ជាតិ
×![]()
ភ្នំពេញ៖ គិតមកដល់ពេលនេះ សហគមន៍ខ្មែរកម្ពុជាក្រោមបានថតចម្លងឯកសារទាក់ទងនឹងទឹកដីកម្ពុជាក្រោមដែលរកឃើញជាង ៥ពាន់ទំព័រនោះ បានជាង ២ពាន់ទំព័រ ហើយសហគមន៍ ក៏ត្រូវការថវិកាបន្ថែមជាង ៨ពាន់អឺរ៉ូ ស្មើជាង ៩ពាន់ដុល្លារអាមេរិកទៀត ដើម្បីបោះពុម្ពរួចរាល់។ នេះបើតាមការបញ្ជាក់របស់ លោក ថាច់ សេដ្ឋា។
សហគមន៍ខ្មែរកម្ពុជាក្រោមបានបោះពុម្ពឯកសារដែលបានរកឃើញនៅប្រទេសបារាំងជាង ៥ពាន់ទំព័រ រួចជាងពាក់កណ្តាលហើយ នៅត្រឹមខែមេសានេះ។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា បានឲ្យដឹងថា ក្រុមការងាររបស់លោក បានថតចម្លងឯកសាររួចជាង ២ពាន់ទំព័រហើយ ពោលគឺ នៅតែជាង ៣ពាន់ទំព័រទៀត ប៉ុណ្ណោះ មុននឹងបញ្ជូនមកកាន់កម្ពុជា នាពេលខាងមុខ។ បើតាមគម្រោងសហគមន៍ខ្មែរក្រោម គ្រោងនឹងបញ្ចប់ការបោះពុម្ពនៅអំឡុងខែមិថុនា ឆ្នាំ២០១៥ ។
លោកថា៖«យើងបានរៀបចំឯកសារ និងថតចម្លងបានជាង ២ពាន់ទំព័ររួចរាល់ ដោយចំណាយថវិកាអស់ជាង ៥ពាន់អឺរ៉ូ ស្មើជាង ៦ពាន់ដុល្លារអាមេរិក។ ហើយយើងនៅត្រូវការថវិកាបន្ថែមចំនួន ៨ពាន់អឺរ៉ូ ស្មើជាង ៩ពាន់ដុល្លារអាមេរិកទៀត ដើម្បីបោះពុម្ពរួច»។
សមាគមន៍ខ្មែរកម្ពុជាក្រោម កន្លងមក បានប្រកាសថា ត្រូវការថវិកាចំនួន ១២៥០០អឺរ៉ូស្មើនឹង ១៣០០០ដុល្លារអាមេរិក ដើម្បីថតចម្លងឯកសារសំខាន់ៗដែលទាក់ទងនឹងទឹកដីកម្ពុជាក្រោមប្រមាណ៥ពាន់ទំព័រនៅក្នុងប្រទេសបារាំងនោះ។ ប្រធានសហគមន៍ខ្មែរបាន បញ្ជាក់ពីការទទួលបានថវិកាសម្រាប់ចំណាយបោះពុម្ពឯកសាររួចជាងពាក់កណ្តាលនោះថា៖«យើងបានថវិកាសប្បុរសធម៌ពីបងប្អូន សប្បុរសជន នៅប្រទេសបារាំង កន្លងមក។ ហើយយើងក៏ត្រូវថវិកាបន្ថែមទៀត ដើម្បីបញ្ចប់»។
ឯកសារសំខាន់ៗទាក់ទងនឹងទឹកដីកម្ពុជាក្រោមជាង ៥ពាន់ទំព័រនោះ ត្រូវបានថតចម្លងចេញពីឯកសារដើម នៅក្នុងបណ្ណាសារដ្ឋានជាតិបារាំង នៅខេត្តអេអង់ប្រូវ៉ង់ (Aix-en-Provence) ប្រទេសបារាំង។ នេះជាប្រសាសន៍បញ្ជាក់របស់លោក ថាច់ សេដ្ឋា។
