ពីនេះ ពីនោះ
វីធីសាស្ត្រទាំង១០ ដែលជួយកាត់បន្ថយបញ្ហាតានតឹង«Stress»!
×
សញ្ញាដែលបង្ហាញថា អ្នកជាមនុស្សមានអារម្មណ៍មិនល្អឬមានភាពតានតឹង«Stress»ក្នុងចិត្ត គឺបង្ហាញតាមរយៈការប្រើពាក្យសម្តីខ្លាំងៗ ឬមិនចង់និយាយជាមួយនរណាម្នាក់ ហើយតែងតែស្តីបន្ទោសខ្លួនឯង និងគិតពីរឿងនេះ រឿងនោះច្រើនពេក ឬក៏បង្ហាញទឹកមុខស្រងូតស្រងាត់ជាដើម។ មានវិធីសាស្ត្រមួយចំនួនអាចជួយកាត់បន្ថយបញ្ហាតានតឹងទាំងនេះបាន ដោយអ្នកគ្រាន់តែអនុវត្តន៍តាមវិធីសាស្ត្រណាមួយដែលអ្នកចូលចិត្ត៖
១. លើកទឹកចិត្តខ្លួនឯង៖ នៅពេលមានបញ្ហាផ្លូវចិត្តនឹងធ្វើឲ្យខ្លួនឯងបាក់ទឹកចិត្ត ដូច្នេះអ្នកត្រូវតែព្យាយាមតស៊ូ តាំងចិត្តឲ្យរឹងមាំ និងត្រូវគិតបែបវិជ្ជមានដោយគិតថា អ្វីដែលគេធ្វើបាន អ្នកក៏អាចធ្វើបានដែរ។ អ្នកត្រូវចៀសវាងនូវការស្តីបន្ទោសឲ្យខ្លួនឯង ការគិតឃើញតែបញ្ហា។ ល។
២. សមាធិ៖ នៅពេលដែលអ្នកមានអារម្មណ៍មិនល្អឬតានតឹងក្នុងចិត្ត អ្នកគួរតែធ្វើសមាធិឲ្យបាន១០ទៅ១៥នាទី។ ការធ្វើសមាធី គឺអាចជួយកាត់បន្ថយភាពតានតឹងបានច្រើន ព្រោះធ្វើឲ្យអ្នកមានអារម្មណ៍ស្រស់ស្រាយ និងធូរស្បើយទៅតាមការដកដង្ហើមចេញដកដង្ហើមចូលនៅពេលធ្វើសមាធិ។
៣. ដើរកម្សាន្តនៅតំបន់ធម្មជាតិ៖ ដើរកម្សាន្តតាមតំបន់ធម្មជាតិដែលមានព្រៃព្រឹក្សាខៀវស្រងាត់ និង ពោរពេញទៅដោយខ្យល់បរិសុទ្ធ និងបរិយាកាសត្រជាក់ល្អ។ វិធីសាស្ត្រមួយនេះ ធ្វើឲ្យអ្នកមានអារម្មណ៍ស្ងប់ស្ងាត់ល្អ និងរសាត់ទៅតាមខ្យល់ទាំងនោះ។
៤. លេងកីឡា៖ ការលេងកីឡាជាវិធីសាស្ត្រមួយផងដែរ ដែលធ្វើឲ្យអ្នកបំភ្លេចនូវទុក្ខកង្វល់នៅក្នុងចិត្តព្រោះអ្នកគិតតែពីការសប្បាយ និងគិតតែខំប្រកួត។ ម្យ៉ាងទៀត អ្នកអាចបញ្ចេញញើស និងកំហឹងនៅក្នុងចិត្តបានទៀតផង។ បន្ទាប់ពីលេងកីឡាហើយងូតទឹកសម្អាតប្រាណរួច នោះអ្នកនឹងមានអារម្មណ៍ល្អ និងធូរស្បើយនៅក្នុងចិត្ត។
