ខ្មែរក្រហម
ជាតិ
សាលាក្តីខ្មែរក្រហមអនុម័តថវិកា៣៣.៨លានដុល្លារសម្រាប់ចំណាយក្នុងឆ្នាំ២០១៥
×
ក្រុមប្រទេសផ្តល់ជំនួយសំខាន់ៗបានអនុម័តគម្រោងថវិកាកែសម្រួលថ្មីសម្រាប់ឆ្នាំ២០១៤-២០១៥របស់អង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក)។ នេះបើយោងតាមសេចក្តីប្រកាសព័ត៌មានរបស់សាលាក្តីខ្មែរក្រហម។
សេចក្តីប្រកាសព័ត៌មានចេញផ្សាយនៅថ្ងៃទី២១មេសាបានបង្ហាញថា គម្រោងថវិកាដែលបានអនុម័តសម្រាប់ឆ្នាំ២០១៥នេះមានសរុបចំនួន៣៣.៨លានដុល្លារក្នុងនោះថវិកាចំនួន២៧.១លានដុល្លារសម្រាប់ភាគីអន្តរជាតិ និង៦.៧លានដុល្លារសម្រាប់ភាគីជាតិ។
សេចក្តីប្រកាសព័ត៌មានដដែលបន្តថាសម្រាប់គម្រោងថវិកាឆ្នាំ២០១៤ត្រូវបានកែសម្រួលដោយឈរលើមូលដ្ឋាននៃគម្រោងចំណាយដែលមានចំនួន២៧,៨លានដុល្លារសហរដ្ឋអាមេរិកនៅក្នុងនោះ២១,៧លានដុល្លារសហរដ្ឋអាមេរិកសម្រាប់ភាគីអន្តរជាតិនិង៦,១លានដុល្លារសហរដ្ឋអាមេរិកសម្រាប់ភាគីជាតិ។
លោកនេតភក្ត្រា អ្នកនាំពាក្យសាលាក្តីខ្មែរក្រហមបានថ្លែងប្រាប់សារព័ត៌មានថ្មីៗនៅថ្ងៃពុធនេះថារាជរដ្ឋាភិបាលកម្ពុជាបានផ្តល់ថវិកាចំនួន៤.១លានដុល្លារសម្រាប់ផ្តល់ឲ្យភាគីជាតិក្នុងឆ្នាំ២០១៥នេះក្នុងនោះ២.៥លានដុល្លារ ត្រូវប្រើប្រាស់សម្រាប់ប្រាក់បៀវត្សរយៈពេល៦ខែនិង១.៦លានដុល្លារសម្រាប់ចំណាយលើប្រតិបត្តិការផ្សេងៗនៅក្នុងសាលាក្តីខ្មែរក្រហមដូចជា ចំណាយទឹក ភ្លើងនិងការដឹកជញ្ជូនជាដើមដូច្នេះ ភាគីជាតិនៃសាលាក្តីខ្មែរក្រហមនៅខ្វះថវិកាចំនួន២.៦លានដុល្លារបន្ថែមទៀត។
អ្នកនាំពាក្យសាលាក្តីខ្មែរក្រហមដដែល ក៏បានអំពាវនាវដល់សហគមន៍ម្ចាស់ជំនួយទាំងអស់បន្តផ្តល់ជំនួយជាបន្តទៀតអ.វ.ត.កដើម្បីធានាថាដំណើរការនីតិវិធីតុលាការប្រព្រឹត្តទៅដោយគ្មានការរអាក់រអួលសម្រាប់ឆ្នាំ២០១៥នេះ។
សូមបញ្ជាក់ថាសាលាក្តីខ្មែរក្រហមបានចាប់ផ្តើមដំណើរការតាំងពីឆ្នាំ២០០៦មក។ចាប់តាំងពីឆ្នាំ២០០៦ដល់ឆ្នាំ២០១៤សាលាក្តីកូនកាត់មួយនេះបានចំណាយថវិកាអស់ចំនួន២០៤.៥លានដុល្លារក្នុងភាគីអន្តរជាតិចំនួន១៥៤.៩លានដុល្លារនិងភាគីជាតិចំនួន៤៩.៦លានដុល្លារ៕
© រក្សាសិទ្ធិដោយ thmeythmey.com