អន្តរជាតិ
នយោបាយអន្តរជាតិ
×![]()
នាយករដ្ឋមន្ត្រីកូរ៉េខាងត្បូងសម្រេចប្រកាសលាលែងពីតំណែងជាផ្លូវការ ក្រោយពេលលោករងការចោទប្រកាន់ថាជាប់ពាក់ព័ន្ធបញ្ហាពុករលួយដោយទទួលលុយខុសច្បាប់ពីអ្នកជំនួញ។ លោកនាយករដ្ឋមន្ត្រីរូបនេះបានបដិសេធការចោទប្រកាន់ ប៉ុន្តែលោកសុខចិត្តលាលែងពីតំណែងដើម្បីបំបាត់មន្ទិលសង្ស័យនិងបង្ហាញពីភាពស្អាតស្អំផង។
លោក មុំ ពិទូរ្យ លម្អិតព័ត៌មាននេះ
លោកនាយករដ្ឋមន្ត្រីកូរ៉េខាងត្បូង Lee Wan-koo បានប្រកាសលាលែងពីតំណែងជាផ្លូវការនៅថ្ងៃអង្គារនេះ ដោយសាររឿងអាស្រូវពុករលួយ។ លោក Lee Wan-kooសុខចិត្តចុះចេញពីតំណែង បន្ទាប់ពីលោកទាត់ចោលការចោទប្រកាន់ជុំវិញការទទួលលុយសំណូកខុសច្បាប់ពីអ្នកជំនួញម្នាក់ដែលទើបធ្វើអត្តឃាត។ មន្ត្រីរដ្ឋាភិបាលបានទទួលស្គាល់ថា ការស្នើសុំលាលែងពីតំណែងរបស់នាយករដ្ឋមន្ត្រីនេះជាការពិតបើតាមទីភ្នាក់ងារព័ត៌មានកូរ៉េ Yonhap។
រឿងអាស្រូវរបស់នាយករដ្ឋមន្ត្រីកូរ៉េរូបនេះ គឺពាក់ព័ន្ធនឹងការទទួលលុយខុសច្បាប់ដែលមានទំហំប្រមាណ ៣០លានវ៉ុន ដែលស្មើនឹង ២៧៧០០ដុល្លារអាមេរិក ពីអ្នកជំនួញម្នាក់ឈ្មោះ Sung Wan-jong។ លោក Sun Wan-jongត្រូវបានប្រទះឃើញស្លាប់បាត់បង់ជិវិតដោយធ្វើអត្តឃាតខ្លួនឯងនៅក្នុងខែនេះ ប៉ុន្តែគេមិនបានដឹងច្បាស់ពីមូលហេតុពិតប្រាកដនៅពីក្រោយការធ្វើអត្តឃាតនេះឡើយ។ បើតាមរយៈអាជ្ញាធរ អ្នកជំនួញម្នាក់នេះសម្លាប់ខ្លួន ស្របពេលដែលលោកស្ថិតក្រោមការស៊ើបអង្កេតមួយជុំវិញបញ្ហាសំណូក និងកិបកេងលុយកាក់មួយជំនួន។
ប៉ុន្តែមុនសម្រេចធ្វើអត្តឃាត លោក Sun Wan-jongបានផ្តល់បទសម្ភាសន៍ជាមួយទូរទស្សន៍ក្នុងស្រុកមួយដោយអះអាងថា លោកបានផ្តល់វិភាគទាននយោបាយទៅដល់មនុស្សជំនិតលោកស្រីប្រធានាធិបតី Park Geun-hyeនិងគណបក្សរបស់លោកស្រីផងដែរ។ រឿងអាស្រូវពុករលួយនិងការលាលែងពីតំណែងរបស់នាយករដ្ឋមន្ត្រីកូរ៉េខាងត្បូងនេះ ពិតជាធ្វើអោយប៉ះពាល់ដល់របបដឹកនាំរបស់លោកស្រី Park Geun-hyeដែលកំពុងទន់ជ្រាយស្រាប់នោះ។
ក្នុងពេលដែលមានការប្រកាសលាលែងពីតំណែងរបស់ប្រមុខរដ្ឋាភិបាល ប្រធានាធិបតីលោកស្រី Park មិនស្ថិតនៅក្នុងប្រទេសឡើយ លោកស្រីកំពុងស្ថិតក្នុងដំណើរទស្សនកិច្ចផ្លូវការទៅកាន់ប្រទេសបួននៅតំបន់អាមេរិកខាងត្បូងនិងអាមេរិកកណ្តាល។
បច្ចុប្បន្ននេះលោកស្រី Park កំពុងស្ថិតក្នុងឆ្នាំទីបីនៃអាណត្តិប្រាំឆ្នាំ ហើយគណបក្សរបស់លោកស្រីនឹងត្រូវប្រឈមការបោះឆ្នោតដ៏តឹងតែងមួយនៅក្នុងឆ្នាំក្រោយដើម្បីដណ្តើមអាសនៈសរុបចំនួន៣០០ ។ បញ្ហាពុករលួយក្នុងបរិបទនយោបាយកូរ៉េខាងត្បូងនេះនឹងក្លាយជាបញ្ហាចម្រូងចម្រាស និង ប្រធានបទក្តៅបំផុតមួយសម្រាប់ការឃោសនាបោះឆ្នោត ហើយអ្វីដែលគេព្រួយបារម្ភនោះ វានឹងធ្វើអោយគណបក្សលោកស្រី Park ធ្លាក់ចុះប្រជាប្រិយភាពខ្លាំងថែមទៀត។ កាលពីប៉ុន្មានសប្តាហ៍មុនប្រមុខរដ្ឋកូរ៉េខាងត្បូងធ្លាប់ព្រមានជាស្រេចហើយថា អ្នកណាក៏ដោយដែលជាប់ពាក់ព័ន្ធរឿងបញ្ហាពុករលួយ នឹងមិនអាចអត់អោនអោយបាននោះឡើយ ហើយលោកស្រីនឹងដកតំណែងរាល់អ្នកប្រព្រឹត្តខុសទាំងនោះ៕
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