៥. ច្រៀងចម្រៀង៖ ការបញ្ចេញភាពតានតឹងឬអារម្មណ៍មិនល្អតាមរយៈការច្រៀងចម្រៀង ក៏ជាវិធីល្អម្យ៉ាងដែរ។ អ្នកត្រូវច្រៀងចម្រៀងណាដែលអាចធ្វើឲ្យអ្នកបំបាត់នូវទុក្ខកង្វល់ក្នុងចិត្តអ្នកបាន ដូចជាបទលើកទឹកចិត្តខ្លួនឯង និងបទណាដែលអាចស្រែកបានខ្លាំងៗតាមចង្វាក់ភ្លេង។ វិធីនេះនឹងធ្វើឲ្យអ្នកមានអារម្មណ៍ធូរស្បើយ ព្រោះអ្នកបានបញ្ចេញអារម្មណ៍មិនល្អនិងទុក្ខកង្វល់ទៅតាមចង្វាក់ភ្លេង។
៦. ជជែកលេងជាមួយមិត្តភក្តិ៖ ការនិយាយរឿងរ៉ាវ និងរៀបរាប់ទុក្ខកង្វល់ក្នុងចិត្តប្រាប់មិត្តភក្តិ នឹងធ្វើឲ្យអស់កង្វល់នៅក្នុងចិត្ត។ វិធីសាស្ត្រមួយនេះ ពិតជាធ្វើឲ្យអ្នកមានអារម្មណ៍ល្អ ព្រោះអ្នកបានបញ្ចេញភាពតានតឹងទាំងនោះអស់ពីក្នុងចិត្តរបស់អ្នក។
៧. បញ្ចេញអារម្មណ៍តាមហ្វេសប៊ុក៖ ហ្វេសប៊ុកជាឧបករណ៍មួយដែលអនុញ្ញាតឲ្យអ្នកបញ្ចេញ អារម្មណ៍សប្បាយចិត្ត ឬមិនសប្បាយចិត្តនៅលើបណ្តាញមួយនេះ។ ការធ្វើបែបនេះ អាចធ្វើឲ្យមិត្តភក្តិនៅក្នុងហ្វេសប៊ុករបស់អ្នកបានដឹងពីអ្វីដែលអ្នកបានបង្ហាញ។ ជាពិសេស មិត្តរបស់អ្នកអាចរួមចំណែកជួយរំលែកទុក្ខ ផ្តល់ជាគំនិតល្អៗ និងជួយលើកទឹកចិត្តអ្នកផងដែរ។
៨. តុបតែងខ្លួនឲ្យប្លែកពីធម្មតា៖ ការតុបតែងខ្លួនឲ្យប្លែកពីធម្មតា តាមរយៈការស្លៀកពាក់ខោអាវថ្មីៗ ពណ៌ស្រស់ៗ និងតុបតែងម៉ូដសក់ប្លែកៗ ក៏ជាវិធីសាស្ត្រមួយដ៏ល្អផងដែរ។ វិធីនេះធ្វើឲ្យអ្នកមានអារម្មណ៍ស្រស់ស្រាយ និងប្លែកៗទៅតាមការតុបតែងខ្លួនប្រាណរបស់អ្នក។
៩. រកជំនួយជាគំនិតមកជួយដោះស្រាយបញ្ហា៖ នៅពេលដែលអ្នកមានបញ្ហាតានតឹងនៅក្នុងចិត្តខ្លាំង មិនអាចដោះស្រាយបានដោយខ្លួនឯង អ្នកត្រូវរកជំនួយជាគំនិតពីបងប្អូន លោកគ្រូអ្នកគ្រូ និងមិត្តភក្តិរបស់អ្នក ដើម្បីឲ្យពួកគេជួយដោះស្រាយបញ្ហានិងទុក្ខកង្វល់នៅក្នុងចិត្ត។ វិធីនេះកាន់តែមានប្រសិទ្ធភាព ព្រោះអ្នកទទួលបាននូវគំនិតល្អៗ ហើយធ្វើឲ្យអ្នកមានកម្លាំងចិត្ត និងជំនឿលើខ្លួនឯងកាន់តែខ្លាំង។
១០. ធ្វើអ្វីដែលអ្នកចូលចិត្តធ្វើ៖ អ្នកត្រូវគិតថាអ្វីដែលខ្លួនឯងចូលចិត្ត និងចង់ធ្វើ ហើយគិតថាវាមានប្រយោជន៍ និងមានប្រសិទ្ធភាពខ្ពស់ក្នុងការកាត់បន្ថយភាពតានតឹងនៅក្នុងចិត្តបាន អ្នកត្រូវតែធ្វើវា៕
© រក្សាសិទ្ធិដោយ thmeythmey.com