ឯកសារទាំង៥ពាន់ទំព័រ ដែលសហគមន៍ខ្មែរកម្ពុជាក្រោមនិងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យបានរកឃើញរួមមានដូចជាព្រះរាជសារព្រះករុណាព្រះបាទនរោត្តមផ្ញើរជូនរដ្ឋាភិបាលបារាំងកិច្ចព្រមព្រៀងបារាំងវៀតណាមនៅឆកសមុទ្រហាឡុង នៅដាឡាត់និងនៅហ្វុងតេនណឺប្លូជាដើម។ ក្រៅពីនេះក៏រកឃើញកំណត់ហេតុប្រជុំសភាបារាំងក្នុងការកាត់ទឹកដីខ្មែរឲ្យវៀតណាមថ្ងៃទី០៤ មិថុនាឆ្នាំ១៩៤៩ សន្ធិសញ្ញាបារាំងវៀតណាមនិងកំណត់ហេតុចរចាផ្សេងៗព្រមទាំងលិខិតឆ្លងឆ្លើយសម្ងាត់ជាច្រើនដែលទាក់ទងនឹងការកាត់ផ្ទេរទឹកដីខ្មែរឲ្យវៀតណាម។ ឯកសារទាំងនេះត្រូវបានរកឃើញនៅក្នុងបណ្ណាសារដ្ឋានជាតិបារាំង នៅខេត្តអេអង់ប្រូវ៉ង់ (Aix-en-Provence) ប្រទេសបារាំងតាមការណែនាំរបស់ស្ថានទូតបារាំង ប្រចាំនៅកម្ពុជា។
បើតាមប្រធានសហគមន៍ខ្មែរកម្ពុជាក្រោមបន្ទាប់ពីបញ្ចប់ការថតចម្លងសហគមន៍ខ្មែរកម្ពុជាក្រោមនឹងធ្វើការបកប្រែជាផ្លូវការនូវឯកសារទាំងនោះពីភាសាបារាំងមកជាភាសាខ្មែរ និងអង់គ្លេស។បន្ទាប់មកសហគមន៍ខ្មែរកម្ពុជាក្រោម នឹងដាក់ជូនទៅកាន់ក្រសួងអប់រំដើម្បីស្នើសុំបញ្ចូលក្នុងកម្មវិធីសិក្សាតម្កល់នៅរាជ្យបណ្ឌិតសភាកម្ពុជា និងអង្គការយូណេស្តូដើម្បីរក្សាទុកជាប្រវត្តិសាស្ត្រជាតិ។
ជាងនេះទៀតនោះ លោកបានបញ្ជាក់ថា៖«សហគមន៍ខ្មែរកម្ពុជាក្រោមក៏នឹងយកឯកសារទៅកាន់ស្ថានទូតវៀតណាមប្រចាំនៅកម្ពុជាដើម្បីបញ្ជាក់ពីប្រវត្តិសាស្ត្រពិតនៃទឹកដីកម្ពុជាក្រោម»។
គួរបញ្ជាក់ថា កន្លងមក អ្នកនាំពាក្យស្ថានទូតវៀតណាមបានអះអាងជាសាធារណៈថា ទឹកដីកម្ពុជាក្រោមជារបស់វៀតណាមតាំងពីយូរយារណាស់មកហើយ។ ដូច្នេះទើបធ្វើឲ្យសហគមន៍ ខ្មែរកម្ពុជាក្រោមព្យាយាមធ្វើដំណើរទៅប្រទេសបារាំងស្រាវជ្រាវរកឯកសារដើម្បីបង្ហាញជាភស្តុតាងថា ទឹកកម្ពុជាក្រោមជាទឹកដីរបស់ខ្មែរដែលបារាំងបានកាត់ប្រគល់ទៅវៀតណាម៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
