក់មែននោះ ស្ថានទូតកម្ពុជា នឹងសហការជាមួយអាជ្ញាធរឥណ្ឌូណេស៊ីនិងអង្គការអន្តរជាតិ ដើម្បីបញ្ជូនពលករទាំង ៥៨ នាក់នោះ មកកម្ពុជាវិញ ៕
ដោយ ម៉ៅ សុផា
© រក្សាសិទ្ធិដោយ thmeythmey.com