ជាតិ
សង្គមជាតិ
ខ្មែរនៅកូរ៉េខាងត្បូងប្រារព្វពិធីបុណ្យចូលឆ្នាំថ្មី និងប្រមូលមូលនិធិឧបត្ថម្ភមន្ទីរពេទ្យគន្ធបុប្ផា
× ដោយ ប្រុញ សុភាណា
កូរ៉េខាងត្បូង៖ ពិធីបុណ្យចូលឆ្នាំថ្មី ប្រពៃណីជាតិខ្មែរ ត្រូវប្រារព្វឡើងជាផ្លូវការចាប់ពីថ្ងៃទី១៤ ខែមេសា ឆ្នាំ២០១៥ ។ ដោយឡែក ប្រជាពលរដ្ឋខ្មែរ ដែលកំពុងរស់នៅប្រទេសកូរ៉េខាងត្បូង បានរៀបចំពិធីជួបជុំប្រារព្វពិធីប្រពៃណីជាតិមួយនេះ នៅបីតំបន់ផ្សេងគ្នាចាប់តាំងពីថ្ងៃទី៤ ខែមេសា ឆ្នាំ២០១៥ ដោយយោងតាមភាពមមាញឹក នៃការសិក្សា និងការងារ។
កាលពីថ្ងៃទី៤ ខែមេសា ឆ្នាំ២០១៥ សមាគមនិស្សិតខ្មែរប្រចាំនៅសាធារណរដ្ឋកូរ៉េ បានរៀបចំការជួបជុំមួយដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលបានប្រព្រឹត្តទៅនៅក្នុងទីធ្លា វិមានរដ្ឋសភាជាតិ ក្នុងទីក្រុងសេអ៊ូលនៃប្រទេសកូរ៉េខាងត្បូង ដោយមានការអញ្ចើញចូលរួមពីសំណាក់ និស្សិតខ្មែរ កូរ៉េ មន្ត្រីអមស្ថានឯកអគ្គរាជទូតកម្ពុជាប្រចាំប្រទេសកូរ៉េខាងត្បូង និងព្រះសង្ឈ សរុបប្រមាណ ១៥០នាក់។ ក្រៅពីគោលបំណងចូលរួមចំណែកថែរក្សាវប្បធម៌ប្រពៃណីខ្មែរ ពិធីនេះក៏ត្រូវបានរៀបចំឡើងក្នុងគោលបំណងរឹតចំណងមិត្តភាពរវាងនិស្សិតខ្មែរ និងជាការរួមចំណែកផ្សព្វផ្សាយវប្បធម៌ប្រពៃណីខ្មែរ នៅលើទឹកដីកូរ៉េខាងត្បួងផងដែរ។ នៅក្នុងពិធីជួបជុំមួយនេះ គេឃើញមានការសំដែងរបាំប្រពៃណីជាតិគោះត្រឡោក រាំបង្ហាញចង្វាក់ប្រពៃណី ការលេងល្បែងប្រជាប្រិយ ដូចជាលាក់កន្សែង បោះឈូងជាដើម និងមានការបរិភាគអាហារសាមគ្គីជុំគ្នាផងដែរ។
ដោយឡែកនៅថ្ងៃទី៥ ខែមេសា ឆ្នាំ២០១៥ សមាគមកម្ពុជាស្ម័គ្រចិត្ត អ៊ឺយចុងប៊ូ ក៏មានការរៀបចំពិធីដូចគ្នានេះនៅក្នុងទីក្រុង អ៊ឺយចុងប៊ូ ចាប់តាំងពីម៉ោង ១០ព្រឹក ដល់ម៉ោង ១៧ល្ងាច ដោយមានការចូលរួមពីសំណាក់ពលករ និងប្រជាពលរដ្ឋខ្មែរយ៉ាងច្រើនកុះករ។ ដោយសារតែពេលវេលា និងទីកន្លែងឆ្ងាយពីគ្នា ដែលមិនអនុញ្ញាតិអោយប្រជាពលរដ្ឋខ្មែរប្រារព្វពិធីជួបជុំជាមួយគ្នាបាននោះ នៅថ្ងៃទី ១២ ខែមេសា នេះក៏មានពិធីជួបជុំប្រារព្វពិធីអបអរបុណ្យចួលឆ្នាំថ្មីប្រពៃណីជាតិមួយផ្សេងទៀត រៀបចំឡើងដោយ មជ្ឈមណ្ឌលព្រះពុទ្ធសាសនាខ្មែរ ដែលប្រព្រឹត្តទៅនៅទីក្រុង ខ្យង់គីដូ ភាគខាងជើងនៃទីក្រុងសេអ៊ូល ដែលមានពលករ និងប្រជាពលរដ្ឋខ្មែរអញ្ចើញចូលរួម ប្រមាណ ១០០០នាក់។ ព្រះតេជគុណ រិន សារ៉ូ ដែលជាប្រធានគណៈកម្មការ ដឹកនាំរៀបចំប្រារព្វពីធីនេះ បានមានសង្ឃដីកា អោយដឹងថា គោលបំណងនៃការរៀបចំពិធីនេះមិនខុសគ្នាពីការរៀបចំ នៅកន្លែងដទៃទេ គឺដើម្បីអបអរសាទរទទួលទេវតាឆ្នាំថ្មី ដើម្បីបង្ហាញពីភាតរភាពរវាងខ្មែរ និងខ្មែរ ដែលកំពុងតែរស់នៅឆ្ងាយពីទឹកដីកំណើតរបស់ខ្លួនផង និងដើម្បីចូលរួមចំណែកថែរក្សាវប្បធម៌ ប្រពៃណីដ៏ត្រចះត្រចង់របស់ខ្មែរផងដែរ។ នៅក្នុងពិធីជួបជុំដ៏ធំមួយនោះ ក៏មានការរៃអង្គាសមួលនិធិជួយឧបត្ថម្ភដល់មន្ទីរពេទ្យគន្ធបុប្ផាផងដែរ។ ព្រះតេជគុណ រិន សារ៉ូ បានមានសង្ឈដីកាថា មូលនិធិ ដែលបានពីការបរិច្ឋាគពីពលករ និងប្រជាពលរដ្ឋខ្មែរ សរុបមានចំនួនជាង ៤ពាន់ដុល្លារ ដែលព្រះអង្គនឹងរៀបចំប្រគល់ជូនមន្ទីរពេទ្យគន្ធបុប្ផានៅពេលដ៏ខ្លីខាងមុខ។
សូមបញ្ជាក់ផងដែរថា និស្សិតខ្មែរដែលកំពុងបន្តការសិក្សានៅប្រទេសកូរ៉េខាងត្បួងមានចំនួនប្រមាណ ៣០០នាក់ និងពលករខ្មែរចំនួនជាង ៣៥០០០នាក់ ដែលកំពុងបម្រើការងារផ្សេងៗនៅទូទាំងប្រទេសមួយនេះ៕
© រក្សាសិទ្ធិដោយ thmeythmey.com